نەسىن جاسىرايىق, ق.توقاەۆتىڭ حالىق قوشەمەتى مەن قولداۋىنا يە بولىپ, بارىنشا كوپ داۋىس جينايتىنىنا ەشقانداي كۇمانىمىز بولعان جوق. پرەزيدەنتتىكە كانديدات قاسىم-جومارت توقاەۆتىڭ سەنىم ءبىلدىرىلگەن ادامى, تۇركىستان قالالىق قوعامدىق شتابىنىڭ مۇشەسى, كيەلى شاھاردىڭ تۇرعىنى رەتىندە قالا حالقىمەن, مادەنيەت جانە ونەر قىزمەتكەرلەرىمەن, تەمىرجولشىلارمەن, بايلانىس جانە اۆتوبەكەت قىزمەتكەرلەرىمەن, گۋمانيتارلىق-تەحنيكالىق جانە «بولاشاق» كوللەدجدەرىنىڭ بىلىمگەرلەرىمەن, باسقا دا ۇجىمدار قىزمەتشىلەرىمەن كەزدەسۋلەر وتكىزىپ, ءسوز سويلەدىك. وسىنداي جىلى شىرايلى باسقوسۋلاردا اعىنان جارىلا وي-پىكىرلەرىن ورتاعا سالعان جاندار كوپ بولدى. ولاردىڭ بارلىعى دا پرەزيدەنتتىكتەن ۇمىتكەر قاسىم-جومارت توقاەۆقا ءبىراۋىزدان داۋىس بەرەتىندىكتەرىن رياسىز اق كوڭىلمەن ايتقان بولاتىن. قاراپايىم ەڭبەك ادامدارىنىڭ قاشاندا ۋادەگە بەرىك ەكەندىگى, ەكى سويلەمەيتىندىكتەرى بۇل جولى دا ايقىن دالەلدەندى.
قاسىم-جومارت توقاەۆ سايلاۋالدى پلاتفورماسىندا «ساباقتاستىق. ادىلدىك. ورلەۋ» قاعيدالارىن ۇستاندى. وسى تۇرعىدان كەلگەندە, پرەزيدەنتتىككە سايلانعان ونىڭ ءتۇركىستانعا ايرىقشا نازار اۋدارىپ وتىرعانى انىق. مەملەكەت باسشىسى رەتىندە العاشقى جۇمىس ساپارىن كيەلى مەكەننەن باستاۋىنىڭ ءوزى كوپ جايدى اڭعارتسا كەرەك. بۇل ساپارىندا قاسىم-جومارت كەمەل ۇلى ءجۇرگىزىلىپ جاتقان قۇرىلىستاردى ءجىتى باقىلاپ, ناقتى تاپسىرمالار بەردى. الداعى ۋاقىتتا تۇركىستانعا قاتىستى نازارىن ءبىر ءسات تە باسەڭدەتپەيتىنىن قاداپ تۇرىپ ايتتى.
سايلاۋ كۇنى ءوزىمىز قىزمەت ەتەتىن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ مادەنيەت ورتالىعىنداعى عيماراتتا №133 سايلاۋ ۋچاسكەسىنە داۋىس بەرۋگە كەلگەنىمىزدە, توپ-توبىمەن كەزەكتە تۇرعان ستۋدەنتتەرىمىزدىڭ كوتەرىڭكى كوڭىل كۇيلەرىن كورىپ, ىشتەي شاتتاندىق. ال مەملەكەت باسشىسى قاسىم-جومارت كەمەل ۇلى وتكەن جولى ۋنيۆەرسيتەتتە بولعان كەزىندە جىلى لەبىزىن ءبىلدىرىپ, وقۋ ورنىنىڭ ءمارتەبەسىن بيىككە كوتەرۋگە قامقورلىق جاسايتىنىن ايتقان ەدى. وسىلايشا, پروفەسسورلىق-وقىتۋشىلار قۇرامى مەن ۋنيۆەرسيتەت باسشىلىعىنىڭ جانە ستۋدەنتتەردىڭ كوڭىلدەرىن ءبىر كوتەرىپ تاستاعان بولاتىن.
ەلىمىزدەگى جانە شەتەلدەردەگى بۇقارالىق اقپارات قۇرالدارى سايلاۋدىڭ ءادىل, اشىق ءارى تازا وتكەندىگىن جاريا ەتۋدە. شەتەلدىك بايقاۋشىلار دا سايلاۋعا جوعارى باعا بەرىپ جاتىر.
حالقىمىز بولاشاعىمىزدىڭ جارقىن بولاتىنىنا كامىل سەنەدى. ەڭ باستىسى دا, بىزگە كەرەگى دە وسى ەمەس پە؟!
سەيدۋللا سادىقوۆ,
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى
تۇركىستان
