– 2014 جىلدان باستاپ اقتاۋ قالاسىنداعى ىشكى ىستەر دەپارتامەنتىنىڭ جەدەل ارەكەت ەتەتىن ارنايى جاساعىندا جۇمىس ىستەيمىن. بۇعان دەيىن جۇمىسىمدى بوكسپەن قاتار الىپ ءجۇرسەم, بۇگىندە تولىق شتاتتامىن.
– ريو وليمپياداسىنان سوڭ ازداعان ءۇزىلىس الىپ, كەيىننەن قۇراماعا ورالدىڭىز. ءتىپتى ازيا ويىندارىنا بارۋ تۋرالى جوسپارىڭىز دا بولعان ەكەن. ونىڭ ورىندالۋىنا نە كەدەرگى بولدى؟
– راس, برازيليا جەرىندەگى الاماننان سوڭ ءۇزىلىس الىپ, ءبىراز تىنىقتىم. قايتا قۇراماعا ورالىپ جاتتىعۋدى جالعاستىردىم. دجاكارتاداعى ازيا ويىندارىنا قاتىسۋ تۋرالى وي بولعان. دەگەنمەن, پرەزيدەنت كۋبوگىنىڭ قورىتىندىسى بويىنشا يندونەزياعا ءساماتالى تولتاەۆتى الىپ كەتتى. باپكەرلەر ونىڭ توكيو وليمپياداسىنا قاتىسۋ مۇمكىندىگىن ەسكەرىپ, الەۋەتىن بايقاعىسى كەلسە كەرەك.
– جىلدىڭ اياعىندا بوكستان ءبىرجولا كەتۋىڭىزگە وسى جايت سەبەپ پە؟
– ونى باپكەرلەرمەن اقىلداسا كەلە شەشتىك. سالماعىمىزدا ورنىمىزدى باساتىن جاستاردىڭ بارىن كورگەن سوڭ ەش ۋايىمسىز بوكسپەن قوشتاسۋعا بولاتىنىن ءتۇسىندىم. ونىڭ ۇستىنە جاراقاتىم كوبەيىپ, قاباعىم قايتا-قايتا جارىلىپ, اعزام شارشاي باستاعانداي كورىندى. وسى جايتتاردىڭ ءبارىن ەسكەرە وتىرىپ, ۇلتتىق قۇراماداعى ورنىمدى جاستارعا بوساتقانىم ءجون بولار دەدىم.
– كەز كەلگەن سپورتشى كارەراسىن ەستە قالارلىق جەڭىسپەن اياقتاسام دەيدى. سىزدە ەشقانداي وكىنىش جوق پا؟
– وكىنىش جوق. تەك شۇكىرشىلىك ەتەمىن. اۋەسقوي بوكستا وليمپيادا ويىندارىنا قاتىستىم, الەم چەمپيوناتىنىڭ جۇلدەگەرى, ازيا چەمپيوناتىنىڭ جەڭىمپازى اتاندىم. ارينە تورتجىلدىقتىڭ باس دوداسىندا جۇلدەگەرلەر قاتارىنا ىلىكسەم دەگەن ارمانىم بولعان. ول ەندى كەز كەلگەنگە بۇيىرا بەرمەيتىن باق. سوندىقتان وسى جەتىستىكتەرىمنىڭ وزىنە اللاعا شۇكىر دەيمىن. بوكستىڭ ارقاسىندا تالاي ەلدى كوردىك. حالىقتىڭ ىستىق ىقىلاسىنا بولەندىك. ۇلكەندى سىيلاپ, كىشىلەرگە ۇلگى بولا العانىما قۋانامىن.
– ماڭعىستاۋ وڭىرىندەگى بوكستىڭ دامۋىنا قانداي باعا بەرەسىز؟
– سوڭعى ەل بىرىنشىلىگى اقتاۋدا ءوتكەنى بەلگىلى. چەمپيونات قورىتىندىسى بويىنشا ەرىك ءالجانوۆ, نۇربول قالجانوۆ, ماۋلەن وسكەنبەك, بەكزات نۇرداۋلەتوۆ, ءساماتالى مەن ءساناتالى تولتاەۆتار, ايبولدى داۋرەن ۇلى سەكىلدى بوكسشىلار ۇلتتىق قۇراماعا ەندى. بۇيىرتسا ءبىزدىڭ ورنىمىزدى باسادى دەپ ۇمىتتەنەمىز.
