ءمينيستردىڭ ايتۋىنشا, ەلىمىزدەگى كريمينوگەندىك جاعداي وتكەن جىلدارداعىدان ەش وزگەرىسسىز – تۇراقتى. ە.تۇرعىمباەۆ بۇل تۇراقتىلىقتى ناقتى تسيفرلارمەن ولشەپ بەردى. جىل باسىنان بەرى قىلمىس سانى 9 پايىزعا ونىڭ ىشىندە, اسا اۋىر قىلمىس – 7,7 پايىزعا, اۋىرلىعى ورتاشا قىلمىس – 12,4 پايىزعا جانە اۋىر ەمەس قىلمىس سانى 4,7 پايىزعا ازايعان.كىسى ءولتىرۋ, قاراقشىلىق شابۋىل, توناۋ, ۇرلىق, بۇزاقىلىقتار دا تومەندەگەن. سونىمەن قاتار ءجاسوسپىرىمدەر تاراپىنان, ماس كۇيىندە جاسالعان جانە اتىس قارۋىن قولدانعان قىلمىستاردىڭ سانى دا قىسقارعان.
– بيىلعى جىل مينيسترلىك ءۇشىن – ەرەكشە جىل. ەلباسى مەن مەملەكەت باسشىسىنىڭ تاپسىرماسى بويىنشا ءبىز سالانى جاڭعىرتۋ باعىتتارىندا ءبىرشاما جۇمىس جۇرگىزىپ جاتىرمىز, – دەدى ە.تۇرعىمباەۆ.
ءمينيستردىڭ پىكىرىنشە, بىرىنشىدەن, سالانى جاڭعىرتۋ قوعاممەن ءوزارا ءىس-قيمىلدى جاقسارتۋدان, پوليتسيا قىزمەتىنىڭ اشىقتىعى مەن ايقىندىلىعىن قامتاماسىز ەتۋدەن, سەرۆيستىك ۇلگىگە كوشۋدەن قۇرالادى.
سالا باسشىسى پوليتسيا دەپارتامەنتتەرىنىڭ باسشىلارىنا حالىققا ەتەنە جاقىن بولۋدى دا بۇيىرعان. ەندى پوليتسيانىڭ جوعارى شەندىلەرى تۇرعىندارمەن كوشەلەردە, الاڭداردا كەزدەسۋ وتكىزۋلەرى ءتيىس.
ە.تۇرعىمباەۆ حالىققا ەسەپ بەرۋ بارىسىندا بيىل ۇرلىقتىڭ 12 پايىزعا ازايعانىن ايتتى. الايدا, باسقا قىلمىسقا قاراعاندا ۇرلىقتىڭ ۇلەسى ءالى دە باسىم – 65 پايىز. ونىڭ ىشىندە قالتا ۇرلىعى, اۆتوكولىكتەر مەن ۇيالى تەلەفون ۇرلىعىنىڭ كورسەتكىشى جوعارى.
ەسەپ بەرۋ جيىنىنىڭ بارىسىندا مينيستر جولداعى قاۋىپسىزدىكتى قامتاماسىز ەتۋ, جاز ايلارىندا سۋعا كەتۋدىڭ الدىن الۋ, قىلمىستىق اتقارۋ جۇيەسىن تسيفرلاندىرۋ, ءىىم ورگاندارىن وڭتايلاندىرۋ, ۆەدومستۆوعا قاراستى وقۋ ورىندارىن جەتىلدىرۋگە بايلانىستى جاڭاشىلدىقتاردى جاريا ەتتى.
– ەلباسىنىڭ تاپسىرماسى نەگىزىندە ىشكى ىستەر ورگاندارىن 2019-2021 جىلدارى جاڭعىرتۋ بويىنشا جول كارتاسى ءازىرلەنىپ, العاشقى كەزەڭدە ءبىرشاما قۇرىلىم تاراتىلدى. ونىڭ ىشىندە, 105 ءبولىمشەسى تاراتىلىپ, ورگاندار مەن قۇرىلىمدىق بولىمشەلەر سانى 10 مىڭ بىرلىككە قىسقاردى. ارتىق دەپ تانىلعان باسقارۋشىلىق بولىمدەر قىسقارتىلىپ, 1180 باسشىلىق لاۋازىم جويىلدى. وسى وزگەرىستەردىڭ ارتىنشا 100 مىڭ حالىققا ەسەپتەگەندە پوليتسيا قىزمەتكەرلەرىنىڭ سانى 471-دەن 393-كە ازايدى. وڭتايلاندىرۋدان تۇسكەن قاراجات پاترۋلدىك پوليتسيا قىزمەتكەرلەرىنىڭ ايلىعىن 65 پايىزعا, جەدەل ۋاكىلدەر مەن تەرگەۋشىلەردىڭ ايلىعىن 55 پايىزعا, ۋچاسكەلىك پوليتسەيلەر مەن جوو مۇعالىمدەرىنىڭ ايلىعىن 25 پايىزعا, وزگە دە قىزمەتكەرلەردىڭ ايلىعىن 20 پايىزعا ارتتىرۋعا جۇمسالادى, – دەدى ە.تۇرعىمباەۆ.
وتكەن جۇما كۇنى ىشكى ىستەر مينيسترى حالىققا ەسەپ بەرۋ كەزدەسۋىنىڭ قورىتىندىسى بويىنشا ورتالىق كوممۋنيكاتسيالار قىزمەتى ۇيىمداستىرعان بريفينگتە وسى ءىس-شارانىڭ قورىتىندىلارىن جاريالاپ, جۋرناليستەردىڭ ساۋالدارىنا جاۋاپ بەردى.
