دۇنيە ءجۇزىنىڭ كوپتەگەن ەلدەرى وسى لاتىن قارىپتەرىن قولدانۋ ارقىلى جاڭا تەحنولوگيالارعا جاقىنداي ءتۇسكەنىن كوكىرەگى وياۋ, كوزى اشىق جاننىڭ ءبارى بىلەدى. «كوز قورقاق, قول باتىر» دەگەندەي كوز ۇيرەنسە, ءبارى دە باسقاشا كورىنەتىنى بەلگىلى. ماسەلەن, «ق» دىبىسىن الايىقشى. كەيىنگى لاتىنشاعا كوشكەن جاعدايدا ونى «Q», «q» تاڭباسىمەن قولدانۋدىڭ ءتول دىبىسىمىزعا ءدال كەلەتىنى ءجيى ايتىلا باستادى. مەنىڭ اتىم «Qazaq» دەپ الەمدى مويىنداتىپ جۇرگەن اتاقتى كاسىپقوي بوكسشىمىز قانات يسلامنان باستاپ, قازاقستان تەلەارناسى ۇسىنعان «Qazaqstan» اتاۋىنا وراي ءوز اتتارىن وزگەرتكەن «Saryarqa» تەلەارناسىنا دا, «Qazaq Radiolary» مەن «Qazsport»-قا دا كوزىمىز ۇيرەنە باستادى. ەرتەڭ «ەگەمەن قازاقستان» گازەتىمىز دە «Egemen Qazaqstan» بولىپ شىعىپ جاتسا, رۋحىمىزدى اسقاقتاتا تۇسەدى.
ەلباسىمىز ەلىمىزدە جۇرگىزىلىپ جاتقان ساياسي, ەكونوميكالىق, الەۋمەتتىك جانە رۋحاني جاڭعىرۋ ۇدەرىسىندە ءتىلىمىزدىڭ دە جاڭا بەلەسكە كوتەرىلۋىنە ەرەكشە نازار اۋدارىپ كەلەدى. ال ەلباسىمىزدىڭ 2015 جىلى اقش-تىڭ نيۋ-يورك قالاسىندا ءوتكەن بىرىككەن ۇلتتار ۇيىمى باس اسسامبلەياسىنىڭ مەرەيتويلىق 70-ءشى سەسسياسىندا الەمنىڭ ەڭ جوعارى ءمىنبەرىنەن تۇڭعىش رەت مەملەكەتتىك تىلدە سويلەگەن ءسوزى ەشقاشان دا ۇمىتىلمايتىن ءسات. الەمنىڭ ەكى ءجۇزگە جۋىق باسشىسىنىڭ قازاق ءتىلىن تىڭداعانى ۇلتىمىز ءۇشىن تاريحي وقيعا بولدى. تاۋەلسىزدىگىمىزدىڭ 24-جىلدىعىن اتاپ ءوتۋ بارىسىندا ەلباسىمىز قازاقشا بايانداعان سەبەبىن: «ءبىزدىڭ ءتىلىمىز دۇنيە جۇزىنە ەستىلسىن, قۇلاقتارىنا ءسىڭسىن دەپ ويلادىم. ءارى قاراي جىلجىتا بەرەمىز. مەن ادەيى سولاي جاسادىم, سوندىقتان مەن ايتقاننان كەيىن, مەنەن كەيىنگى باسشىلار دا سولاي سويلەيدى دەپ سەنەمىن», دەپ تۇسىندىرگەن ەدى. وسى ءبىر تاريحي ساتكە وراي انا ءتىلىمىزدىڭ ناعىز جاناشىرلارىنىڭ ءبىرى پارلامەنت ءماجىلىسىنىڭ دەپۋتاتى ازات پەرۋاشەۆ ءوزىنىڭ ارىپتەستەرى مەن ۇكىمەت مۇشەلەرىن, مەملەكەت قىزمەتكەرلەرىن ەلباسىمىزدان ۇلگى الۋعا شاقىرعان بولاتىن. ەلباسىمىز ءوزىنىڭ قازاقستان حالقىنا ارناعان بيىلعى «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا دا
«...قازاق ءتىلىن حالىقارالىق دەڭگەيگە جاقىنداتۋ كەرەك. لاتىن الىپبيىنە كوشۋ بۇل ماسەلەنى رەتتەۋگە مۇمكىندىك بەرەدى. 2025 جىلعا دەيىن ءبىلىم بەرۋدىڭ بارلىق دەڭگەيىندە لاتىن الىپبيىنە كوشۋدىڭ ناقتى كەستەسىن جاساۋ قاجەت» دەپ اتاپ كورسەتكەن بولاتىن.
مىنە, قازاق ءتىلى ەندى تاعى ءبىر جاڭا بەلەستىڭ الدىندا تۇر. لاتىن ءالىپبيى ەڭ الدىمەن وركەنيەت جولىنداعى باسەكەگە قابىلەتتىلىكتى ارتتىرىپ, پراگماتيكالىق سانانىڭ ورنىعۋىنا جول اشادى. تسيفرلى تەحنولوگيانىڭ ەركىن ەنۋىنە, الەمدەگى كەڭ تارالعان ءتىلدەردى ۇيرەنۋگە جاقسى جاعداي جاسايدى.
