دانيار ساتىبالدين وبلىس ورتالىعىنان ءۇش ءجۇز شاقىرىمداي جەردە ورنالاسقان ايىرتاۋ اۋدانىندا تۇرادى. ون جىلدان بەرى جولاۋشى تاسىمالداۋمەن اينالىسىپ كەلەدى. ءوز ءىسىنە تياناقتى قاراپايىم ماماندىق يەسى جۋىردا «تەمىر تۇلپارىنىڭ» ءىشىن ارنايى اپپاراتۋرامەن, ەكرانمەن, ميكروفونمەن, اندەر جازىلعان كىتاپشامەن جابدىقتاپ, كاراوكە-تاكسيگە اينالدىردى.
«الىس جولعا شىققان جولاۋشىلارعا ءبىر ءسات بولسا دا كوڭىل كۇيىن كوتەرەتىن قۋانىش سىيلاعىم كەلدى. ويلاستىرا كەلىپ, وسى قىزمەت ءتۇرىن تاڭدادىم. كەز كەلگەن ءاندى جۇرەك قالاۋى بويىنشا تاڭداي الادى. ءوزىمنىڭ دە «ءاۋ» دەيتىن ونەرىم بار. قوسىلىپ تا ايتاتىن كەزىمىز بولادى. ءان شىرقاۋ تاسىمال قۇنىنا ەش اسەر ەتپەيدى. باستاپقىدا مەنىڭ بۇل «اپەندى» قىلىعىما تاڭىرقاي قاراۋشىلار قازىر ۇيرەنىسىپ كەتتى», دەيدى دانيار.
ونىڭ ايتۋىنشا, اسكەري قىزمەتكەرلەر «وفيتسەرى» ءانىن, جاستار «نەنسي» توبىنىڭ تۋىندىلارىن ورىنداعاندى ۇناتادى. «زەلەنوەگلازوە تاكسي» ءانى دە ءجيى شىرقالاتىن كورىنەدى. ءشامشىنىڭ اندەرىن قالايتىندار دا از ەمەس.
كاراوكە-تاكسيستىڭ ەندىگى ويى – شاعىن اۆتوبۋس ساتىپ الىپ, وسى قىزمەت ءتۇرىن جەتىلدىرۋ.
سولتۇستىك قازاقستان وبلىسى
