كىتاپ پالاتاسىنىڭ ديرەكتورى ءادىل قويتانوۆتىڭ ايتۋىنشا, قازاقستان جازۋشىلار وداعىنىڭ مۇشەسى بولىپ تابىلاتىن ءاربىر قالامگەردىڭ تەگىن ۆەب-سايتتارىن جاساپ بەرۋ جانە تەحنيكالىق قولداۋ كورسەتۋ, شىعارمالارىن ءبىر جەرگە جيناقتاپ, بىرتەكتى ەلەكتروندى بازاسىن قۇرۋدى ماقسات ەتەتىن جوبا اياسىندا كىتاپ پالاتاسىنىڭ ءباسپاسوز مۇراعاتى نەگىزىندە قالامگەرلەردىڭ تولىق بيبليوگرافيالىق انىقتامالىعى جاسالىپ, وقىرمانمەن, شەت ەلدىك جازۋشىلارمەن بايلانىستارىن دامىتۋ ماسەلەسى دە جوسپارلانىپ وتىر.
جاقىندا نۇر-سۇلتان قالاسىندا قر ۇلتتىق اكادەميالىق كىتاپحاناسىندا وتكەن جوبانى تانىستىرۋ راسىمىنە قر مادەنيەت جانە سپورت مينيسترلىگى ءتىل ساياساتى كوميتەتىنىڭ توراعاسى عالىمجان مەلدەش, سونداي-اق مىرزاتاي جولداسبەكوۆ, تولەن ابدىك, انەس ساراي, سەيىت قاسقاباسوۆ, ساۋىتبەك ابراحمانوۆ, قۋانىش جيەنباي, الىبەك اسقار سىندى زيالى قاۋىم وكىلدەرى قاتىسىپ, باتالارىن بەرىپ, قازىرگى زامانعى ادەبيەت تۋراسىندى اڭگىمە قوزعادى.
«تسيفرلى قازاقستان» باعدارلاماسى اياسىندا جۇزەگە اسىپ وتىرعان جاڭا جوبانىڭ ومىرشەڭ بولاتىندىعىنا زور سەنىمىن بىلدىرگەن قر مادەنيەت جانە سپورت مينيسترلىگى ءتىل ساياساتى كوميتەتىنىڭ توراعاسى عالىمجان مەلدەش «Smart qalamger» وتاندىق قالامگەرلەر شىعارمالارىنىڭ قالىڭ وقىرمانعا قولجەتىمدى بولۋىنا زور ىقپال ەتەتىنىن اتاپ ءوتتى. وسىعان وراي «كىتاپ وقۋ قالىپ بارادى» دەپ دابىل قاققان زيالى قاۋىمنىڭ ءوز شىعارمالارىن زامانا تالابىنا ساي ۇسىنا ءبىلۋى ماڭىزدى. جاھاندانۋ كەزەڭىندە ۋاقىتتىڭ كوشىنە ىلەسە بىلگەندە عانا وقىرمان اياسى كەڭەيا تۇسپەك. بۇل جوبا قولىنا سمارتفون ۇستاعان قازىرگى وقىرماننىڭ كىتاپ وقۋىنا, رۋحانيات دۇنيەسىنەن الشاقتاپ كەتپەۋىنە جاسالعان ماڭىزدى قادام.
قر ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ وسى شارا اياسىندا جازۋشىلارعا ارناپ جاسالعان ۆەب-سايتتارمەن تانىستىرىپ, سايت يەلەرىنە سەرتيفيكاتتار تابىس ەتسە, «اقپاراتتىق-تەحنولوگيالىق ورتالىعى» قوعامدىق قورىنىڭ پرەزيدەنتى قانات تاڭاتاروۆ جازۋشى قاۋىمىنىڭ جوبا تۋرالى سۇراقتارىنا جاۋاپ بەردى.
الماتى
