ايماقتار • 27 ماۋسىم، 2019

زارداپ شەككەندەرمەن كەزدەستى

185 رەت كورسەتىلدى

كەشە Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ تۇركىستان وبلىسىنىڭ ارىس قالاسىندا ورىن العان توتەنشە جاعدايعا بايلانىستى ايماققا ارنايى كەلدى. ساپار بارىسىندا ول قاۋىپسىز جەرگە كوشىرىلگەن تۇرعىندارمەن كەزدەسىپ، اپاتقا بايلانىستى قۇرىلعان وبلىستىق جەدەل شتابتىڭ جۇمىسىمەن تانىستى. سونداي-اق گۋمانيتارلىق كومەك بويىنشا وزگە وڭىرلەردەن كەلگەن زاتتاردى قارسى الۋ جۇمىستارىنا قاتىسىپ، زارداپ شەككەن اتا-انالارمەن جانە بالالارمەن جۇمىس ىستەپ جاتقان پسيحولوگ ماماندارمەن كەزدەستى.

م.اشىمباەۆ الدىمەن وبلىستىڭ ورداباسى اۋدانى تورەارىق اۋىلىنداعى تاۋكە حان مەكتەبىنە ات باسىن بۇردى. بۇل جەردە توتەنشە جاعدايدان زارداپ شەككەن ارىس تۇرعىندارىنىڭ ءبىر توبى ۋاقىتشا ورنالاستىرىلعان. ولارمەن كەزدەسكەن پارتيا توراعاسىنىڭ ءبىرىنشى ورىنباسارى اپاتتىڭ ايتىپ كەلمەيتىنىن نازارعا الىپ، جاعدايدىڭ باقىلاۋدا ەكەنىن جانە قالانى قايتا قالپىنا كەلتىرۋ جۇمىستارى جۇيەلى تۇردە جۇرگىزىلەتىنىن تىلگە تيەك ەتتى. سونداي-اق توتەنشە جاعدايدىڭ قازاقستان حالقى ءۇشىن ۇلكەن سىناق بولعانىن ايتىپ، بۇل سىننان دا سۇرىنبەي وتەتىنىمىزگە سەنىم ءبىلدىردى.

– بۇل توتەنشە جاعداي قازاق­ستان­دىقتاردى ودان ءارى بىرىكتىرىپ، ۇيىستىرا تۇسكەنىن كورىپ وتىرمىز. وسى جەردە ءوز ەركىمەن كەلىپ، قولداۋ كورسەتىپ جۇرگەن بەل­سەندى ازاماتتار دا وتە كوپ. بۇل – ءبىزدىڭ بەكەم بىرلىگىمىزدىڭ جارقىن كورىنىسى. ءبىزدىڭ كۇشىمىز – بىرلىكتە. سون­دىقتان بۇل سىننان دا مويىماي، ەڭسە­مىزدى تىك ۇستاپ شىعاتىنىمىزعا كامىل سەنەمىن، – دەدى م.اشىمباەۆ.

سونىمەن قاتار ول ورداباسى اۋدا­نى­نىڭ اقجول اۋىلىندا ورنالاسقان جەدەل شتابقا ارنايى كەلىپ، اتقارىلىپ جاتقان جۇمىس بارىسىمەن تانىستى. بۇل جەردە اپاتتىڭ زارداپتارىن جويۋ جۇمىستارىن ۇيلەستىرۋ ءىسى قولعا الىنعان.

قازىرگى تاڭدا ەلىمىزدىڭ بارلىق وڭىرىنەن ارىسقا قاراي گۋمانيتارلىق كومەكتەر اعىلىپ كەلىپ جاتقانى بەلگىلى. بۇل حالقىمىزدىڭ بىرلىگى مەن بىرتۇتاستىعىن كورسەتەدى. وسى ىستە Nur Otan پارتياسى دا بەلسەندى ارەكەت ەتۋدە.

– قازىرگى تاڭدا پارتيانىڭ باس­تاماسىمەن ەلىمىزدىڭ 9 وبلىسىنان گۋمانيتارلىق كومەكتەر كەلىپ جەتتى. الداعى ۋاقىتتا بۇل جۇمىستار ءارى قاراي دا جالعاسادى. ەندى ءبىز قۇرىلىس ماتەريال­دارىن جانە باسقا دا قالانى قالپىنا كەلتىرۋ جۇمىستارىنا قاجەتتى زاتتاردى جىبەرۋ ماسەلەسىن قاراستىرامىز، – دەگەن م.اشىمباەۆ زارداپ شەككەندەرگە كومەك رەتىندە اۋدارىلعان قاراجاتتىڭ اشىق ءارى ءادىل جۇرگىزىلەتىنىن ايتتى. سونداي-اق ول جاعدايدىڭ تۇراقتى جانە مەملەكەت باسشىسىنىڭ باقىلاۋىندا ەكەنىن دە تىلگە تيەك ەتتى.

ساپارىنىڭ سوڭىندا م.اشىمباەۆ شىمكەنت قالاسىنداعى م.اۋەزوۆ اتىنداعى وڭتۇستىك قازاقستان مەم­لە­كەت­تىك ۋنيۆەرسيتەتىنىڭ №5 جاتاقحاناسىنا كەلىپ، وسىندا ورنالاسقان بالالارمەن جۇمىس ىستەپ جاتقان پسيحولوگ ماماندارمەن كەزدەستى.

ايتا كەتەيىك، قازىرگى تاڭدا پارتيا جانىنداعى بالالار قۇقىعىن قورعاۋ جونىندەگى رەسپۋبليكالىق كەڭەستىڭ ماماندارى اپات بولعان ايماققا كەلىپ، اتا-انالار جانە بالالارمەن جۇمىس ىستەۋدە. پسيحولوگيالىق كومەكتەن بولەك، ولار كەڭەستىڭ ءموبيلدى شتابىن قۇرىپ، ايماقتاردان كەلگەن گۋمانيتارلىق كومەكتى جيناپ، تاراتۋ جۇمىستارىن ۇيلەستىرۋدە. كەڭەس جۇمىستارىنىڭ اياسىندا «نيەت» قوعامدىق قورى 2400 بالانى كيىم-كەشەكپەن قامتاماسىز ەتسە، «قاسيەتتى جول» قوعامدىق قورى ەرەكشە كۇتىمدى تالاپ ەتەتىن بالالارى بار وتباسىلاردى ۋاقىتشا تۇرعىن جايلارعا ورنالاستىردى.

 

تۇركىستان وبلىسى

 

سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

سوفيادان ولجالى ورالدى

سپورت • بۇگىن، 08:40

جاس تەننيسشىلەر جارادى

تەننيس • بۇگىن، 08:32

تۇتىنۋشى قۇقىعىن قورعايدى

قازاقستان • بۇگىن، 08:27

ۇقساس جاڭالىقتار