قۇرىلتايدىڭ نەگىزگى ماقساتى – مادەني-گۋمانيتارلىق جانە الەۋمەتتىك-ەكونوميكالىق جوبالار نەگىزىندە قازاق دياسپوراسىنىڭ وكىلدەرىن بىرىكتىرۋ. كىشى قۇرىلتايدىڭ جۇمىسىنا قازاق دياسپوراسىنىڭ 100-دەن استام وكىلى, سونداي-اق قازاقستاندىق مادەنيەت قايراتكەرلەرى, كاسىپكەرلەر, دۇنيەجۇزى قازاقتارى قاۋىمداستىعىنىڭ بەلسەندىلەرى, «وتانداستار» قورى مەن اقپارات جانە قوعامدىق دامۋ مينيسترلىگىنىڭ ماماندارى مەن ساراپشىلارى قاتىستى.
قازاقتاردىڭ كىشى قۇرىلتايىنىڭ نەگىزگى تاقىرىبى –تۇڭعىش پرەزيدەنت – ەلباسىنىڭ « ۇلى دالانىڭ جەتى قىرى» ماقالاسىنىڭ جانە «رۋحاني جاڭعىرۋ» باعدارلاماسىنىڭ ەرەجەلەرى كونتەكسىندە ىنتىماقتاستىقتى دامىتۋ. ءىس-شارا شەڭبەرىندە الەمنىڭ ءتۇرلى ەلدەرىندەگى قازاق دياسپوراسىنىڭ ىنتىماقتاستىعىن دامىتۋدىڭ وزەكتى ماسەلەلەرى, «وتانداستار» قورى مەن دۇنيەجۇزى قازاقتارى قاۋىمداستىعى باستاماشىلىق ەتكەن بىرلەسكەن باعدارلامالار مەن جوبالاردى جۇزەگە اسىرۋ جولدارى تالقىلاندى.
قۇرىلتايدىڭ سپيكەرلەرى قاتارىندا دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ, «وتانداستار قورىنىڭ» ۆيتسە-پرەزيدەنتى ماعاۋيا سارباسوۆ, ەۋروپاداعى قازاق قاۋىمداستىقتارىنىڭ ءجانە شۆەتسياداعى قازاق قاۋىمداستىعىنىڭ توراعاسى مۇرات ەرميش ءسوز سويلەدى.
زاۋىتبەك قاۋىسبەك ۇلى ءوزىنىڭ بايانداماسىندا اتالعان شارانىڭ قازاق ۇلتىنىڭ بىرلىگىن نىعايتۋداعى ماڭىزدى ءرولىن اتاپ ءوتتى:
– «قانداستارىمىز ەلباسىنىڭ «وتانداستار قورىن» قۇرۋ تۋرالى ۇسىنىسىنا ءۇمىت ارتىپ, قولداۋ ءبىلدىردى. مىنە, سونىڭ ءناتيجەسىندە ءبىز بۇگىن دۇنيەجۇزى قازاقتارى قاۋىمداستىعى مەن «وتانداستار قورى» كەاق ءبىرلەسكەن جۇمىستارىنىڭ ناتيجەسى جايلى ايتا الامىز. شەتەلدەردە تۇراتىن قازاق دياسپورالارى وكىلدەرىنىڭ وتىنىشتەرىنە بايلانىستى ۇلتتىق ورتالىقتاردى مۋزىكا اسپاپتارىمەن, قولونەر بۇيىمدارىمەن, ۇلتتىق كيىممەن قامتاماسىز ەتۋ ماسەلەسىنە وراي, ءبىز «ءداستۇرلى قورجىن» اتتى كەڭ اۋقىمداعى جوبانى جۇزەگە اسىرماقپىز.
شەتەلدەردەگى وتانداستارىمىزدى قولداۋ ءۇشىن قازاقستان ۇكىمەتى جانىنان ۆەدومستۆوارالىق كوميسسيا قۇرىلادى. «قازاق كارتاسىن» ەنگىزۋ تۋرالى ۇسىنىس قوعام تاراپىنان قولداۋعا يە بولدى.
