ۇلىقتاۋ راسىمىندە پرەزيدەنت: «تاعى ءبىر ماڭىزدى, حالىقتى مازالايتىن ماسەلە – جولداردىڭ ساپاسى. سول سەبەپتى اۆتوجولداردىڭ جاعدايىن جاقسارتۋ – ءبىزدىڭ نەگىزگى ماقساتتارىمىزدىڭ ءبىرى» دەگەن بولاتىن. شىندىعىندا, ەلىمىزدە جوندەۋ نەمەسە جاڭادان سالۋ جۇمىستارى كەشەۋىلدەپ جاتقان جولدار از ەمەس. سونداي جولداردىڭ ءبىرى – «نۇر-سۇلتان – پاۆلودار» باعىتى.
جۋىردا پاۆلودار وبلىسىنا جۇمىس ساپارىمەن بارعان يندۋستريا جانە ينفراقۇرىلىمدىق دامۋ ءمينيسترى رومان سكليار وسى اۆتوجولدىڭ شىدەرتى كەنتىنىڭ ماڭىنداعى ۋچاسكەسىنە اتباسىن ءتىرەگەن-ءدى. جۇمىستىڭ جاي-كۇيىن كوزىمەن كورگەن مينيستر مەرزىمىنەن تىم ۇزاققا سوزىلعان جول قۇرىلىسىن 3 اي ىشىندە بىتىرىڭدەر دەپ شۇعىل تاپسىرما بەردى.
2014 جىلى باستالعان «نۇر-سۇلتان – پاۆلودار» جول قۇرىلىسى 2017 جىلى پايدالانۋعا بەرىلۋگە ءتيىس بولاتىن. مينيستر ر.سكلياردىڭ «نۇر-سۇلتان – پاۆلودار» اۆتوبان جوباسىنىڭ ۋاقىتىندا اياقتالماي جاتقانى ءۇشىن حالىق الدىندا ۇيالاتىنىن دا جاسىرماعانى سوعان بايلانىستى.
– شەتەلدىك ءبىر مەردىگەر جوبانى جول ورتادا قالدىرىپ كەتتى نەمەسە جەرگىلىكتى كومپانيالار سىلبىر جۇمىس جاسادى دەپ جاۋاپكەرشىلىكتەن قاشۋىمىزعا بولماس. تاپسىرىس بەرۋشى مينيسترلىك تولىعىمەن جاۋاپ بەرۋگە ءمىندەتتى, – دەدى مينيستر.
ال جول قۇرىلىسىنا جاۋاپتىلار ماڭىزدى جۇمىستىڭ كەستەدەن كەشىكتىرىلۋىنە اۋەل باستان باستى سەبەپكەر دەپ «دەناراحسازكونستراكشن» اتتى يراندىق كومپانياعا كىنا ارتادى. بۇل كومپانيا پاۆلودار اۋماعىنداعى ۇزىندىعى 115 شاقىرىم بولاتىن ءۇش جول ۋچاسكەسىنە جاۋاپتى بولعان ەكەن. كومپانيا جۇكتەلگەن مىندەتتەمەنى ورىنداي الماعان سوڭ, جاسالعان كەلىسىمشارت بۇزىلىپ, قايتادان كونكۋرس ۇيىمداستىرىلعان.
– بىلتىر جولدىڭ ءبىراز بولىگى اشىلدى. بيىل قۇرىلىستى اياقتاۋعا 28 ملرد تەڭگە ءبولىندى. قازىر جۇمىس كەستەگە سايكەس جۇرگىزىلۋدە. جۇمىس از قالدى. قالقامان مەن پاۆلودار اراسىنداعى بىرنەشە ۋچاسكەدە قۇيىلعان بەتونداردىڭ ساپاسى سىنعا ىلىككەنى بەلگىلى. توسەۋ تەحنولوگياسى بۇزىلعانى ءۇشىن مەردىگەر كومپانيا جولدى ءوز قاراجاتىنا قايتا سالادى, – دەدى ر.سكليار.
«قازاۆتوجولدىڭ» جەرگىلىكتى فيليال باسشىلارى قىرۋار قاراجاتتى يگەرمەۋ جول سالۋشىلاردىڭ سىلبىرلىعىنان, سونداي-اق, قيىرشىق تاس پەن بيتۋم سياقتى ماتەريالدىڭ جەتىسپەۋىنەن دە بولدى دەپ كىنالايدى. كىنالىلەر انىقتالا جاتار. قالاي بولعاندا دا, مينيستر مەردىگەرلەردەن جولدى تەزىرەك اشۋدى تالاپ ەتىپ وتىر.
– جۇمىس كۇنىن ۇزارتىڭىزدار. ءبىر ۋچاسكەدە 54 تەحنيكا بىرلىگى جۇمىس ىستەيدى دەپ بەرىلگەن. الايدا, كوزبەن قاراعاندا ول تەحنيكانىڭ جارتىسى دا كورىنبەيدى. حالىققا 2, 3-ءشى مەردىگەرلەر اۋىستى, ەكى رەت تەندەر ءوتكىزىلدى دەپ تۇسىندىرە المايمىز. ناقتى مەرزىم بەلگىلەيىك. جۇمىستى 3 ايدا اياقتاۋدى تاپسىرامىن. قۇرىلىس كەستەسىن تۇزەتىڭىزدەر. قوسىمشا مەردىگەر الاسىزدار ما, قايتكەنمەن دە بيىل اياقتاۋىمىز قاجەت, جىلدامداتايىق, – دەدى ر.سكليار.
