بالالار ۇيىنەن سوڭ الدىمەن الماتىداعى پەدۋچيليششەدەن ءبىلىم الدى. شۋ اۋداندىق كومسومول كوميتەتىندە ىستەپ, وسى جەردەگى اۋداندىق گازەتتىڭ جاۋاپتى حاتشىسى بولعان. 1944-1947 جىلدارى جامبىل وبلىستىق «ستاليندىك جول» (قازىرگى«اق جول») گازەتىندە دە جاۋاپتى حاتشىلىق قىزمەتىن اتقارعان.
قازاقستان كومپارتياسى ورتالىق كوميتەتى جانىنداعى ەكى جىلدىق پارتيا مەكتەبىن بىتىرگەن سوڭ قازىرگى تۇرار رىسقۇلوۆ اۋپارتكومىنىڭ ناسيحات جانە ۇگىت ءبولىمىن باسقارىپ, كوكتەرەك (قازىرگى مويىنقۇم) اۋداندىق پارتيا كوميتەتىنىڭ حاتشىسى, ودان كەيىن جامبىل وبلىستىق اتقارۋ كوميتەتى توراعاسىنىڭ ورىنباسارى بولدى.
ال 1953-1956 جىلدارى ماسكەۋدەگى جوعارعى پارتيا مەكتەبىندە وقىعان. ءماسكەۋدەن جامبىل وبلىسىنا قايتا ورالىپ, بەس جىل بويى جامبىل قالالىق كەڭەسى ءتوراعاسىنىڭ ورىنباسارى قىزمەتىن اتقارىپ, ءتورت جىل كوكتەرەك اۋداندىق اتقارۋ كوميتەتىنىڭ توراعاسى, شۋ اۋداندىق پارتيا كوميتەتىنىڭ حاتشىسى بولادى. سول سياقتى ون جىل جامبىل وبلىستىق اتقارۋ كوميتەتىنىڭ الەۋمەتتىك قامسىزداندىرۋ ءبولىمىن باسقارعان. مىنە, تۇرسىنبالا اپايدى حالقىمىزدىڭ ءبىلىمدى دە ءبىلىكتى قايراتكەر قىزىنىڭ ءبىرى دەۋىمىزدىڭ سىرى وسىندا.
تۇرسىنبالا اپامىزدىڭ ەرى, مارقۇم ابدىقۇل دا ءبىرقاتار لاۋازىمدى قىزمەتتىڭ باسىن ۇستاعان ۇلتجاندى ازامات ەدى. ەكەۋى مەملەكەتتىك ءىستەردىڭ بەل ورتاسىندا ءجۇرىپ, ماريا, ساۋلە, زاۋرە ەسىمدى ءۇش قىز تاربيەلەپ ءوسىرگەن, ولاردان بىرنەشە نەمەرە, شوبەرە ءسۇيىپ وتىر. ءدال وسى تۇستا ۇلكەن كۇيەۋ بالاسىنىڭ بەلگىلى عالىم, تاريح عىلىمدارىنىڭ دوكتورى, اكادەميك بولات كومەكوۆ ەكەنىن ايتقانىمىزدىڭ دا ەش ايىبى بولماس.
– مەن وسى ۇزاق عۇمىرىمدا, – دەيدى تۇرسىنبالا قاسەنقىزى, – ادامگەرشىلىگى جوعارى, ادال, ءادىل, قوعامشىل, الدىمەن ءوزىن ەمەس, ەلىن ويلايتىن تالاي جايساڭ جاندى جاقسى ادامدارمەن بىرگە ءجۇردىم, ارالاستىم. ماسەلەن, ايگىلى جۇماباي شاياحمەتوۆتىڭ قامقورلىعىن, كومەگىن كورگەنىمدى ايرىقشا اتاپ وتكىم كەلەدى. سول سياقتى قىزمەتتەس بولعان ىزمۇحامەد ەدىلباەۆ, اسانباي اسقاروۆ, ەكەيباي قاشاعانوۆتى قالاي ۇمىتايىن! ول كىسىلەردىڭ ازبايتىن اقىلىن الدىم, كەرەمەت كەڭەسىن تىڭدادىم, ۇلكەن ۇلگىسىن ۇستاندىم.
مىنا 1952 جىلى الماتىدا تۇسىرىلگەن سۋرەتتە جامبىل وبلىستىق اتقارۋ كوميتەتى توراعاسىنىڭ ورىنباسارى تۇرسىنبالا ءابدىرامانوۆا ء(تۇرەگەپ تۇرعان) مەن قاراعاندى وبلىستىق اتقارۋ كوميتەتى توراعاسىنىڭ ورىنباسارى فاتيما دانەنوۆا جانە قازاق كسر مينيسترلەر كەڭەسى ءتوراعاسىنىڭ ورىنباسارى ماقپۋزا نۇرىمباەۆا بەينەلەنگەن.
...بۇل كەزدە اپامىز 29 جاستا ەكەن. ۇشقىر ۋاقىتتا توقتاۋ جوق قوي. سودان بەرى جىلجىپ جىلدار, سىرعىپ ايلار ءوتىپتى. جاڭا ءداۋىر تۋىپ, جاڭا زامان كەلدى. قازاق ەلى تاۋەلسىزدىك الىپ, كەمەل كەلەشەككە باتىل بەتتەپ بارادى.
– قۇدايعا شۇكىر,وسى كۇنگە دەيىن جەتتىم, – دەيدى اپامىز. – ەندىگى بار تىلەگىم – ەل امان, جۇرت تىنىش بولسىن!
بەرىكباي قادىقوۆ,
جۋرناليست