بۇگىنگى ەۋروپا جەرىندە ءوتكىزىلىپ وتىرعان كىشى قۇرىلتاي ۇلتتىق «رۋحاني جاڭعىرۋ» باعدارلاماسىنا وزىندىك ۇلەس قوسادى دەپ سەنەمىن. بۇل الەمدىك قاۋىمداستىققا قازاق ۇلتىنىڭ بىرلىگىن جانە قازاقستان رەسپۋبليكاسىنىڭ شەتەلدەردە تۇراتىن قازاق دياسپورالارىنا ەرەكشە قولداۋى مەن قامقورلىعىن كورسەتەدى».
كۇن تارتىبىندەگى باسىم ماسەلەلەر قاتارىندا – شەتەلدە تۇراتىن وتانداستاردى قولداۋ ءۇشىن نورماتيۆتىك بازانى جەتىلدىرۋ, ءبىلىم بەرۋ, تۋريستىك باعدارلامالاردى ىسكە اسىرۋ, قازاق ءتىلىن دامىتۋ, بايلانىس ورناتۋ جانە بيزنەس-جوبالاردى ىسكە قوسۋ تالقىلاندى.
قۇرىلتايدىڭ العاشقى كۇنى شۆەتسيا, ۇلىبريتانيا, گەرمانيا, فرانتسيا, دانيا, نيدەرلاند, اۋستريا مەن بەلگياداعى قازاق مادەني ورتالىقتارى مەن «وتانداستار» قورىنىڭ ىنتىماقتاستىعى مەن ارىپتەستىگىن دامىتۋ تۋرالى ەكى- جاقتى مەموراندۋمدارعا قول قويىلدى. وسىلايشا, قۇرىلتاي شەڭبەرىندە «قازاق ءۇيى» – ورتاق برەندىمەن الەمنىڭ ءتۇرلى ەلدەرىندە جۇمىس ىستەيتىن بارلىق قازاق مادەني ورتالىقتارىنىڭ بىرىڭعاي بازاسىندا بىرىكتىرۋگە باعىتتالعان جوبا باستاۋ الدى.
كىشى قۇرىلتاي شەڭبەرىندە العاش رەت وتاندىق جانە شەتەلدىك كاسىپكەرلەردىڭ قاتىسۋىمەن بيزنەس-فورۋم ءوتتى. ءىس-شارا بارىسىندا ەۋروپاداعى قازاق دياسپوراسىنىڭ وكىلدەرىنە بيزنەس-باستامالاردى قولداۋ جانە جەكە كاسىپكەرلىكتى مەملەكەتتىك قولداۋ شارالارى ۇسىنىلدى. بيزنەس-فورۋم شاعىن جانە ورتا كاسىپكەرلىكتى دامىتۋدىڭ ءتۇرلى سالالارىندا تاجىريبە الماسۋعا, قازاقستان, گەرمانيا جانە ەۋروپا مەن ازيانىڭ باسقا دا ەلدەرىنىڭ كاسىپكەرلەرى اراسىنداعى بايلانىستاردى كەڭەيتۋگە مۇمكىندىك بەرەتىن ۇلكەن الاڭعا اينالدى.
بۇدان باسقا, قۇرىلتايعا قاتىسۋشىلار جولداستىق فۋتبول ويىندارىن وتكىزىپ, قازاقستاندىق جوعارى وقۋ ورىندارىنىڭ ءبىلىم بەرۋ كورمەسىمەن تانىسا الدى. كورمە اياسىندا قازاقستاننىڭ جوعارى وقۋ ورىندارىندا وقۋ مۇمكىندىكتەرى, شەتەلدىك ۋنيۆەرسيتەتتەرمەن ىنتىماقتاستىق جوبالارى ۇسىنىلدى.
تۇتاستاي العاندا قازاقتاردىڭ كىشى قۇرىلتايىن وتكىزۋ جاڭا سەرىكتەستەردى ىزدەۋ, ىسكەرلىك جانە گۋمانيتارلىق بايلانىستار ورناتۋ, شەتەلدىك قوعامداستىققا قازاقستاننىڭ ءتۇرلى سالالارىنداعى مۇمكىندىكتەرىن كورسەتۋ ءۇشىن ءتيىمدى الاڭدى قامتاماسىز ەتتى دەۋگە بولادى.
