كۇنى كەشە مەملەكەت باسشىسى تاپسىرماسىنىڭ نەگىزىندە ۇكىمەت 28 ماۋسىمدى بۇقارالىق اقپارات قۇرالدارى قىزمەتكەرلەرى كۇنى رەتىندە رەسمي بەكىتىپ, قاۋلى شىعاردى. بۇل شەشىم ەلىمىزدىڭ الەۋمەتتىك-ەكونوميكالىق جانە قوعامدىق-ساياسي دامۋىن اقپاراتتىق تۇرعىدا قامتاماسىز ەتۋ ىسىندە وزىندىك ورنى بار جۋرناليستەر قاۋىمىنا ەرەكشە كوزقاراستىڭ بەلگىسى بولدى.
سالتاناتتى ءىس-شارادا مەملەكەت باسشىسى قاسىم-جومارت توقاەۆ جۋرناليستەردىڭ ەل ءومىرىندەگى رولىنە توقتالدى.
– بولاشاقتى – ساياساتكەرلەر, وتكەندى – تاريحشىلار, ال بۇگىنگىنى جۋرناليستەر ويلايدى دەگەن قاعيدا بار. بىراق, مەنىڭشە, جۋرناليستەر بولاشاقتى دا, وتكەندى دە ويلايتىن بىرەگەي قاۋىم دەپ ايتۋعا بولادى. حالىققا ەل ىشىندەگى وقيعالار جونىندە حابار تاراتىپ, شۇعىل ءارى شىنايى اقپارات بەرۋ – سىزدەردىڭ كاسىبي مىندەتتەرىڭىزدىڭ ارقاسى, – دەدى مەملەكەت باسشىسى.
قاسىم-جومارت توقاەۆ سونىمەن قاتار جۋرناليستەردىڭ ارىس قالاسىندا بولعان توتەنشە جاعدايدى ەلىمىزدىڭ تۇكپىر-تۇكپىرىنە دەر كەزىندە جەتكىزگەنىن اتاپ ءوتتى.
– بۇل ارينە بارشا حالىقتىڭ جانىنا باتقان وقيعا بولدى. وسىنداي جاۋاپتى ساتتە سىزدەر – وتاندىق باق وكىلدەرى بۇكىل قازاقستان جۇرتشىلىعى ارىستىق اعايىنمەن بىرگە ەكەنىن حالىققا جوعارى دەڭگەيدە جەتكىزە بىلدىڭىزدەر. بارلىق جۋرناليستەرگە العىسىمدى, ريزاشىلىعىمدى بىلدىرەمىن, – دەدى پرەزيدەنت.
پرەزيدەنت وزىق تەحنولوگيا زامانىندا مەديا سالانىڭ مۇمكىندىكتەرى وتە اۋقىمدى ەكەنىن جەتكىزدى. مەملەكەت باسشىسى جۋرناليستيكانىڭ جاڭا داۋىرىندە عالامتور جانە الەۋمەتتىك جەلىلەردىڭ ايرىقشا رولىنە توقتالىپ, اقپاراتتىڭ اشىق, جەدەل جانە قولجەتىمدى بولۋى جەتىستىكتىڭ باستى ولشەمدەرىنە اينالعانىن ايتتى.
– مەملەكەتتىڭ الەۋەتىن نىعايتۋ, ەكونوميكانى دامىتۋ, ازاماتتاردىڭ تۇرمىس ساپاسىن ارتتىرۋ – بۇگىندە ەلىمىزدىڭ الدىندا تۇرعان ماڭىزدى مىندەتتەر. وتاندىق مەديا-قاۋىمداستىقتىڭ سىندارلى نەگىزدە ۇيىسۋى, جۋرناليستەردىڭ بەلسەندى ازاماتتىق ۇستانىمى, ولاردىڭ كاسىبي دەڭگەيى ءجانە ادىلدىگى – اقپاراتتىق كەڭىستىكتەگى تابىستى جۇمىستىڭ نەگىزگى شارتتارى. مەملەكەت ءوز تاراپىنان باق-قا قولداۋ كورسەتە بەرەدى, – دەپ اتاپ ءوتتى قاسىم-جومارت توقاەۆ.
سونىمەن مەملەكەت باسشىسىنىڭ وكىمىنە سايكەس قازاقستان پرەزيدەنتىنىڭ سىيلىقتارى «جاس وركەن» جشس باس ديرەكتورى جۇسىپبەك قورعاسبەككە, «كومسومولسكايا پراۆدا – كازاحستان» گازەتىنىڭ باس رەداكتورى ۆيكتور كيانيتساعا, «انا ءتىلى» گازەتىنىڭ باس رەداكتورى جاناربەك اشىمجانعا, «استانا» تەلەارناسىنىڭ تالداۋشى-رەداكتورى جاينا جاقسىلىقوۆاعا تاپسىرىلدى. گرانتتارعا «حابار 24» تەلەارناسىنىڭ ءتىلشىسى راۋان مىڭباەۆ, «Qazaqstan» تەلەارناسىنداعى «ماسەلە» تالدامالىق باعدارلاماسىنىڭ جۇرگىزۋشىسى نارتاي سارسەنعاليەۆ, «قازاقستان» تەلەراديوكورپوراتسياسى ماڭعىستاۋ وبلىستىق فيليالىنىڭ شەف-رەداكتورى اسەم سارتباەۆا يە بولدى. ال ەل پرەزيدەنتىنىڭ العىسى «ەگەمەن قازاقستان» گازەتىمەن بىرگە, «ەكسپرەسس ك», «زناميا ترۋدا» جانە «شالقار» راديوسى شىعارماشىلىق ۇجىمدارىنا بەرىلدى.
بۇدان بولەك قاسىم-جومارت توقاەۆتىڭ العىس حاتتارىن «ايقىن» گازەتىنىڭ باس رەداكتورى نۇرتورە ءجۇسىپ, «حابار» تەلەارناسى تالدامالىق باعدارلامالار ءبولىمىنىڭ شەف-رەداكتورى الەكساندر ترۋحاچەۆ, «Qazaqstan» تەلەارناسىنىڭ جۇرگىزۋشىلەرى قىمبات دوسجان جانە دانا نۇرجىگىت, «حابار 24» تەلەارناسىنىڭ شەف-رەداكتورى شالقار قوجاەۆ, «Qazaqstan» تەلەارناسىنىڭ اقپاراتتىق-ساراپتامالىق باعدارلامالار ديرەكتسياسىنىڭ ديرەكتورى ەرلان اتامباي, «ليتەر» گازەتى باس رەداكتورىنىڭ ورىنباسارى جاننا ويشىباەۆا, «كتك» تەلەارناسىنىڭ باس ديرەكتورى ەلميرا دجاميلوۆا, سونداي-اق «قازاقپارات» حاا جانە «جەتىسۋ» تەلەارناسى الدى.
قازاقستان-رەسەي جانە قازاقستان-قىتاي ىنتىماقتاستىعىن نىعايتۋعا بەلسەندى اتسالىسقانى ءۇشىن بۇكىلرەسەيلىك مەملەكەتتىك تەلەۆيزيا جانە راديو حابارلارىن تاراتۋ كومپانياسى مەن «CCTV» حالىقارالىق تەلەارناسى قازاقستان پرەزيدەنتىنىڭ العىس حاتتارىمەن ماراپاتتالدى.
مەملەكەت باسشىسىنىڭ اتىنان ەلىمىزدىڭ بارلىق وڭىرلەرىنە ءجىبەرىلگەن العىس حاتتار ۇزدىك جۋرناليستەرگە سالتاناتتى تۇردە تابىس ەتىلەتىن بولادى.
