انالاردى قۋانتقان جاڭالىق بولدى
الەۋمەتتىك جەلىدەن مەملەكەت باسشىسى قاسىم-جومارت توقاەۆتىڭ كوپ بالالى وتباسىلاردىڭ جانە تاعى باسقا دا الەۋمەتتىك دەڭگەيى تومەن ازاماتتاردىڭ شاعىن نەسيەلەرىنە جەڭىلدىك قاراستىرۋ جونىندەگى جارلىعىن وقىپ قاتتى قۋاندىق. بۇل شىن مانىندە حالىققا جاسالعان زور قولداۋ, ۇلكەن كومەك. ەل باسشىلىعىنا كەلگەن جاڭا پرەزيدەنتىمىزدىڭ تۇرعىنداردىڭ ءال-اۋقاتىن جاقسارتۋعا جاساعان ناقتى تابىستى قادامى دەپ ەسەپتەيمىز.
ويتكەنى قازىرگى ۋاقىتتا نەسيەسى جوق ازاماتتار كەمدە-كەم. ءتۇبىنە ۇڭىلسەك, ازاماتتار نەسيەنى ءارتۇرلى سەبەپپەن الىپ جاتادى. تاپقان تابىسىن بانكتەردەگى قارىزىن وتەۋگە جۇمسايتىندار ءۇشىن جاڭا ءبىر ءۇمىتتىڭ ءساۋلەسى جىلت ەتكەندەي بولدى. كوپ بالالى انا رەتىندە بۇل شەشىمدى قۋانا قولدايمىن ءارى پرەزيدەنت قاسىم-جومارت توقاەۆقا ريزاشىلىعىمدى ءبىلدىرگىم كەلەدى. بۇل جەڭىلدىكتەر قاراستىرىلاتىن بولسا, ازدى-كوپتى تاپقان تابىسىمىزدى بالالارىمىزعا, وتباسىنىڭ يگىلىكتەرىنە جۇمسايتىن بولامىز.
كۇنى كەشە عانا ەلىمىزدىڭ ارىس قالاسىندا ورىن العان قيىن جاعدايعا پرەزيدەنتىمىز باستاپ, قالىڭ ەل قوستاپ قولداۋ تانىتتى. حالقىمىز ءوزىنىڭ اۋىزبىرشىلىگىن كورسەتىپ جاتىر. وسىناۋ يگى قادامدار ءساتتى جەمىسىن بەرىپ, حالقىمىزدىڭ جاعدايى جاقسارىپ جاتسا, ودان اسقان قۋانىش جوق. ەلدىڭ جاعدايىن ويلاپ, ناقتى قادامدارعا بەل شەشە كىرىسكەن پرەزيدەنت مىرزاعا كوپ بالالى انالاردىڭ ءبىرى رەتىندە العىسىمدى ايتامىن.
جازيرا قالدىباەۆا,
كوپ بالالى انا
الماتى
راحمەت سىزگە, پرەزيدەنت!
ۋادەدە تۇرۋ – ازاماتتىڭ پارىزى. پرەزيدەنتتىك ناۋقان كەزىندە قاسىم-جومارت توقاەۆ وزەكتى الەۋمەتتىك ماسەلەلەردى شەشۋگە ۋادە بەرگەن ەدى. مىنە, بۇگىن حالىققا بەرگەن سول ۋادە ورىندالىپ وتىر. پرەزيدەنتتىڭ «قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ تۋرالى» جارلىعى كوپتەگەن وتباسىلار ءۇشىن اقجولتاي جاڭالىق بولدى. سولاردىڭ قاتارىندا مەن دە بارمىن.
ءۇي سالۋ وڭاي ەمەس. اسىرەسە تۇراقتى قىزمەتى جوق, كوتەرمە جۇمىستارمەن عانا جان باعاتىن وتباسىلار ءۇشىن شاعىن بولسا دا ءۇي سالىپ الۋدىڭ ءوزى قيىن. بەس بالانىڭ اناسىمىن. ۇزاق جىلدار بويى پاتەر جالداپ كەلدىك. بالالار وسكەن سايىن پاتەر دە تارلىق ەتەدى. سوندىقتان باسىبايلى باسپانامىز بولسىن دەپ بار تاپقانىمىزدى ۇنەمدەپ, قۇرىلىس باستادىق. 2016 جىلى نەسيە الىپ, ءۇيىمىزدىڭ ىرگەتاسىن قالادىق. وتكەن جىلى تاعى دا نەسيە الۋعا ءماجبۇر بولدىم. جولداسىم جەكە ادامداردىڭ تاپسىرىسى بولعان كەزدە عانا قۇرىلىس جۇمىستارىن ىستەيدى. باسقا ۋاقىتتا بوس. ءوزىم بالا تاربيەسىمەن ۇيدە وتىرمىن. اي سايىن نەسيە تولەيتىن ۋاقىت كەلىپ قالعاندا قينالاتىنىمىز راس. مەملەكەت باسشىسىنىڭ اۋىر تۇرمىستىق جاعدايدا قالعان وتباسىلاردىڭ نەسيەسىن كەشىرۋ تۋرالى جارلىعى ءۇمىت وتىن تۇتاتتى. ەرتەڭگە دەگەن سەنىمىمىزدى وڭدادى. قازاق حالقى قانداي زاماندا دا جاقسىلىق پەن قامقورلىق جاساۋدىڭ ءباسىن بيىك قويعان. جاڭا عاسىردا دا وسى ءۇردىستىڭ ۇزىلمەگەنىنە كۋا بولىپ, انالىق ءجۇرەگىممەن شىن قۋانىپ وتىرمىن.
