ايماقتار • 27 ماۋسىم، 2019

قاراعاندىدا قوقىس جيناۋ الاڭقايلارى قايتا قۇرىلادى

303 رەت كورسەتىلدى

كەنشىلەر استاناسىنىڭ وڭتۇستىك-شىعىس شاعىن اۋدانىنداعى ۆولوچاەۆ كوشەسىنىڭ № 45 ءۇيىنىڭ اۋلاسىندا پلاستيكتەن جاسالعان ەۋروكونتەينەرلەر مەن تۇرمىستىق قالدىقتارعا ارنالعان تورلارى بار زاماناۋي قوقىس جيناۋ پۋنكتى اشىلدى.

بۇل قوقىس الاڭقايى جاقىن ماڭداعى وننان استام كوپقاباتتى ۇيلەرگە قىزمەت ەتەدى. تۇرعىندار ەندى قوقىستى سۇرىپتاۋعا داعدىلانا باستايدى. ەۋروكونتەينەرلەرمەن بىرگە مۇندا مەتالل، پلاستيك، كارتون جانە شىنى جينايتىن بولەك جاشىكتەر دە بولادى.

 «گوركومترانس» جشس-ءنىڭ باس ديرەكتورى مارات بيماعامبەتوۆ بۇل جوبانى ىسكە اسىرۋ جونىندەگى باستامانى مەملەكەتتىك-جەكەمەنشىك ارىپتەستىك اياسىندا كوتەرگەندەرىن ايتادى.

– باستى ماقسات – قىزمەت كورسەتۋ ساپاسىن جاقسارتۋ، قالانى تازا ەتۋ جانە ادامدارعا قوقىستى بولەك جيناۋ مادەنيەتىن ۇيرەتۋ. الاڭقايلاردى ءوز قاراجاتىمىزعا ورنالاستىرامىز. شىعىندار تاريفكە ەنبەيدى. ءبىر ەۋروكونتەينەر 85 مىڭ تەڭگە تۇرادى. بيلىك تاراپى بۇل جوباعا جەر ۋچاسكەسىن ءبولۋ جانە قاجەتتى ينجەنەرلىك كوممۋنيكاتسيالاردى تارتىپ بەرۋ سياقتى كومەك شارالارى ارقىلى قاتىسىپ جاتىر، – دەدى ول.

سونداي-اق، مارات بيماعامبەتوۆ 2019-2020 جىلدارى قالا بويىنشا ءدال وسىنداي 300 قوقىس جيناۋ پۋنكتىن سالۋ جوسپارلانعانىن ايتتى.

جاڭا ءتاسىل بويىنشا سۇرىپتالىپ جينالعان قوقىستىڭ قايدا جونەلتىلەتىنى دە الدىن الا شەشىلىپ قويىلعان. مىسالى قاراعاندىداعى قوقىس وڭدەيتىن زاۋىتتا پلاستيك شولمەكتەردەن سينتەتيكالىق تالشىقتاردى وندىرۋگە ارنالعان شيكىزات الىنادى. ول حوللوفايبەر ازىرلەيتىن رەسەيلىك زاۋىتتاردىڭ بىرىنە جىبەرىلەدى. كارتون مەن قاعاز قۇس فابريكالارىنىڭ تاپسىرىستارى بويىنشا جۇمىرتقاعا ارنالعان لوتوكتار شىعاراتىن جەرگىلىكتى وندىرۋشىگە جەتكىزىلەدى. شىنىدان جاسالعان زاتتاردى كوكشەتاۋداعى قايتا وڭدەۋ ىسىمەن اينالىساتىن فيرمانىڭ ءبىرى قابىلداپ الادى. سونىمەن قاتار، پلاستيك پەن پوليەتيلەندى ىسكە جاراتاتىن كومپانيالار دا قازىرگى ۋاقىتتا بەلگىلى بولعان.

«گوركومترانس» فيرماسى ءىس-ارەكەت اياسىن كەڭىتىپ، الداعى ۋاقىتتا كولىك پاركىن جاڭارتۋدى دا قولعا الماقشى. كومپانيا ەۋروكونتەينەرلەرگە لايىقتالعان جاڭا ۇلگىدەگى قوقىس تاسىعىش ماشيناسىن سىناپ كورمەكشى. ەگەر تەحنيكا سىناقتاپ ءساتتى ءوتىپ، ءوزىنىڭ ارتىقشىلىقتارىن كورسەتىپ جاتسا، وندا كاسىپورىن ولاردى ساتىپ الاتىن بولادى.


          

قاراعاندى وبلىسى


سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار