«مادەنيەت پورتالى» اشىق تۇردە وتكىزگەن ادەبي بايقاۋ ەكى ايعا جالعاسىپ, باس-اياعى 300-دەن استام اۆتور ءوز تۋىندىلارىن بايگەگە قوسقان. ساراپتاي كەلە 220-عا جۋىق قالامگەردىڭ شىعارمالارى بايقاۋ تالابىنا ساي كەلىپ, ءدۇيىم جۇرتتىڭ كوز الدىندا, ياعني ونلاين تۇردە باق سىنادى. بايقاۋدا وقىرمان قاۋىمعا كوركەم شىعارمالارىمەن تانىلىپ ۇلگەرگەن قالامگەرلەر عانا ەمەس, بەيتانىس جاس تالانتتار دا بوي كورسەتكەنىن ايتا كەتكەن ءجون. بايگە قورىتىندىسىنا كەلەتىن بولساق, «ۇزدىك ادەبي سىن» اتالىمى بويىنشا باعاشار تۇرسىنباي ۇلى مەن اينۇر نايمانباەۆا جۇلدەگەر اتانسا, تۇرسىنبەك باشار ساعات اشىمباەۆ اتىنداعى ارنايى سىيلىققا يە بولدى. «ۇزدىك پروزا» اتالىمى بويىنشا قانات تىلەۋحان, نۇرلان حاۆداي جۇلدەلى ورىندارداردان كورىنىپ, ميراس مۇقاش ساتتار ەرۋباەۆ اتىنداعى سىيلىققا قول جەتكىزدى.
«ۇزدىك پوەزيا» اتالىمىنىڭ جۇلدەسىنە قۋانىش وسپان مەن مارلەن عيلىمحان لايىق دەپ تانىلسا, ولجاس قاسىم ماعجان جۇماباەۆ اتىنداعى سىيلىقپەن ماراپاتتالدى.
پورتالدا ەڭ كوپ وقىلعان اقىن اقمارال قالپاقوۆا مەن «مەنىڭ قۇربىلارىم» رومان-مينياتيۋراسىنىڭ اۆتورى ايسۇلۋ المەشكە فاريزا وڭعارسىنوۆا اتىنداعى سىيلىق بەرىلدى. ال ادەبي بايقاۋدىڭ باس جۇلدەسىن قانجىعاسىنا بايلاعان مەملەكەتتىك «دارىن» جاستار سىيلىعىنىڭ يەگەرى, اقىن اقبەرەن ەلگەزەككە «سەمسەر» ادەبي سىيلىعى تابىستالىپ, ساقتاردان قالعان اق سەمسەر تارتۋ ەتىلدى.
ادەبي بايگە تۋرالى, اتالعان الامانعا قازىلىق ەتكەن مەملەكەتتىك سىيلىقتىڭ يەگەرى, جازۋشى الدان سمايىل ايتىپ بەردى. «بۇل ءوزى بۇرىن مەن كوپ كەزدەستىرمەگەن كونكۋرس بولىپ وتىر. بۇرىنعى ءداستۇرلى بايقاۋلار سياقتى ەمەس, اق كونۆەرتپەن پوشتامەن جىبەرە سالىپ, ول وقىلدى ما, وقىلمادى ما, ءتىپتى جەتەر جەرىنە جەتتى مە, جەتپەدى مە, بىلە الماي پۇشايمان بولىپ وتىراتىن. ونلاين ءارى اشىق تۇردە وتكەن سوڭ مۇندا ەشقانداي بارماقباستى, كوزقىستى ارەكەتتەر بولمادى. جەڭىمپاز اتانعان شىعارمالار ءادىل باعاسىن الدى دەپ ويلايمىن», دەدى ول.
ادەبي دودانىڭ باس دەمەۋشىسى – تابيعي رەسۋرستاردى ءوندىرۋ مەن وڭدەۋ, ەنەرگەتيكا, لوگيستيكا جانە ماركەتينگ سالالارىندا الەمدەگى ەڭ ءىرى ءارى تاراپتاندىرىلعان كومپانيالاردىڭ ءبىرى – Eurasian Resources Group (ERG) كومپانياسى ەكەنى اتاپ كەتكەن دۇرىس.
مارجان ءابىش,
«Egemen Qazaqstan»