بۇل اۆتوجولدىڭ قۇرىلىسى 5 جىل بۇرىن باستالعانىن ايتتىق. سودان بەرگى ارالىقتا «قازاۆتوجول» اق-نىڭ وبلىستىق فيليالىنىڭ بىرنەشە باسشىسى اۋىسىپ ۇلگەردى. اراسىندا ءىستى بولعاندارى دا بار. نەگىزى, وسى باسشىلاردان ناقتى جاۋاپكەرشىلىك, حالىق الدىنداعى مىندەت پەن پارىز, تالاپ پەن ءتارتىپ تالاپ ەتىلۋى كەرەك ەدى. جوبا باستالعاندا «قازاۆتوجول» اق جەرگىلىكتى فيليالىن ەڭ الدىمەن ەرسىن ساريەۆ باسقاردى. الايدا, ول جوبانى اياقتاپ ۇلگەرمەي قىزمەتىنەن كەتتى. ودان كەيىن 2017 جىلى قايرات كارىباەۆ باسشىلىققا تاعايىندالعان-دى. ودان كەيىن 2018 جىلى نەبارى 2-3 اي ۋاقىت تىزگىن نۇرالى تويىمبەتوۆكە ءتيدى. قاراپ وتىرساق, اۆتوبان قۇرىلىسىن ابىرويمەن تاپسىرادى دەگەن باسشىلار ءبىر جىلعا جەتەر-جەتپەس ۋاقىتتا تاپسىرىلعان مىندەتتى ورىنداماي, كرەسلوسىمەن قوش ايتىسىپ كەتە بارادى.
قازىر جەرگىلىكتى فيليالدى اقىلبەك قابىلدين باسقارادى. وعان بۇل اۆتوجولدى 2019 جىلدىڭ سوڭىنا دەيىن اياقتاۋ مىندەتى جۇكتەلىپ وتىر. كەزىندە ينۆەستيتسيالار جانە دامۋ ءمينيسترى بولعان جەڭىس قاسىمبەك:
– «نۇر-سۇلتان – پاۆلودار» تاسجولىندا جاڭا مەردىگەرلەر جۇمىس ءىستەپ جاتىر. بارلىق پروبلەما وسى ۋچاسكەلەردەگى جۇمىستى اياقتاۋعا قاتىستى بولىپ وتىر. 2018 جىلى اتالعان ۋچاسكەنى اياقتاۋعا سوڭعى رەت قارجى بەرىلەدى, ياعني 2019 جىلدىڭ بيۋدجەتىندە بۇل جوباعا اقشا قاراستىرىلماعان. سوندىقتان نىسان 2018 جىلى تولىعىمەن پايدالانۋعا بەرىلۋگە ءتيىس, – دەگەنى ەسىمىزدە. الايدا مەرزىم تاعى شەگەرىلدى. 2018 جىلى پايدالانۋعا تاپسىرۋ جوسپارلانعان «نۇر-سۇلتان – پاۆلودار» تاسجولىنىڭ قۇرىلىسى مەردىگەرلەردىڭ جىبەرگەن ولقىلىقتارى سالدارىنان سوزىلىپ كەتكەنى حابارلاندى.
«نۇرلى جول» باعدارلاماسى اياسىندا قولعا الىنىپ, قۇرىلىسى ۇزاققا سوزىلعان تاعى ءبىر باعىت – «ورتالىق-شىعىس» اۆتوجول ءدالىزى. بۇل باعىتتاعى جولدىڭ جالپى ۇزىندىعى – 905 شاقىرىم, ونىڭ 420 شاقىرىمى پاۆلودار وبلىسىنىڭ اۋماعى ارقىلى وتەدى. «قازاۆتوجول» اق جەرگىلىكتى فيليالىنىڭ مالىمەتىنشە, بۇل اۋماق 15 ۋچاسكەگە بولىنگەن. قازىر 9-بولىكتە قۇرىلىس جۇمىستارى اياقتالىپ, 200 شاقىرىم جول پايدالانۋعا بەرىلگەن.
ءسوز باسىندا ايتىپ كەتكەنىمىزدەي, اۆتوموبيل جولى حالىقتىڭ تۇرمىس ساپاسىنا تىكەلەي اسەر ەتەتىن فاكتور. «نۇر-سۇلتان – پاۆلودار» تاسجولىنىڭ اشىلۋىن كۇتكەن حالىق جازدا شاڭى بۇرقىراپ, ويدىم-ويدىم بولىپ جاتاتىن جولمەن جۇرۋدەن ابدەن شارشادى. كولىك اپاتتارى دا كوپ بولادى. جۇرت قاشان اياقتالادى دەپ كۇتىپ وتىر.
پاۆلودار وبلىسى
