وتكەن اپتادا يندۋستريا جانە ينفراقۇرىلىمدىق دامۋ مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ ءبىرىنشى ۆيتسە-ءمينيسترى قايىربەك وسكەنباەۆ باستاعان جۇمىس توبى 17 سەكتور بويىنشا تەحنيكالىق تەكسەرۋ جۇرگىزىپ, ارىس قالاسىندا ۇيلەردىڭ, عيماراتتار مەن قۇرىلىستاردىڭ زاقىمدانۋ دارەجەسىن قاعازعا تۇسىرگەن بولاتىن. ارنايى كوميسسيا قالاداعى بارلىق ۇيلەردىڭ 85 پايىزى جوندەۋدى تالاپ ەتەتىنىن انىقتادى. وسىلايشا, 752 جۇمىسشىنىڭ قاتىسۋىمەن 80-نەن استام قۇرىلىس كومپانياسى شىلدەنىڭ شىلىڭگىر ىستىعىنا قاراماي, جۇمىستى باستاپ كەتتى.
بۇگىنگى تاڭدا شاھارداعى ب ۇلىنگەن 247 جەكە ءۇي جوندەلىپ جاتىر. 17 سەكتور بويىنشا العاش بولىپ جامبىل, قاراعاندى وبلىسىنىڭ قۇرىلىسشىلار توبى جۇمىسقا قىزۋ كىرىستى. الداعى ماقسات – ءبىر اي ىشىندە ويرانى شىققان ورتانى رەتكە كەلتىرىپ, تۇرعىنداردى ءبىرجولاتا قونىستاندىرۋ. ارىستىڭ تامىرىنا قايتا قان جۇگىرتۋ.
وسى ماقساتتى جۇيەلى جۇزەگە اسىرۋ ءۇشىن كەشە تۇركىستان وبلىسىنىڭ اكىمى ومىرزاق شوكەەۆتىڭ قاتىسۋىمەن ارىس قالاسىندا اپتالىق اپپارات ءماجىلىسى ءوتتى.
«حالىقتىڭ مۇڭ-مۇقتاجىن جەدەل شەشۋىمىز كەرەك», دەپ ءسوز باستاعان ومىرزاق ەستاي ۇلى قىسقا مەرزىمدە قالانى قالپىنا كەلتىرۋ, تۇرعىندارعا جاعداي جاساۋ باعىتىنداعى بارلىق ماسەلەنى تالقىلادى. ءارى وسى جاۋاپتى مىندەتتى وتانشىلدىقپەن, جاناشىرلىقپەن اتقارۋ كەرەكتىگىن ايتتى.
«ارىستا 1 اي بولىپ, قۇرىلىستى كۇندە باسىندا تۇرىپ قاداعالايمىن. ەگەر قاي اۋدان ۇيىمداستىرا الماسا, جاۋاپتىسىن جۇمىستان بوساتامىن. ال جاۋاپتى وبلىستار مەن قالالار سالعىرتتىق تانىتسا, ۇكىمەت باسشىسىنا مالىمدەيمىن. حالىقتىڭ مۇقتاجىن جەدەل شەشۋىمىز كەرەك», دەدى اكىم 17 سەكتوردىڭ جۇمىسىن جانداندىرۋ جونىندە تاپسىرما بەرىپ.
ءاربىر سەكتوردىڭ جۇمىسىن ءوڭىر اكىمدەرىنىڭ جانە اۋدان, قالا اكىمدەرىنىڭ ورىنباسارلارى جانە ارىس قالاسىنان ءبىر جاۋاپتى وكىل, جالپى سانى 51 ادام ۇيلەستىرەدى. جەكە-جەكە شتاب قۇرىپ, ۇيلەردىڭ قۇرىلىسى, گۋمانيتارلىق كومەك تاراتۋ, قاۋىپسىزدىكتى ساقتاۋ, قالانى تازارتۋ, تۇرعىنداردى اقپاراتتاندىرۋ جانە وزگە دە ماسەلەلەر بويىنشا كۇن سايىن مالىمەت بەرىپ وتىرادى.
اپپارات ماجىلىسىندە اتىراۋ, قاراعاندى, جامبىل, ماڭعىستاۋ, شقو وبلىستارى جانە نۇر-سۇلتان قالاسى اكىمىنىڭ ورىنباسارلارى مەن جاۋاپتى وكىلدەرىنىڭ مالىمەتتەرى تىڭدالدى. «سامۇرىق-قازىنا» ءال-اۋقات قورى مەن «اتامەكەن» ۇلتتىق كاسىپكەرلەر پالاتاسىنىڭ جاۋاپتى وكىلدەرى دە وزدەرىنە تاپسىرىلعان جۇمىستاردىڭ بارىسىن باياندادى. اۋدان اكىمىنىڭ ورىنباسارلارى دا ەسەپ بەردى.
