قاسىم-جومارت كەمەل ۇلى ەلىمىزدىڭ وركەندەۋ جولىنا ورەلى ۇلەس قوسقان وتە تاجىريبەلى ساياساتكەر. مۇنى ول كىسىنىڭ ۇكىمەت باسقارعان كەزدەگى, باسقا دا جاۋاپتى قىزمەتتەر اتقارعان تۇستاعى سارابدال شەشىمدەرىنەن, جاساعان جۇمىستارىنان انىق كورەمىز. مەملەكەتتىڭ ىشكى دە سىرتقى جاعدايىن جەتىك بىلەتىن, قوعام احۋالىن جازباي تانيتىن تۇلعا دەپ تولىققاندى ايتۋعا بولادى. مەملەكەت باسشىسىنا جۇكتەلەتىن ەڭ نەگىزگى مىندەت − ەلدىڭ تاۋەلسىزدىگىن, قاۋىپسىزدىگىن قامتاماسىز ەتۋ. ويتكەنى پرەزيدەنت سىرتقى ساياساتتا وسى ەلدىڭ ەكونوميكاسى مەن تۇراقتىلىعىن ءارى قاراي جەتىلدىرۋ بويىنشا بارلىق ءىستى تىكەلەي ءوزى جۇرگىزەدى. وزىنە مەملەكەت جاۋاپكەرشىلىگىن تولىق جۇكتەيدى. وسىنى جان جۇيەسىمەن سەزىنگەن جاڭا پرەزيدەنتىمىز سالتاناتتى ءراسىم كەزىندە ءسويلەگەن سوزىندە: «مەنىڭ ماقساتىم – قوعامنىڭ بىرلىگىن قامتاماسىز ەتىپ, ءار ازاماتتىڭ قۇقىعىن قورعاۋ» دەپ شەگەلەپ ايتتى.
قازىر الەمدەگى حالىقارالىق جاعداي اسا كۇردەلى كەزەڭدە تۇرعانىن كەز كەلگەن كوزى اشىق ازامات بىلۋگە ءتيىس. ەكىنشى ءدۇنيەجۇزىلىك سوعىستان كەيىن قالىپتاسقان حالىقارالىق قۇقىق بۇزىلدى. الپاۋىت مەملەكەتتەر باسقا مەملەكەتتەردىڭ ىشكى ىسىنە ارالاساتىن بولدى. ءتىپتى كۇشتى دەرجاۆالار وزىنەن السىزدەرگە وكتەمدىك تانىتىپ, تىزە باتىراتىندى شىعاردى. ولاردىڭ ماقساتى وزىنە ءتيىمدى, ىڭعايلى جۇيە ورناتۋعا تىرىسىپ, تەك ءوز مۇددەسىن قورعايتىنى اشىق بايقالۋدا. دۇنيەجۇزىلىك ساۋدا ۇيىمىنىڭ بەدەلى ءتۇستى. ءار مەملەكەت ءوزىنىڭ جەكە باسىن كۇيتتەدى. بۇل ءوز كەزەگىندە الەم ەلدەرىنىڭ ەكونوميكاسىنىڭ ءورىسىن تارىلتىپ, باسقا دا سالالارعا سالقىنىن تيگىزە باستادى. كورشىلەس رەسەي باتىستىڭ وتە قاتاڭ سانكتسياسىنا ۇشىراپ وتىر. اقش-تىڭ قىسىمى قىتاي سەكىلدى ءىرى مەملەكەتتىڭ ەكونوميكالىق دامۋىنا دا كەرى اسەرىن تيگىزىپ جاتقانىن كورىپ وتىرمىز. ولاردا دا ساۋدا-ەكونوميكالىق قاتىناستار كۇردەلەنە باستادى. الەمدە مۇنداي وقيعالار ءبىزدىڭ دە ەكونوميكامىزدى اينالىپ وتپەيتىنى بەلگىلى. الەمدىك نارىقتا شيكىزات باعاسى تومەنگە قۇلديلاپ بارادى. مۇنى كۇندەلىكتى بايقاپ وتىرمىز. وسىنداي كۇردەلى جاعدايلار مەملەكەت باسشىسىنا ۇلكەن جاۋاپكەرشىلىكتەر جۇكتەيدى. وسى سەكىلدى حالىقارالىق دەڭگەيدەگى كۇردەلى ماسەلەلەردى تەرەڭ سەزىنەتىن, ەل ءۇشىن ماڭىزدى شەشىمدەر قابىلداي الاتىن, سول الپاۋىت ەلدەردىڭ باسشىلارىمەن تەپە-تەڭ دارەجەدە مامىلە جاساي الاتىن ساياساتكەردىڭ مەملەكەت باسىنا كەلۋى حالقىمىزدى وڭعا باستايتىن يگى ءىس بولدى دەپ ەسەپتەيمىن.
