ەل قامىن ويلاعان, جوق-ءجىتىككە قامقور بولىپ, اعايىندى ءبىر-بىرىمەن جاقىنداتىپ, ءبىرلىگىن نىعايتقان, كەلەشەگىن ويلاعان قوعام قايراتكەرى. تەكتى تۇلعانىڭ بويىنداعى كەيبىر مىنەزىنە قاراپ, حالىق پاڭ نۇرماعامبەت اتاپ كەتكەن. بىراق سول كىرپياز مىنەز, تالعامپاز تۇيسىك بيىككە دە كوتەرگەن. شام شاھارىندا قاجىلىق ساپارعا بارعان الاش بالاسىنا ارناپ, ءوز قاراجاتىنا ارنايى ءۇي سالعىزعان, ءتورت رەت قاجىلىققا بارعان ادام.
ايرىقشا اسەمدىكتى, ءسان مەن سالتاناتتى جاقسى كورگەن. XIX عاسىردىڭ سوڭىندا ءىى نيكولاي يمپەراتوردى قارسى الىپ, قازاق حالقىنىڭ تۇرمىس-تىرشىلىگىن كورسەتكەن. جاقسى جاعىنان, ارينە. سان عاسىر بويى جالعاسىپ كەلە جاتقان سالت-ءداستۇردى دە قولمەن قويعانداي ەتىپ سانالارىنا قۇيىپ بەرگەن. قازاقتىڭ بويىنداعى تاماشا تالانتتى ايگىلەيتىن قولونەر شەبەرلەرىنىڭ كورمەسىن دە ۇيىمداستىرعان. سول كورمەدە پاڭ نۇرماعامبەتتىڭ تىككەن كيىز ءۇيى باس بايگەنى السا كەرەك. ءۇيدىڭ سۇيەگى عانا ەمەس, اقشاڭقان كيىزى دە, ىشىندەگى نەبىر اسىل بۇيىمدارى دا ءتامام جۇرتتى تاڭعالدىرعان دەسەدى.
كەيىن ون ەكى قانات اق وردا نيجني نوۆگورودتا ءوتكەن ءبۇكىلرەسەيلىك كورمەگە, پاريج قالاسىندا وتكەن بايقاۋعا قويىلعان. قازىرگى كۇنى سانكت-پەتەربۋرگتەگى ەرميتاجدا ساقتاۋلى. 1898 جىلى جىلقى شارۋاشىلىعىن اسىلداندىرۋعا قوسقان ۇلەسى ءۇشىن التىن مەدال مەن ساعات العان.
نۇرماعامبەت ساعىناي ۇلىنىڭ قازاق قوعامىن ءوركەنيەتكە جەتەلەۋدەگى ەڭبەگى ءوز الدىنا ءبىر توبە. ونەرى ءورىس جايعان وزگە ەلدەردەگى جاقسى ءىستى ەرەيمەننىڭ ەتەگىنە اكەلىپ, ەلگە كورسەتىپ, جالپاق جۇرتتى وسىنداي جاقسىلىققا جەتەلەگەن. موينى وزىق ءتاجىريبەلەردى تۋعان حالقىنىڭ بويىنا سىڭىرۋگە تىرىسقان. دەمەك, بۇرىنعى قازاق بايلارىنىڭ بويىنداعى جالعىز بايلىقتى عانا مىسە تۇتپاي, ەلىنىڭ ەرتەڭىنە ەلەڭدەگەن ۇلتجاندىلىق قاسيەتتى پاڭ نۇرماعامبەتتىڭ بەينەسىنەن ايقىن كورۋگە بولادى.
