1951-1954 جىلدارى كەڭەس ارمياسى قاتارىندا ازاماتتىق ءمىندەتىن اتقارىپ كەلگەن سوڭ, 8 جىل بويى قازاقستان كومپارتياسى سوكولوۆ اۋداندىق كوميتەتىنىڭ نۇسقاۋشىسى, ماشينا-تراكتور ستانساسى مەن «ياۆلەنسكي» كەڭشارى پارتيا بيۋروسىنىڭ حاتشىسى قىزمەتىن اتقاردى. وسى جىلدارى وندىرىستەن قول ۇزبەي تالعار اۋىل شارۋاشىلىعى تەحنيكۋمىن اگرونوم ماماندىعى بويىنشا اياقتايدى, ال سودان كەيىن جوعارى پارتيا مەكتەبىن ءبىتىرەدى.
1962 جىلى ول ارتتا قالعان «افاناسەۆسكي» كەڭشارىنىڭ ديرەكتورى بولىپ تاعايىندالادى جانە 2 جىلدان كەيىن ونى وزاتتار قاتارىنا شىعارادى. ءتورت جىلدان كەيىن بىلىكتى باسشى سوكولوۆ اۋداندىق پارتيا كوميتەتىنىڭ ءبىرىنشى حاتشىسى بولىپ سايلانادى. وسى قىزمەتتە ونىڭ ۇيىمداستىرۋشىلىق قابىلەتىنىڭ جاڭا قىرلارى اشىلىپ, اۋدان قىسقا مەرزىمدە ءىرى اۋىل شارۋاشىلىعى وندىرۋشىلەرىنىڭ بىرىنە اينالدى. شارۋاشىلىقتىڭ ەكونوميكاسى نىعايا ءتۇستى, تۇرعىن ءۇي, جول, ءوندىرىستىك نىساندار قۇرىلىسى ءورىس الدى. كوپ كەشىكپەي م.ساعديەۆ جاڭادان اشىلعان جامبىل اۋدانىنا باسشىلىققا جىبەرىلدى, ال تاعى بىرقاتار ۋاقىتتان كەيىن تورعاي وبلىستىق اتقارۋ كوميتەتى توراعاسىنىڭ ءبىرىنشى ورىنباسارى لاۋازىمىنا تاعايىندالدى. ول ءوزىنىڭ كۇندەلىكتى ەڭبەگىمەن جانە قاجىر-قايراتىمەن كۇردەلى تابيعي-كليماتتىق جاعدايداعى وسى ايماقتا اۋىل شارۋاشىلىعى ءوندىرىسىن ەلەۋلى تۇردە كوتەرۋگە, ونىڭ ماتەريالدىق-تەحنيكالىق بازاسىن نىعايتۋعا, ەلدى مەكەندەردى اباتتاندىرۋعا جانە ەلەكترلەندىرۋگە, اۆتوموبيل جولدارى مەن بايلانىس قۇرالدارى جەلىسىنىڭ كەڭەيۋىنە كۇش سالدى. حالىق اعارتۋ, دەنساۋلىق ساقتاۋ جانە مادەنيەت ىستەرىندە ەلەۋلى ءىلگەرىلەۋشىلىككە قول جەتكىزىلدى. وبلىس ورتالىعى – ارقالىق قالاسىندا پەداگوگيكالىق ينستيتۋت پەن بىرنەشە تەحنيكۋم, مادەنيەت ءۇيى جانە دراما
1980 جىلى ەل باسشىلىعى ونى قازاق كسر بالىق شارۋاشىلىعى ءمينيسترى قىزمەتىنە جوعارىلاتتى. وسى ماڭىزدى سالاداعى ءىستىڭ جاعدايى مەن پروبلەمالارىنا تەز ارادا قانىقتى. بۇعان ونىڭ شارۋاشىلىق قىزمەتىندەگى جانە ۇيىمداستىرۋ جۇمىستارىنداعى بۇرىنعى جيناعان تاجىريبەسى جاقسى كومەكتەستى. حالىققا ءىشكى سۋ قويمالارىنداعى بالىق ءونىمدەرىمەن قاتار تەڭىز بالىعى جانە بالىق ونىمدەرى قولجەتىمدى بولدى. رەسپۋبليكا استاناسىندا جانە وبلىس ورتالىقتارىندا زاماناۋي ساۋدا-تەحنولوگيالىق جانە توڭازىتقىش جابدىقتارمەن جاراقتانعان مامانداندىرىلعان «مۇحيت» دۇكەندەرىنىڭ جەلىسى كەڭەيدى.