راسىندا دا قاسىم-جومارت توقاەۆ ەلىمىزدى كۇردەلى كەزەڭنەن امان الىپ وتەتىن, وسى تالاپتارعا بارلىق جاعىنان ساي كەلەتىن تۇلعا. توقاەۆتىڭ حالىقارالىق ساياساتتاعى بيىك بەدەلى باسقا ەلدەردىڭ بىزگە تىزە باتىرۋىنا, وكتەمدىك تانىتۋىنا جول بەرمەيدى. ەلدەگى ءىشكى جاعداي قانشالىقتى كۇردەلى بولعانمەن, ءبىز ءوزىمىزدىڭ ىنتىماعىمىزدى ارتتىرا بەرۋىمىز كەرەك. بەيبىتشىلىك پەن تۇراقتىلىق بولسا عانا ءبىز كەز كەلگەن قيىندىقتى وڭاي ەڭسەرە الامىز. ال ىشىمىزدەن ءىرىپ جاتساق, ودان تەك بارلىق سالا جاپا شەگەدى. باعا جەتپەس بايلىعىمىز تاۋەلسىزدىك دەيتىن ۇلى تۇعىرىمىزدى شايقاپ الماۋىمىز كەرەك. پرەزيدەنتىمىز ۇلىقتاۋ راسىمىندە العا تارتقان ون مىندەت ەلىمىزدى دامۋدىڭ داڭعىل جولىنا جەتەلەيتىن نەگىزگى قادامدار. وسىنىڭ بارلىعىن جان-جاقتى سارالاپ جولعا قويۋ ءۇشىن الدىمىزدا زور جاۋاپكەرشىلىكتەر تۇر. بۇل جۇمىستاردا قاسىم-جومارت كەمەل ۇلىن ءبىراۋىزدان قولداپ, جاڭا جەتىستىكتەرگە بىرگە قول جەتكىزۋگە كۇش بىرىكتىرۋىمىز ماڭىزدى.
الدىمىزدا ناقتى قانداي پروبلەمالار تۇرعانىن مەملەكەت باسشىسى جاقسى سەزىنىپ وتىر. حالىقتىڭ تابىسىن ارتتىرۋ, قوعامدى جەگىدەي جەگەن جەمقورلىق دەرتىنىڭ تامىرىنا بالتا شابۋ, كاسىپكەرلەردى قولداپ, ولاردىڭ ىسكەرلىك بەلسەندىلىكتەرىن ارتتىرۋ جانە قورعاۋ, جاڭا جۇمىس ورىندارىن اشۋ, ءادىل الەۋمەتتىك ساياسات, ساپالى مەملەكەتتىك قىزمەت كورسەتۋ, حالىقتىڭ قولايلى ءومىر ءسۇرۋى ءۇشىن تازا اۋىزسۋمەن قامتۋ, جولداردى رەتكە كەلتىرۋ ماسەلەلەرىن باستى نازارعا الىپ وتىر. ءدۇيىم جۇرتتىڭ الدىندا ۇلىقتاۋ ءراسىمىن بىردەن وتكەرىپ شۇعىل ىسكە كىرىسىپ كەتكەنى كوڭىل قۋانتادى.
