ماحامبەت سىيلىعىنىڭ يەگەرى, بەلگىلى اقىن سۆەتقالي نۇرجان باستاعان قازىلار القاسى مۇشايراعا تۇسكەن 100-گە جۋىق ولەڭگە باعا بەردى. جىر دوداسىنىڭ قورىتىندىسىندا جۇلدەلى ءۇشىنشى ورىندى توقتارالى تاڭجارىق, دينارا مالىك, جانەركە عينايات يەلەندى. ەكىنشى ورىننىڭ تۇعىرىنان باتىرحان سارسەنحان, اسىلانبەك شىعىروۆ كورىندى. ءبىرىنشى جۇلدەنى قالقامان سارين ەنشىلەدى. فاريزا وڭعارسىنوۆانىڭ وتباسى اتىنان ۇلى الماس وڭعارسىنوۆ پەن نەمەرەسى الان ايۆار ۇلى جاس اقىن ارايلىم جاقسىلىققا ارنايى جۇلدە تاپسىردى.
ءمۇشايرانىڭ باس جۇلدەگەرى - ميراس اسانعا ماراپاتتى اتىراۋ وبلىسىنىڭ اكىمى نۇرلان نوعاەۆ تاپسىردى.
- بۇگىنگى ولەڭنىڭ تويى – اقىن تويى اتىراۋ ەلىندەگى شىمىلدىعىن اشقالى وتىر. قازاقتا «الۋان-الۋان جۇيرىك بار, الىنە قاراي شابادى» دەگەن جاقسى ءسوز بار. جازبا پوەزيا وكىلدەرىنىڭ قاتىسۋىمەن وتكەن بۇل بايقاۋ شىن مانىسىندەگى تالانتتى جاستاردىڭ كەلەشەگىنە قانات بىتىرەدى دەگەن ويدامىز. اسا كۇردەلى, جۇمباق, اسقاق اقىننىڭ ولەڭدەگى بەينەسىن جاساۋعا تالپىنىس بىلدىرگەن 100 – گە تارتا ۇمىتكەردىڭ اراسىنان وزىق شىققاندار بۇگىن فاريزا وڭعارسىنقىزى تۋعان جەرگە كەلىپ وتىر. فاريزا اپامىز جۇزدەگەن جاس تالانتتى قاناتىنىڭ استىنا العان قامقور ۇستاز بولدى. ول تۇساۋىن كەسكەن كوپتەگەن جاستار بۇگىندە قازاق ادەبيەتىنىڭ بەلگىلى وكىلدەرىنە اينالىپ ۇلگەردى - دەپ اتاپ ءوتتى ايماق باسشىسى نۇرلان نوعاەۆ.
اتىراۋ وبلىسى اكىمدىگى, وبلىستىق مادەنيەت, ارحيۆتەر جانە قۇجاتتاما باسقارماسىنىڭ قولداۋىمەن قازاقستان جازۋشىلار وداعى وبلىستىق فيليالى, «رۋحانيات» جاستار قوعامدىق بىرلەستىگى ۇيىمداستىرعان رەسپۋبليكالىق ءمۇشايرا فاريزا وڭعارسىنوۆانىڭ شىعارماشىلىعىن دارىپتەۋدى, جاس تالانتتارعا قولداۋ كورسەتىپ, جاڭا ەسىمدەردى شىعارۋدى ماقسات ەتتى.
ءمۇشايرانىڭ باس جۇلدەسىن يەلەنگەن بەلگىلى اقىن, «ەگەمەن قازاقستاننىڭ» ءبولىم مەڭگەرۋشىسى ميراس اساندى ارىپتەستەرى اتىنان قۇتتىقتاپ, بيىك بەلەستەردى باعىندىرا بەرۋىن تىلەيمىز.
