- تۇركىستان وبلىسىنداعى قايعىلى وقيعا تۋرالى ءبارىمىز دە حاباردارمىز. 40 مىڭنان استام زارداپ شەككەندەر بۇگىندە ۇيىنە ورالا الماي وتىر. جاپونياداعى اتوم ەلەكترستانتسياسىنداعى اپات كەزىندە قازاقستان ءبىزدىڭ حالقىمىزعا ولشەۋسىز كومەك, قولداۋ كورسەتتى. ءبىز ونى ۇمىتقان جوقپىز, سوندىقتان زارداپ شەككەندەرگە قولىمىزدان كەلگەنشە كومەكتەسەمىز دەگەن نيەتتەمىز,-دەدى «Tokyo Rope Almaty» جشس-ءنىڭ باس ديرەكتورى تاكەياما توشيو.
ءوڭىر باسشىلىعىمەن كەزدەسۋ كەزىندە جاپون ينۆەستورلارى ەكى جاقتى ىنتىماقتاستىق ماسەلەلەرىن تالقىلادى. كۇنشىعىس ەلىنىڭ بيزنەس – كومپانيالارىنىڭ اتىراۋ وڭىرىنە قىزىعۋشىلىق تانىتۋىنىڭ سەبەبى – قازاقستاننىڭ مۇناي-گاز سالاسىنداعى نەعۇرلىم ءىرى جوبالارى وسىندا شوعىرلانعان. ءوڭىردىڭ ينۆەستيتسيالىق مۇمكىندىكتەرىمەن تانىسۋ ءۇشىن اتىراۋعا «Metal One Corporation», «Metal One Steel Products Corporation» جانە باسقا دا كومپانيالاردىڭ باسشىلىعى كەلدى.
الەم بويىنشا بولات ونىمدەرىن وڭدەيتىن 160 جاپوندىق جانە شەتەلدىك كومپانيالارىمەن جۇمىس ىستەيتىن «Metal One Corporation» كومپانياسى بولات ديستريبيۋتسياسى سالاسىندا كوشباسشى.
«MetalOneSteelProductsCorporation» جالپىۇلتتىق كولەمدە سىم شىبىقتارىن, ارنايى بولات جانە توت باسپايتىن بولات شىعارۋمەن اينالىسادى.
وبلىس اكىمى نۇرلان نوعاەۆ ينۆەستورلاردى ءوڭىردىڭ ينۆەستيتسيالىق مۇمكىندىكتەرىمەن تانىستىرىپ, ەلباسىنىڭ, پرەزيدەنتتىڭ ەل ەكونوميكاسىنا ينۆەستيتسيالار تارتۋعا زور ماڭىز بەرىپ وتىرعانىن اتاپ ءوتتى. «ءبىز ءتيىمدى قارىم-قاتىناس ءۇشىن قاجەتتى بارلىق جاعدايدى جاسايمىز, ەكىجاقتى ىنتىماقتاستىڭ الەۋەتى زور»,-دەپ ءوڭىر باسشىسى اتاپ ايتتى.
جاپوندىق ينۆەستورلار ءونىم وندىرەتىن ءوز زاۋىتىن سالۋدى جوسپارلاپ وتىر. جۇمىس ساپارى كەزىندە ولار بولاشاق قۇرىلىستىڭ الاڭشاسىن قارايدى. سونداي-اق, يندۋستريالدىق مۇناي حيمياسى تەحنوپاركىنىڭ جۇمىسىمەن تانىسادى.