پرەزيدەنت تىلگە تيەك ەتكەن باعىتتار شىن مانىندە مەملەكەتىمىزدى ورنىقتى دامۋدىڭ جاڭا دەڭگەيىنە شىعارۋشى كۇش ەكەنىنە كامىل سەنەمىز. «الداعى بىرنەشە جىل بەدەرىندە زامانىمىزدىڭ باستى سۇراعى: قانداي ەلدەر پروگرەسس ساپىنان ورىن الاتىنىنا, قايسىسى الەمدىك دامۋدىڭ جيەگىندە قالاتىنىنا جاۋاپ بەرىلەتىن بولادى. ەكونوميكالىق, الەۋمەتتىك جانە ساياسي پروگرەسس – بۇل ءبىزدىڭ زاماناۋي سىن-تەگەۋرىندەرگە بىردەن-ءبىر دۇرىس جاۋابىمىز», − دەگەن توقاەۆ, الەمدەگى جەتەكشى تەحنولوگيالارعا ۇمتىلىپ, جاھاندىق دامۋدىڭ جاڭا دەڭگەيىنە بەت العان مەملەكەتىمىزدىڭ الداعى باعىتتارىن ايقىنداپ بەردى. تالاپقا ساي, زەردەلى جاستاردى جەتەكشى سالالاردى باسقارۋ ىسىنە تارتۋ يدەياسى دا وتە وزەكتى ماسەلە دەپ ايتا الامىز. سەبەبى بويىندا ۇلتتىق نامىسى قايناعان جاسامپاز جاستار ەلىمىزدىڭ جارقىن بولاشاعى, تاۋەلسىزدىگىمىزدىڭ نەگىزگى تىرەگى. ولاردى ۇلكەن ءىستەرگە باۋلۋ بولاشاعىمىزعا جاسالعان يگى قادام.
حالىقارالىق قارجى نارىقتارىنىڭ تۇراقسىزدانۋىنا قاراماستان, حالىقتىڭ تابىس كولەمىن ارتتىرۋ, تابىسى جوعارى جانە تومەن ازاماتتاردىڭ اراسىنداعى الشاقتىق سىندى وتكىر ماسەلەنى رەتتەۋ ءۇشىن كەشەندى شارالار قابىلداۋ قاجەتتىگى كەزەك كۇتتىرمەيتىن شارۋالار. ەڭ اۋەلى قوعامعا سەنىم مەن كەلىسىم كەرەك. مۇنىڭ ارعى جاعىندا بيلىك پەن قوعام اراسىنداعى ديالوگتىڭ بەرىك ورناۋى تۇرعانىن جاقسى بىلەمىز. پرەزيدەنتتىڭ وسى ماسەلەگە دە اسا نازىك قاراپ, باسا كوڭىل ءبولىپ وتىرعانى ورىندى شەشىم. الەمدىك تاجىريبەگە سۇيەنە وتىرىپ, دامۋدىڭ باستى پرينتسيپتەرىن نەگىزگە الىپ جۇمىس جۇرگىزەتىن قاسىم-جومارت توقاەۆ ەلىمىزدىڭ ىشكى تۇراقتىلىعى مەن دامۋىن ورگە سۇيرەپ, سىرتقى ساياساتتاعى جوعارى بەدەلىن ودان ءارى بيىكتەتە بەرەتىنىنە بەك سەنەيىك. ەلىمىز ءۇشىن وسىناۋ تاريحي كەزەڭ باياندى بولىپ, جان-جاقتى جاڭعىرۋلار كوش تۇزەي بەرسە دەگەن تىلەكتەمىز.
يكرام ادىربەكوۆ,
مەملەكەت جانە قوعام قايراتكەرى
