قازاقستاننىڭ تۇڭعىش پرەزيدەنتى ن.نازارباەۆ اگروونەركاسىپ كەشەنىن تابىستى دامىتۋ ماقساتىنداعى وتكەن جىلى تاپسىرماسىنا وراي «اۋىل – ەل بەسىگى» ارنايى جوباسى ازىرلەنگەن بولاتىن. باعدارلاما بويىنشا 2022 جىلعا قاراي ەڭبەك ونىمدىلىگى مەن وڭدەلگەن ءونىم ەكسپورتىنىڭ كولەمىن 2,5 ەسەگە ارتتىرۋ مىندەتى قويىلدى. ەلىمىزدىڭ اۋىل شارۋاشىلىعى مينيسترلىگى «اۋىل – ەل بەسىگى» ارنايى جوباسى اياسىندا ءبىرىنشى كەزەكتە تاڭدالعان اۋىلدىق ەلدى مەكەندەردى ولاردىڭ سالاسىنا جانە قولدا بار رەسۋرستارىنا, ەگىستىكتەرى مەن جايىلىمدارىنا, ينفراقۇرىلىمدارىنا قاراي دامىتۋدى جوسپارلاپ وتىر.
ۇلتتىق ەكونوميكا مينيسترلىگى ايماقتارمەن بىرلەسە وتىرىپ اۋىلدىق اۋماقتاردى جاڭعىرتۋ بويىنشا جۇمىستاردى قولعا العان بولاتىن. اۋىلدىق ەلدى مەكەندەردىڭ الەۋمەتتىك جانە ينجەنەرلىك ينفراقۇرىلىمىن دامىتۋعا, قابىلدانعان وڭىرلىك ستاندارتتارعا سايكەس اۋىل تۇرعىندارىنىڭ الەۋمەتتىك يگىلىكتەر مەن قىزمەتتەرگە قول جەتكىزۋىن قامتاماسىز ەتۋگە قارجى بولىنەتىن بولادى.
«اۋىل – ەل بەسىگى» جوباسىن ىسكە اسىرۋ اياسىنداعى شارالارعا الداعى ءۇش جىلدا رەسپۋبليكالىق بيۋدجەتتەن 90,0 ملرد تەڭگە, ونىڭ ىشىندە 2019 جىلى 30,0 ملرد تەڭگە ءبولىندى.
كوميتەت مۇشەلەرى تاراپىنان «اۋىل – ەل بەسىگى» ارنايى جوباسىن مينيسترلىكتەردىڭ باسقا مەملەكەتتىك باعدارلامالارى مەن جوبالارىمەن ۇيلەستىرۋ, جوباعا قاتىسۋشى ەلدى مەكەندەردى تاڭداۋ تالاپتارىن جەتىلدىرۋ, ايماقتىق ەرەكشەلىكتەردى ەسەپكە الۋ قاجەتتىلىگى تۋرالى ۇسىنىستار ايتىلدى.
