«جاس قانات» مولتەك اۋدانىنداعى قۇرىلىس بارىسىن ارالاپ شىققان ب.ساعىنتاەۆ ءتيىستى باسقارمالارعا وتاندىق ونىمدەردى پايدالانۋ بويىنشا قۇرىلىس كومپانيالارىنا باقىلاۋدى كۇشەيتۋدى تاپسىردى.
اۋداندىق اكىمدىككە ب.حمەلنيتسكي كوشەسى بويىنداعى ايماقتى اباتتاندىرۋ, سكۆەردى ۇڭگىلەۋ, «جاس قانات» مولتەك اۋدانىنىڭ اۋماعىن قوسىمشا جاسىلداندىرۋ, سونىمەن قاتار قالالىق موبيلدىلىك باسقارماسىمەن بىرگە بايماعامبەتوۆ كوشەسىنەن جاڭا تۇرعىن ۇيلەرگە دەيىن جول سالۋ ماسەلەسىن شەشۋدى تاپسىردى.
«جاس قانات» مولتەك اۋدانىندا «نۇرلى جەر» باعدارلاماسى بويىنشا كوپاتەرلى جەتى تۇرعىن ۇيلەر, 280 ورىندى بالا باقشا سالىنۋدا. قۇرىلىس وبەكتىلەرىن بيىلعى جىلدىڭ قىركۇيەگىندە ىسكە قوسۋ جوسپارلانعان.
باقىتجان ساعىنتاەۆ تۇركسىب اۋدانىنىڭ تۇرعىندارىمەن كەزدەستى, تۇكش, اۋلالاردى اباتتاندىرۋ, قوعامدىق قاۋىپسىزدىكتى قامتاسىز ەتۋ بويىنشا ولار ايتقان شاعىمدار مەن ۇسىنىستاردى تىڭدادى. بۇگىنگى كۇنى تۇركسىب اۋدانىندا 16 ەسكى ءۇي ءسۇرىلىپ, ولاردىڭ ورنىنا 803 پاتەرلى 39 ءۇي سالىنعان. باعدارلامانى جالعاستىرۋ بويىنشا تاعى 28 ءۇي انىقتالدى, 147 اۋلا كۇردەلى جوندەلەدى, 15 كوشە جاڭارىپ, 8 كم تروتۋار, 2,6 كم ارىق جەلىسى (2 كوشە) سالىنىپ, ۇزىندىعى 7,8 كيلومەترگە اعىمداعى جوندەۋ جۇرگىزىلەدى.
بۇدان سوڭ قالا اكىمى «الماتى-1» تەمىرجول ۆوكزالىنىڭ جۇمىسىمەن تانىستى. ونىڭ بارىسىندا ب.ساعىنتاەۆقا ۆوكزال قايتا جوندەلسە, ونىڭ وتكىزۋ قابىلەتى تاۋلىگىنە 16 مىڭ جولاۋشىعا جەتەتىندىگى تۋرالى ايتىلدى. رەكونسترۋكتسيا كەزىندە پلاتفورما ۇزارادى, ەسكالاتور مەن ليفت ورناتىلىپ, جەر استى وتپەلى جولىنىڭ, كوپدەڭگەيلى پاريكنگە ءوتۋدىڭ كولەمى كەڭەيەدى.
باقىتجان ساعىنتاەۆ تۇركسىب اۋدانىنا جاساعان جۇمىس ساپارىن مۇمكىندىگى شەكتەۋلى بالالاردىڭ «مەيىرىم» رەابيليتاتسيالىق ورتالىعىنا بارۋمەن قورىتىندىلادى. ورتالىق ۇجىمى مامانداردىڭ بالالارعا كورسەتەتىن كوررەكتسيالىق-دامىتۋ ساباقتارى, پسيحولوگيالىق-پەداگوگيكالىق كومەكتەرى, ەمدىك دەنەشىنىقتىرۋ, الەۋمەتتىك-ەڭبەك رەابيليتاتسياسى, مۋزىكالىق, كوركەم, ويىن تەراپياسى تۋرالى ايتتى. ورتالىق تسەرەبرالدى سال اۋرۋىنا شالدىققان, قوزعالۋ مۇمكىندىكتەرى مەن دامۋ جاعىنان شەكتەلگەن 3 جاستان 15 جاسقا دەيىنگى بالالارعا ارنالعان.
