ارىسقا كەتكەن قوعامدىق كولىكتەردە شامامەن 5 جارىم مىڭعا تارتا ادام وتىرعىزىلعان. ماسەلەن, ورتالىق مەشىتتەن 15-كە تارتا قوعامدىق كولىكپەن 400-دەن اسا ءمىنىپ كەتتى. ول ازاماتتار وسى جەردەگى اعايىن-تۋىستارىنىڭ ۇيلەرىنەن كەلىپ, كەتىپ جاتقاندار بولاتىن. ارىسقا قايتۋشىلاردىڭ قاتارى ۋاقىت ساناپ وسۋدە. بۇدان باسقا وزدەرىنىڭ كولىكتەرىمەن كەتىپ جاتقان ازاماتتار دا بار.
«ول ازاماتتاردى ارىسقا بارعاننان كەيىن جاۋاپتى قىزمەتكەرلەر كۇتىپ الۋدا. وعان ارنايى بەكىتىلگەن قىزمەتكەرلەر بار. ولاردى وزدەرىنىڭ قونىستارىنا جايعاستىرىپ جاتىر. ءبىرىنشى كەزەكتى تاماق ماسەلەسى شەشىلگەن. سودان كەيىن ءۇيى قيراپ قالعان ازاماتتارعا ۋاقىتشا تۇرۋ ماسەلەسى دە شەشىلىپ جاتىر. ول ءۇشىن بارلىق قالا-اۋدان اكىمدەرى كۆارتالعا بولىنگەن. وسى ءتارتىپ بويىنشا ءتيىستى جۇمىستار جۇرگىزىلۋدە», دەيدى تۇركىستان وبلىسى اكىمىنىڭ كەڭەسشىسى ۇلاسبەك سادىبەكوۆ.
