بالقاش قالاسىندا قاراعاندى وبلىستىق اكىمدىگى مەن كاسىپكەرلىك باسقارماسىنىڭ ۇيىمداستىرۋىمەن وتكەن فورۋمعا رەسەيدىڭ تۇمەن, ومبى قالالارىنان, سونداي-اق موڭعوليادان تۋريزم ماماندارى قاتىستى. شەتەلدىك قوناقتار نۇر-سۇلتان مەن الماتى قالاسىنان كەلگەن ماماندارمەن بىرگە كۋرورتتىق ايماقتاعى جاعاجايلىق دەمالىس ورىندارىن ارالاپ كوردى.
– وسى فورۋمعا ءبىز دەمالىس ورىندارىن ءوز كوزىمىزبەن كورىپ, العان اسەرىمىزدى تۇمەندىكتەرگە جەتكىزۋ ءۇشىن كەلدىك. قازاقستاندا, اتاپ ايتقاندا بالقاش قالاسىندا تابيعات تاماشا, دەمالىس ورىندارى جايلى جانە باعالارى دا قولجەتىمدى. قوناقجايلىلىق جوعارى دەڭگەيدە, ادامدارى اشىق-جارقىن, – دەپ اعىنان جارىلدى تۇمەن دەلەگاتسياسىنىڭ مۇشەسى تاتيانا سەمەنوۆا.
تۋروپەراتورلاردىڭ ايتۋىنشا, قازىرگى تاڭداعى وزەكتى ماسەلەلەردىڭ ءبىرى كولىكتىك قاتىناس ەكەن. تۋريستەر بالقاشقا پويىزبەن كەلەر بولسا, وندا ولارعا اۋىسۋلارمەن جۇرۋگە تۋرا كەلەدى, ال اۆتوموبيلدىك ساياحات كوپ ۋاقىتتى الادى. ترانسفەر ماسەلەسى شەشىلسە, كوپتەگەن قيىندىقتار جويىلىپ, رەسەيلىك تۋريستەر اعىمى ۇلعايار ەدى دەگەن پىكىر ايتتى ماماندار.
موڭعوليادان كەلگەن قوناق باعجانار حانات التاي مەن شىعىس قازاقستانعا شەتەلدىك تۋريستەردى تارتۋ تاجىريبەسىمەن ءبولىستى. ونىڭ فيرماسى بۇل ىسپەن تابىستى اينالىسىپ جۇرگەن كورىنەدى. شەتەلدىك مامان ەندى بالقاش كولى ماڭىنداعى عاجايىپ كورىنىستەرگە قىزىعۋشىلىق تانىتىپ وتىرعانىن دا جاسىرمادى.
تۋريستىك فورۋم اياسىندا بالقاش قالاسىندا «دەنساۋلىققا جول» اتتى جەڭىل اتلەتيكالىق مارافون جانە كەمەلەر شەرۋى ۇيىمداستىرىلدى. ودان كەيىن فورۋمنىڭ پلەنارلىق وتىرىسى ءوتىپ, وندا سالا مامندارى وتاندىق ءتۋريزمدى دامىتۋ ماسەلەلەرىن تالقىلادى.
قاراعاندى وبلىسى
