...تالدىقورعان اۋەجايىنان ساپار شەككەن جولاۋشىلار ۇشاققا وتىرعىزۋ باستالعان ۋاقىتتا ءاردايىم جىلى جۇزبەن ءسات-ساپار تىلەپ تۇرعان وقالى جاعالى پوليتسەيدى ءجيى جولىقتىرادى. بۇل كىسى پوليتسيا پولكوۆنيگى, تالدىقورعان قالاسى اۋەجايىنداعى جەلىلىك پوليتسيا ءبولىمشەسىنىڭ باسشىسى تورەحان ءبۇتىنشىنوۆتىڭ ءوزى ەدى.
– پوليتسەيدىڭ ءبىر اتى – ساقشى عوي. دەمەك, ءبىز ادامداردىڭ ءومىرىن ساقتاۋشىمىز. قاۋىپ-قاتەردەن, ۇرى-قارىدان, جامان نيەتتىلەردەن ساقتاندىرۋشىمىز. قوعامداعى ءتارتىپتى ساقتاۋدا دا ساق بولۋىمىز كەرەك. مەنىڭ ويىمشا, ءار قازاق پوليتسەيى وسى ۇستانىممەن جۇمىس ىستەۋى ءتيىس. سوندا ەلدىڭ قۇرمەتىنە بولەنەسىڭ, سەنىمىنە يە بولاسىڭ, دەيدى پولكوۆنيك.
تورەحان ءبۇتىنشىنوۆ بۇل جەلىلىك پوليتسيا بولىمىندە ۇزاق جىلدان بەرى قىزمەت اتقارىپ كەلەدى ەكەن. قازىر اۋەجايداعى تىرلىك قىزۋ. ال ءبىر كەزەڭدەردە تالدىقورعاننىڭ وسى اۋەجايى ۇشاق تۇگىلى, قۇس قونبايتىنداي كۇيگە تۇسكەن-ءدى. تاۋەلسىزدىكتىڭ العاشقى جىلدارىندا وبلىس تاراپ, جۇرت جاپپاي كوشىپ جاتقان تۇستا مەملەكەتتىڭ نىق شەگەسى, قالانىڭ التىن بوساعاسى سياقتى بولعان اۋەجايدى تالان-تاراجعا سالۋدان قورعاپ, سىنىق شەگەسىن دە كوزدىڭ قاراشىعىنداي ساقتاپ قالۋعا تىرىسقان ءتارتىپ ساقشىلارىنىڭ قاتارىندا تۇردى.
– اۋەجاي قالانىڭ اسپاننان اشىلعان قاقپاسى عوي. قاراساڭىز, ۇيىنە اسىققان جۇزدەگەن ادام, ءجۇرەگىن قۋانىش كەرنەگەن قانشاما تاعدىر ساعىنىشىن باسىپ, تۋعان قالاسىنا ورالىپ كەلەدى نەمەسە ءۇمىت پەن ارمان جەتەلەگەن جاستار, قىزمەتىنە اسىققان جاندار جان-جاققا ۇشىپ كەتىپ جاتادى. مۇنى سەزىنە ءبىلۋ كەرەك. مەن قولاستىمداعى قىزمەتكەرلەرىمە ۇشاق قوناتىن, ۇشاتىن ۋاقىتتا جولاۋشىلاردىڭ ورتاسىنا شىعۋدى ادەتكە اينالدىرىڭدار دەيمىن, بىرەۋدىڭ جۇگىن كوتەرىس, بىرەۋگە اق جول تىلە. ەسەسىنە جۇرت ريزا. الگىندەي سەزىمدى باستان كەشەسىڭ, ادامداردىڭ ريزاشىلىعىن الاسىڭ. جۇمىسقا دا قىراعى قارايسىڭ, دەيدى كەيىپكەرىمىز.
بۇگىندە الماتى وبلىسىنداعى تۋريستىك ماۋسىم قىزعان شاعىندا. تالدىقورعان اۋەجايىنان نۇر-سۇلتان, الماتى قالالارىنا تىكەلەي قاتىنايتىن اۋە كەمەلەرىنەن بولەك, الاكول جاعالاۋىنداعى ءۇشارال قالاسىنىڭ اۋەجايىنا بەت العان جولاۋشىلار ۇشاعى جەتىسۋ اسپانىنان كۇنارا قالىقتاپ وتەدى. وسى جولاۋشىلاردىڭ قاۋىپسىزدىگىن قامتاماسىز ەتۋ – پولكوۆنيك تورەحان ءبۇتىنشىنوۆ باسقاراتىن جەلىلىك پوليتسيا بولىمشەسىنىڭ تىكەلەي مىندەتى.
– جالپى, ىشكى ىستەر مينيسترلىگىنىڭ كولىكتەگى پوليتسيا دەپارتامەنتىنە قاراستى ۇشتوبە جەلىلىك پوليتسيا ءبولىمىنىڭ مىندەت جۇگى سالماقتى. ءبولىمنىڭ قىزمەت كورسەتۋ اۋماعىنا اقتوعاي تەمىر جول ستانساسى مەن سارىوزەك بەكەتىنە دەيىن جانە تالدىقورعان – قارابۇلاق – تەكەلى تارماعىن قوسقاندا 500 شاقىرىمنان استام تەمىر جول بويى مەن تالدىقورعان قالالىق اۋەجايى كىرەدى. نەگىزگى جۇمىسىمىز 7 اۋداننىڭ اۋماعىن قامتيدى. ءبىز ءوز قىزمەتىمىزدە تەمىر جول كولىگىمەن تاسىمالداناتىن جۇكتىڭ ساقتالۋى مەن پويىزداردىڭ, ۇشاقتاردىڭ قاۋىپسىزدىگىن قامتاماسىز ەتەمىز. زاڭسىز ەسىرتكى بيزنەسىمەن كۇرەسۋ دە ءبىزدىڭ پارىز. قازىر «قۇقىق بۇزۋشىلىققا مۇلدەم توزبەۋشىلىك» قاعيداتىن باسشىلىققا الا وتىرىپ, ازاماتتاردىڭ قۇقىقتىق مادەنيەتىن كوتەرۋگە دە كۇش سالىپ وتىرمىز. بۇل – پوليتسيانىڭ قىلمىستىڭ الدىن الۋ, ونىمەن كۇرەسۋ جۇمىسىن جەتىلدىرىپ قانا قويماي, قوعامدى ىزگىلەندىرۋگە باستايدى, دەيدى پوليتسيا پولكوۆنيگى, تالدىقورعان قالاسى اۋەجايىنداعى جەلىلىك پوليتسيا بولىمشەسىنىڭ باسشىسى تورەحان ءبۇتىنشىنوۆ.