1983-1985 جىلدارى م.ساعديەۆ قوستاناي وبلىستىق اتقارۋ كوميتەتىنىڭ توراعاسى بولىپ قىزمەت اتقاردى. تەرىسكەي ءوڭىرىنىڭ ەگىنشىلىك مادەنيەتىن ارتتىرۋ, تۇرعىن ءۇي جانە كوممۋنالدىق-تۇرمىستىق نىساندار سالۋ, جول قۇرىلىسىنا بايلانىستى كۇرەس تاباندىلىقپەن جۇرگىزىلدى. ونەركاسىپ كاسىپورىندارىندا, قۇرىلىستاردا شارۋاشىلىق ەسەپ ۇستانىمدارىن ەنگىزۋگە, ال اۋىل شارۋاشىلىعىندا – رەنتابەلدىلىكتى ارتتىرۋعا جانە ءوز قاراجاتتارى ەسەبىنەن كەڭەيتىلگەن ۇدايى ءوندىرىستى قامتاماسىز ەتۋگە باسا كوڭىل ءبولىندى.
ماقتاي رامازان ۇلى وزىنە ءتان قاجىر-قايراتپەن جانە ءىسكەرلىكپەن كەڭەس جانە پارتيا ورگاندارىنىڭ جۇمىس ءستيلى مەن ءادىستەرىن جەتىلدىرە وتىرىپ, جاستاردى تاربيەلەۋ جانە وقىتۋ, حالىقتىڭ دەنساۋلىعىن قورعاۋ, ولاردىڭ ءمادەني-تۇرمىستىق مۇقتاجدارىن قاناعاتتاندىرۋ ماسەلەلەرىمەن ىجداعاتپەن اينالىستى, مۇنىڭ بارلىعى زور ەرلىكتى, تاباندىلىقتى, ديپلوماتيالىق شەبەرلىكتى تالاپ ەتتى.
1985-1989 جىلدارى م.ساعديەۆ كوكشەتاۋ وبلىستىق پارتيا كوميتەتىنىڭ ءبىرىنشى حاتشىسى بولىپ جۇمىس جاسادى جانە بۇل ءوڭىردى قازاقستانداعى الدىڭعى ورىنداردىڭ بىرىنە شىعاردى. بۇدان كەيىن ول قازاق كسر جوعارعى كەڭەسى ءتورالقاسىنىڭ توراعاسى, ەل پرەزيدەنتىنىڭ كەڭەسشىسى بولدى, قازاقستان كومپارتياسى ورتالىق كوميتەتىنىڭ مۇشەسى, جوعارعى كەڭەستىڭ, پارلامەنت ءماجىلىسىنىڭ دەپۋتاتى بولىپ سايلاندى.
1991 جىلدىڭ سوڭىنان ماقتاي ساعديەۆ ارداگەرلەر ورتالىق كەڭەسىنە ون توعىز جىل باسشىلىق ەتتى. بۇدان باسقا قازاقستان حالقى اسسامبلەياسى كەڭەسىنىڭ مۇشەسى, پرەزيدەنت جانىنداعى سىبايلاس جەمقورلىقپەن كۇرەس جانە مەملەكەتتىك قىزمەتشىلەردىڭ قىزمەتتىك ەتيكاسىن ساقتاۋ ماسەلەلەرى جونىندەگى مەملەكەتتىك كەڭەس توراعاسىنىڭ ورىنباسارى, ەل پرەزيدەنتى جانىنداعى ۇلتتىق كەڭەستىڭ مۇشەسى بولدى.
ەل تاۋەلسىزدىگىنىڭ العاشقى كۇندەرىنەن باستاپ, ماقتاي رامازان ۇلى تۇڭعىش پرەزيدەنتىمىز نۇرسۇلتان ءابىش ۇلى نازارباەۆتى اسقان بەلسەندىلىكپەن قولداپ, قۋاتتادى, ءسويتىپ رەسپۋبليكانى ەكونوميكالىق جانە الەۋمەتتىك تۇرعىدان دامىتۋ, قازاقستاندىق قوعامداعى ۇلتارالىق كەلىسىمدى نىعايتۋدا مەملەكەت باسشىسىنىڭ سەنىمدى سەرىگى بولا ءبىلدى. ەلباسىنىڭ بارلىق باستامالارىن رەسپۋبليكالىق ارداگەرلەر ۇيىمى دەرەۋ قولداپ, ەل اراسىندا ءتيىستى ۇگىت-ناسيحات جۇمىستارىن جۇرگىزۋدە, جاستارعا ءتاربيە بەرۋ جۇمىستارىندا بار ىنتا-جىگەرىمەن اتسالىستى. ءاردايىم وسى باعىتتا ارداگەرلەر ەلىمىزدەگى پرەزيدەنت سايلاۋى ناۋقاندارىندا الدىڭعى قاتاردان كورىنە ءبىلدى. وسىعان وراي 1998 جىلى رەسپۋبليكالىق ارداگەرلەر ۇيىمىنىڭ كەزەكتەن تىس III سەزىندە نۇرسۇلتان ءابىش ۇلى نازارباەۆتى پرەزيدەنتتىككە ءۇمىتكەرلىككە ۇسىنعانىن دا اتاپ كەتكەن ءجون شىعار.