راحمەت سىزگە, پرەزيدەنت! ەلدىڭ مولشىلىقتا, باقىتتى, باقۋاتتى عۇمىر كەشۋى جولىنداعى بارلىق باستامالارىڭىزعا ريزاشىلىعىمدى ءبىلدىرىپ, تابىس تىلەيمىن!
ايگۇل تولەشوۆا,
كوپ بالالى انا
اتىراۋ
توبەمىز كوككە جەتكەندەي قۋاندىق
پرەزيدەنت قاسىم-جومارت توقاەۆتىڭ كوپ بالالى, جاعدايى تومەن وتباسىلاردىڭ قارىزىن ازايتۋ جونىندە ارنايى جارلىق شىعارعانىن ەستىپ, توبەمىز كوككە جەتكەندەي قۋانىپ وتىرعان جايىمىز بار. ءوزىم قالاداعى سوگرا ىقشام اۋدانىنداعى ساياجايدا 10 جىلداي تۇرىپ, جاقىندا عانا وبلىس اكىمىنىڭ قولىنان ەكى بولمەلى قىزمەتتىك پاتەردىڭ كىلتىن العان بولاتىنمىن. باسپانا كەزەگىنە 2012 جىلى تۇرعانبىز. 10 جىل بويى اۋماعى 12 شارشى مەتر ءبىر بولمەلى پاتەردى پانا قىلدىق. بالالارىمىزدىڭ الدى – 17-دە, ەڭ كەنجەسى – 3-تە. جولداسىم 100 مىڭ تەڭگە الادى, قولعا 84 مىڭى تيەدى, مەنىكى – 45 مىڭ تەڭگە. بالالارعا تيەسىلى اتاۋلى الەۋمەتتىك كومەك جاقىندا قولىمىزعا ءتيدى.
بۇگىندە نەسيەسى جوق قازاقستاندىق ساۋساقپەن سانارلىق شىعار. نەسيەنى قايبىر جەتىسكەننەن الادى؟! جاعدايى كەلمەگەننەن سوڭ, ايلىعى شايلىعىنا جەتپەگەننەن كەيىن الادى. كوپ بالالى وتباسىلاردىڭ اراسىندا دا نەسيە الىپ, ۋاقتىلى جابا الماي, باسىن تاۋعا دا, تاسقا دا سوعىپ, قينالىپ جۇرگەندەر از ەمەس. سوندىقتان مەملەكەت باسشىسىنىڭ بۇل جارلىعى كوپتەگەن وتباسىلارعا جاردەمىن تيگىزىپ, ولاردى قۋانىشقا بولەيتىنى انىق.
گۇلزات ءابدىراحمانوۆا,
«التىن القا» يەگەرى
وسكەمەن
ءسۇيىنشى حابارعا سەنە الماي وتىرمىن
مەملەكەتىمىزدىڭ باسشىسى قاسىم-جومارت توقاەۆتىڭ كوپ بالالى وتباسىلاردىڭ قارىزىن ازايتۋ جونىندەگى جارلىققا قول قويعانىن ەستىگەندە, ءتوبەم كوككە ەكى ەلى جەتپەگەندەي اسەردە قالدىم. ءدال مەنىكىندەي كۇيدى نەسيەنىڭ قارىزىنا بەلشەدەن باتقان تالاي انا باستان كەشىپ وتىر دەپ نىق ايتا الامىن. بۇل دەگەنىڭىز – حالىققا, كوپ بالالى وتباسىلارىنا جاسالعان ۇلكەن جاقسىلىق!
وسىدان ەكى جىل بۇرىن قىزدارىمدى وقىتۋ ءۇشىن بانكتەردىڭ بىرىنەن نەسيە العان ەدىم. قولىمىزداعى ازىن-اۋلاق مالدىڭ ارقاسىندا سول نەسيەنى زورعا دەگەندە جاۋىپ جۇرگەن جايىمىز بار ەدى. ەندى مىنا ءسۇيىنشى حاباردى ەستىپ, سەنەر-سەنبەسىمدى بىلمەي وتىرعانىمدى قاراساڭىزشى!
ارينە, بۇل جارلىقتىڭ جاي-جاپسارىمەن ءالى تولىق تانىسا قويعان جوقپىن. دەگەنمەن, بىزدەي كوپ بالالى وتباسىلارعا ايتەۋىر ءبىر شاراپاتى تيەتىنىنە كامىل سەنىمدىمىن.
ۇكىمەتىمىزدىڭ سوڭعى كەزدەرى كوپ بالالى جانە از قامتىلعان وتباسىلارىنا جاساپ جاتقان قامقورلىعىنا ريزا بولىپ جۇرگەن ءبىزدى مىنا قۋانىشتى حابار ءتىپتى ارقالاندىرىپ جىبەردى. حالىقتىڭ قامىن ويلاپ, قيىن جاعدايدا جۇرگەن قاراپايىم جاندارعا كومەك قولىن سوزىپ, قامقورلىق تانىتقان پرەزيدەنتىمىزگە العىسىم زور!
سالتانات ساعاتبەكقىزى,
كوپ بالالى انا
قاراعاندى وبلىسى,
اقشاعىل اۋىلى