بۇگىندە ارىس قالاسىنداعى ءۇيلەردى تەكسەرۋ, قۇرىلىس نىساندارىنىڭ جوبالىق-سمەتالىق قۇنىن ەسەپتەۋ جۇمىستارى جۇرگىزىلىپ جاتىر. كەيبىر ۇيلەردىڭ تەرەزەلەرى اۋىستىرىلا باستاعان. بارلىق سەكتور بويىنشا ۇيلەردى تەكسەرۋ, اكت تولتىرۋ جۇمىستارى اياقتالۋعا جاقىن. مەردىگەرلەر انىقتالىپ, قۇرىلىس بريگادالارى جاساقتالعان.
وبلىس اكىمى ومىرزاق شوكەەۆ قالاداعى كوپقاباتتى ۇيلەردىڭ شاتىرلارى, سىرتقى كورىنىسى جيناقى ءارى بىركەلكى بولۋى كەرەكتىگىن ەسكەرتتى. ازىق-ت ۇلىك ۇلەستىرۋ جانە وزگە دە جۇمىستاردى ۇيىمداستىرۋعا جەرگىلىكتى بەلسەندى تۇرعىنداردى تارتۋدى تاپسىردى. سونىمەن بىرگە قالانى اۋىز سۋمەن, ەلەكتر قۋاتىمەن ۇزدىكسىز قامتۋ, بالالاردى دەمالىس ورىندارىنا جىبەرۋ, ءورت قاۋىپسىزدىگىن ساقتاۋ, اتاۋلى الەۋمەتتىك كومەكتەردى ۋاقتىلى اۋدارۋ ماسەلەلەرى دە تالقىلانىپ, ناقتى جوسپارلار جاسالدى.
ارىستاعى قۇرىلىس جۇمىستارىنىڭ باستالۋىنا وراي قاجەتتى ماتەريالداردىڭ باعاسى وسە باستاعانى بايقالادى. اتالعان جاعدايدىڭ الدىن الۋ ءۇشىن وبلىس اكىمىنىڭ ورىنباسارى مەيىرجان مىرزاليەۆتىڭ توراعالىعىمەن باعانى ۇستاپ تۇرۋ ءۇشىن كاسىپكەرلەر مەن بازار باسشىلارىنىڭ باسىن قوسقان جيىن ءوتتى. ناتيجەسىندە ەكىجاقتى مەموراندۋمعا قول قويىلدى.
بۇگىنگى تاڭدا تۇركىستان وبلىسىندا قۇرىلىس ماتەريالدارىن ءوندىرەتىن 40-تان اسا كاسىپورىن جۇمىس ىستەيدى. اتالعان كاسىپورىندار نەگىزىنەن تەمىر-بەتون بۇيىمدارىن, ينەرتتى ماتەريالداردى, بيتۋم, اك جانە تسەمەنت وندىرەدى. قۇرىلىس ماتەريالدارىنىڭ 36 پوزيتسياسى بويىنشا تالداۋ جۇرگىزىلدى. ولار نەگىزىنەن ينەرتتى ماتەريالدار, تەمىر-بەتون بۇيىمدار, تسەمەنت, ارماتۋرا, بۇرىش, شۆەللەر, ارقالىقتار. ماتەريالداردىڭ 15 پوزيتسياسىن, ينەرتتى ماتەريالداردى, كۇيدىرىلگەن كىرپىشتەردى, تاۋارلىق بەتوندى, بيتۋم, تسەمەنت, ەلەكتر كابەلىن, مودۋلدىك قازانداردى نەمەسە قازاندىقتاردى جانە جيھازدى ءتۇركىستان وبلىسىنىڭ كاسىپورىندارى 100 پايىز قامتاماسىز ەتە الادى.
«قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ تۇركىستاندى تۇركى الەمىنىڭ رۋحاني ورتالىعىنا اينالدىرۋ جونىندەگى تاپسىرماسىنا وراي قازىرگى تاڭدا وبلىس كولەمىندە جۇمىس جۇرگىزىلىپ جاتقانى جۇرتشىلىققا ايان. وسى اتالعان تاپسىرمانى ورىنداۋ ءۇشىن تۇركىستان وبلىسى اكىمدىگى كاسىپكەرلەرمەن كەزدەسىپ وتىر», دەدى م.مىرزاليەۆ.
كەزدەسۋ ناتيجەسىندە, وبلىستاعى قۇرىلىس ماتەريالدارىن شىعاراتىن كاسىپورىن باسشىلارى باعانى كوتەرمەۋگە ۋادە ەتتى. قۇرىلىس كومپانيالارى ءوز كەزەگىندە, جەرگىلىكتى قامتۋدىڭ ۇلەسىن ارتتىرۋ ءۇشىن قۇرىلىسقا جەرگىلىكتى قۇرىلىس ماتەريالدارىن شىعاراتىن كاسىپورىنداردىڭ ونىمدەرىن پايدالاناتىنىن جەتكىزدى.
ارىس – تۇركىستان
