بۇرىنعى وڭتۇستىك قازاقستان وبلىسىنا قاراستى (قازىرگى ءتۇركىستان وبلىسى) سارىاعاش اۋدانى, كەلەس اۋىلىندا ءدۇنيەگە كەلگەن تاعابەك بالا كەزىنەن بۇل ماماندىققا كوزى ءۇيرەنىپ ەرجەتىپتى. سەبەبى اناسى ءدارىگەر, ال اكەسى ۆەتەرينار بولىپ ەڭبەك ەتتى.
«دارىگەر بولۋىما بىردەن-ءبىر اسەر ەتكەن اتا-انامنىڭ ماشاقاتى كوپ دەنساۋلىق ساقتاۋ سالاسىندا ەڭبەك ەتۋى بولدى. 1992 جىلى تاشكەنت وبلىسى, جاڭا جول اۋدانى, ۋ.مۇساەۆ اۋىلىنىڭ №4 ورتا مەكتەبىن ءبىتىردىم. ۇلكەندەردىڭ ۇگىتتەۋىمەن سول جىلى تاشكەنت پەدياتريالىق مەديتسينالىق ينستيتۋتىنىڭ پەدياتريا فاكۋلتەتىنە وقۋعا ءتۇستىم. ول جىلدارى كورشىلەس ەلدىڭ استاناسىنداعى ءىرگەلى وقۋ ورداسىنىڭ اتاعى دۇركىرەپ تۇرعان كەز ەدى. 1998 جىلى اتالعان ماماندىقتىڭ وقۋىن اياقتادىم. العاشقى ەڭبەك جولىمدى جاڭا جول اۋداندىق بالالار اۋرۋحاناسىندا تاعىلىمدامادان وتۋدەن باستاپ, دارىگەر اتتى ماماندىقتىڭ مارتەبەسىن سەزىنە باستادىم», دەيدى بىلگىر مامان.
قازاقستاندا تۋىپ, تاعدىر جازۋىمەن شەتەلدە ءبىلىم الىپ, ەڭبەك جولىن باستاعان تاعابەك 1999-2013 جىلدار ارالىعىندا تاشكەنت وبلىسى, ءزاڭگى اتا اۋدانى, «وزبەكستان» اۋىلدىق دارىگەرلىك امبۋلاتورياسىندا پەدياتر-دارىگەر, جالپى ءتاجىريبەلى دارىگەر, امبۋلاتوريانىڭ ءبولىم مەڭگەرۋشىسى قىزمەتىن اتقاردى. بالا اعزاسىنىڭ ەرەكشەلىگىن, بالانىڭ تاماقتانۋىن, گيگيەناسىن, بالالار اۋرۋلارىنىڭ الدىن الۋ مەن ونى ەمدەۋ جولدارىن زەرتتەي باستادى. ءومىر ەسىگىن جاڭا اشقان سابيدەن باستاپ, اسىر سالىپ ويناپ جۇرگەن وسكىندەرگە مەديتسينالىق كومەك كورسەتۋ كەزىندە وزىنە عانا ءتان ەمدەۋ ادىستەرىن قولدانىپ, تالاي بالعىننىڭ جانىنا اراشا ءتۇسىپتى. «كوبىنە اۋرۋدىڭ ءتۇرى جاڭا تۋعان ءسابيدىڭ اناسىمەن دۇرىس جۇمىس ىستەمەۋدىڭ سالدارىنان تۋادى. ۇزاق زەرتتەۋ ارقىلى ەڭ اۋەلى جاڭا تۋعان نارەستەلەردى انا سۇتىمەن دۇرىس اۋىزداندىرۋدى باستى نازارعا الىپ كەلەمىن. جاس انالارمەن پىكىرلەسىپ, بالانىڭ تابەتى مەن دەمالىسى تۋرالى كوبىرەك مالىمەت الىپ, سول بويىنشا ەم-دوم جاسايمىن», دەيدى تاعابەك سەرىكباەۆ.
اراعا جىلدار سالىپ, «كىسى ەلىندە سۇلتان بولعانشا, ءوز ەلىڭدە ۇلتان بول», دەگەن بابالار اماناتىن ۇستانعان تاعابەك 2013 جىلى قاراشا ايىندا تاريحي وتانى قازاقستانعا, ونىڭ ىشىندە تاشكەنتپەن شەكارالاس شىمكەنت قالاسىنا كوشىپ كەلدى.
جاس ماماننىڭ بويىنداعى قابىلەتتى كورە بىلگەن باسشىلار تاعابەكتىڭ شىمكەنت №11, №6 قالالىق ەمحانالارىنا پەدياتر-دارىگەر قىزمەتىن اتقارۋىنا مۇمكىندىك بەردى. وسى جىلدار ارالىعىندا ول ءتاجىريبەسى ارقىلى قالىپتاسقان جەتىستىكتەرىن ەل يگىلىگىنە جاراتا ءبىلدى. قازىرگى تاڭدا №6 قالالىق ەمحانادا جالپى تاجىريبەلى ءدارىگەر بولىپ قىزمەت ەتەدى. پەدياتريا ماماندىعى بويىنشا جوعارى بىلىكتىلىك ساناتى, «جالپى دارىگەرلىك پراكتيكا» جانە «پەدياتريا» بويىنشا ماماندىق سەرتيفيكاتى بەرىلگەن. ءوز ءىسىنىڭ شەبەرى ءبۇگىندە جۇبايىمەن بىرگە ءۇش ۇل, ءبىر قىز تاربيەلەپ وتىر.
تاعابەك جىل سايىن وتەتىن مەديتسينا قىزمەتكەرلەرى كۇنىنە وراي جانە ناتيجەلى جۇمىس كورسەتكەنى ءۇشىن ەمحانا تاراپىنان ۇنەمى ماراپاتتالىپ كەلەدى.
«ءبىزدىڭ ەمحانا اۋماعىنداعى 45 ۋچاسكەدە 1700 پاتسيەنت ءتىركەلگەن. ولاردىڭ 70-80 پايىزى ءبىر جاسقا دەيىنگى سابيلەر. سوندىقتان بالالارمەن كوپتەپ جۇمىس ىستەيمىز. كۇنىنە 15 مينۋتتان بولگەندە 20 ادام قابىلدايمىز. بۇرىنعىداي قاعازباستىلىق جوق. بارلىعى ەلەكتروندى فورماتقا كوشكەن. ءبۇگىندە تۇرعىندار اراسىندا وزبەكستاننىڭ مەديتسينا سالاسى دامىعان دەگەن ءتۇسىنىك قالىپتاسقان. سول ەلدە ەڭبەك ەتكەندىكتەن, دەنساۋلىق ساقتاۋ سالاسىنىڭ وڭ-سولىن جاقسى بىلەمىن. بۇگىندە نۇر-سۇلتان, الماتى قالاسى مەن وبلىس ورتالىقتارىنداعى دەنساۋلىق ساقتاۋ مەكەمەلەرى وزىق تەحنولوگيالىق قۇرال-جابدىقتارمەن جابدىقتالعان. شەتەلدەن ءبىلىم العان بىلىكتى دارىگەرلەر ەڭبەك ەتەدى. سول سەبەپتى وزگەنى زور ساناۋدى دوعارۋىمىز كەرەك», دەيدى بىلىكتى دارىگەر.
شىمكەنت