ماقتاي رامازان ۇلى 80 جاسقا تولعاننان سوڭ پرەزيدەنتتىڭ قابىلداۋىندا بولىپ, بىرگە ىستەگەن جىلدارىنا ريزاشىلىعىن ءبىلدىرىپ, دەنساۋلىعىنا بايلانىستى جۇمىستان بوساتۋعا ءوتىنىش جازعان. وكىنىشكە قاراي, سودان كەيىن كوپ ۇزاماي 84 جاسقا قاراعان شاعىندا باقيلىق بولىپ كەتتى.
مارقۇمنىڭ بالالارىنىڭ ءوتىنىشى بويىنشا, كۇنى كەشە عانا ومىردەن وزعان, كوپ جىل ارداگەرلەر ۇيىمىنداعى ماقاڭنىڭ ورىنباسارى, گەنەرال مۇقىشەۆ بەكبولات باپان ۇلىنىڭ قۇراستىرۋىمەن كەزىندەگى باسشىسىنىڭ عيبراتتى ءومىرىن جانە ەڭبەك جولىن ەسكە الۋ ماقساتىندا «نار تۇلعا» اتتى ەستەلىك كىتاپ جارىق كورگەن بولاتىن. وسى ەڭبەك م.ر.ساعديەۆتىڭ رۋحىن بيىكتەتىپ, ارتىندا وشپەس ءىز قالدىرعان مۇرا رەتىندە مازمۇنى مەن ماعىناسى جاعىنان كەلەشەك ۇرپاققا, رەسپۋبليكامىزدىڭ جاستارىنا, ستۋدەنتتەر مەن وقۋشىلارىنا ءتالىم-تاربيەسىمەن بىرگە تىنىمسىز ەڭبەكتىڭ, قاجىماس قايراتتىڭ, شەشەندىكتىڭ, كىسىلىكتىڭ ۇلگىسى رەتىندە تاپتىرماس دۇنيە بولىپ شىقتى.
مەن دە بىرنەشە مارتە ماقاڭمەن كەزدەسىپ, اڭگىمەلەسكەن ءساتتەردى ەسكە ءتۇسىرىپ جانە بۇگىنگى ەلىمىزدىڭ ارداگەرلەر ۇيىمىنىڭ تىنىس-تىرشىلىگىنە تىكەلەي ارالاسىپ جۇرگەنىمدە ول كىسىنىڭ پاراساتتى بولمىسىنا, وتكەن يگى ءىستەرىنە ءتانتى بولعانمىن.
ماقتاي ساعديەۆ سەرتكە بەرىك, ادال مىنەزىمەن ەل بىرلىگىنە ساي تۋعان شىن مانىندەگى اقىلمان ساياساتكەر, بىلىكتى مەملەكەت جانە قوعام قايراتكەرى ەكەنىن دالەلدەپ ءوتتى. سول اسىلدىعىن پرەزيدەنت تە تانىدى, سىيلاي ءبىلدى.
ماقتاي ساعديەۆتىڭ دۇنيەدەن وزۋىنا بايلانىستى ەل پرەزيدەنتىنىڭ مارقۇمنىڭ وتباسى مەن تۋعان-تۋىستارىنا كوڭىل ايتۋ جەدەلحاتىندا: «ماقتاي رامازان ۇلى ۇزاق تا عيبراتتى عۇمىر كەشتى. ول ءارتۇرلى جوعارى لاۋازىمدى قىزمەتتەردى زور ابىرويمەن اتقارىپ, ءوزىنىڭ بار ءبىلىمى مەن ۇيىمداستىرۋشىلىق دارىنىن تۋعان ەلىنىڭ يگىلىگىنە جۇمسادى. قاي قىزمەتتە دە ءوزىن قاراپايىم, جان-جۇرەگى ادال ءارى ءىستىڭ كوزىن بىلەتىن بەدەلدى تۇلعا رەتىندە تانىتىپ, حالقىمىزدىڭ شىنايى قۇرمەتى مەن سۇيىسپەنشىلىگىنە ءبولەندى. ول كىسىنىڭ ەڭبەگى مەن جارقىن ديدارىن حالقىمىز ۇمىتپايدى» دەلىنگەن.
م.ر.ساعديەۆتىڭ ەرەن ەڭبەگى مەملەكەت تاراپىنان دا لايىقتى ءتۇردە باعالاندى. ول ءۇش رەت «ەڭبەك قىزىل تۋ», «لەنين», «وكتيابر رەۆوليۋتسياسى», «پاراسات» وردەندەرىمەن جانە دە كوپتەگەن مەدالدارمەن ماراپاتتالدى.