– ماتەريالدىق قولداۋ جاعى قالاي؟
– ول ناتيجەگە بايلانىستى. مىسالى, قازاقستان چەمپيونى اتانعان سپورتشىعا جەرگىلىكتى قالتالى ازاماتتار ءبىر بولمەلى پاتەر سىيلايدى. ال الەم نە ازيا چەمپيوناتتارىندا ءجۇلدەگەر اتانىپ جاتسا, اكىمدىك پەن فەدەراتسيا تاراپىنان قولداۋ كورسەتىلەدى. ول جاعىنان ەشقانداي ماسەلە جوق. ەڭ باستىسى, سپورتشىلاردىڭ وزىندە جەڭىسكە دەگەن جىگەر, كوزىندە وت بولسا بولعانى.
– ءسىز ريو وليمپياداسىنا جولدامانى ارۆ جوباسى ارقىلى يەلەندىڭىز. مۇمكىندىگىڭىزدى ءارى قاراي كاسىپقوي بوكسقا سىناپ كورۋ تۋرالى وي بولعان جوق پا؟
– ونداي ويلار, ۇسىنىستار دا بولدى. ماديار اشكەەۆ باۋىرىمىزدىڭ جانىنا بارسام دەگەنمىن. بىراق وتباسىمدى تاستاپ كەتە المادىم. اتا-انام دا جاس ەمەس. ءوزىم – ۇيدە جالعىز ۇلمىن. وسىنىڭ ءبارىن ەلەپ-ەكشەپ, ەلدە قالۋدى ءجون كوردىم. ءومىرىمدى تولىق بوكسقا ارناماي, اۋەسقوي بوكستاعى جەتىستىكتەرىمە قاناعات دەپ, جاقىندارىمنىڭ جانىندا قالدىم.
– ۇلتتىق قۇراما باسشىلىعىندا وزگەرىستەر بولدى. عالىم كەنجەباەۆ قانداي جاڭاشىلدىقتار الىپ كەلەدى دەپ ويلايسىز؟
– عالىم اعايدىڭ قاراماعىندا جاتتىعىپ كورگەن ەمەسپىن. سوندىقتان ونىڭ ءادىس-تاسىلىنەن بەيحابارمىن. ول كىسى جاستارمەن بىرگە جاقسى جەتىستىكتەرگە قول جەتكىزدى. گەنناداي گولوۆكيننىڭ باپكەرى. ياعني, بىلىكتى مامان ەكەندىگىنە كۇمانىم جوق. جۇمىسىنا تەك ساتتىلىك تىلەيمىن.
الايدا مىرزا اعايدىڭ باس باپكەرلىكتەن كەتكەنىن ەستىگەندە كوڭىل كۇيىم ءتۇسىپ كەتتى. وزگەنىڭ پىكىرىنە جالتاقتامايتىن, جۇمىسىن بىلەتىن, شاكىرتتەرىنەن تالاپ ەتە الاتىن بىلىكتى مامان عوي. تامىر-تانىستىق دەگەندى ءبىلمەيدى. كىم شىنىمەن دە دايىن, كىمنىڭ كوزىندە وتى بار, سونى جارىسقا اپاراتىن. ول كىسىگە العىسىم شەكسىز. قۋانعانىم, مىرزا اعاي دا, مارات اعاي دا قۇرامادان كەتكەن جوق. وسىنداي بىلىكتى باپكەرلەردىڭ باسى بىرىككەندە ناتيجەلەر دە سوعان لايىق بولادى دەپ سەنەمىن.
– ءوزىڭىز بوكسقا قالاي كەلىپ ەدىڭىز؟
– ەڭ العاش بوكس ۇيىرمەسىنە اعام ەرتىپ اپاردى. «مەنەن جاقسى بوكسشى شىقپاسا دا, سەنەن جاقسى بوكسشى شىعادى» دەگەنى ەسىمدە. سيدنەي وليمپياداسىنداعى اعالارىمىزدىڭ جەتىستىكتەرىنەن جىگەرلەنىپ, ولاردىڭ ەلگە ورالعانداعى قۋانىشىن كورىپ, مەن دە ءدال وسىلاي مەدال الىپ ەلىمدى, اتا-انامدى قۋانتسام دەگەن ارمان پايدا بولدى. 14 جاستاعى ءجاسوسپىرىم كەزىم. ونىڭ الدىندا ەركىن كۇرەسكە قاتىسىپ جۇرگەنمىن. سوندىقتان با, بوكسقا تەز بەيىمدەلىپ كەتتىم.
– اڭگىمەڭىزگە راحمەت.
ءمادينا اسىلبەك,
جۋرناليست
