ويتكەنى جاستار اۋىردىڭ ۇستىمەن, جەڭىلدىڭ استىمەن ءجۇرۋگە بەيىم, ماسىلدىق پيعىل باسىم, قوعامدىق پايدالى ىسكە ىنتاسىز, ق ۇلىقسىز دەگەن سەكىلدى ايىپتاۋلار ءجيى ايتىلاتىندىقتان كەيدە تارازى باسى قاي جاققا اۋاتىنىن بىلمەي دال بولاسىڭ. جاھاندىق باسەكەلەستىك جاعدايىندا بۇل بۋىننىڭ اراسىندا شىنايى ءوندىرىستىك ەڭبەكتىڭ قادىرى ءتومەندەپ, بەدەلى تۇسكەندەي كورىنگەنىمەن, شىن مانىندە ولاي ەمەس ەكەنىنە ج.قيزاتوۆ اتىنداعى اۋىل شارۋاشىلىعى كوللەدجىندە وتكەن «جاس كەلسە – ىسكە!» اتتى اۋىلدىڭ ەڭبەكشى جاستارىنىڭ رەسپۋبليكالىق فورۋمىندا جاۋاپ تاپقانداي بولدىق. سالالىق كاسىپوداق قىزمەتكەرلەرى, الەۋمەتتىك ارىپتەستەر, اقمولا, قوستاناي, قىزىلجار وڭىرلەرىنەن جينالعان دەلەگاتتار الدىندا ءسويلەگەن سوزىندە قازاقستان كاسىپوداقتار فەدەراتسياسىنىڭ ءتوراعاسى باقىتجان ءابدىرايىم جاستار جىلى اياسىندا ۇيىمداستىرىلىپ وتىرعان ۇنقاتىسۋ الاڭىنىڭ ءمان-ماڭىزىنا توقتالىپ, ومىرلىك ەڭبەك ۇستانىمدارىن, ىنتالاندىرۋ قاعيداتتارىن قالىپتاستىرۋ, جاڭا ماماندىقتاردى مەڭگەرۋ, توعىشارلىق پسيحولوگيادان ارىلۋ, زاڭدى قۇقىقتارىن ءبىلۋ ماسەلەلەرى بويىنشا اشىق تالقىلاۋعا ءبىر كىسىدەي قاتىسىپ, ۇسىنىستار ايتۋعا شاقىردى. ەلىمىزدىڭ قوعامدىق ومىرىندە, ناقتى ەكونوميكا سالاسىندا جاستارىمىزدىڭ الاتىن ورنى زور. ءبىز كاسىپوداق تاراپىنان قوردالانعان تۇيتكىلدەر مەن كەدەرگىلەردى جويۋعا ءار كەز كومەكتەسىپ وتىرامىز. فەدەراتسياعا 2 ميلليونعا جۋىق ادام مۇشە بولسا, ۇشتەن ءبىرى – جاستار. ولاردان بەلسەندى ءىس-قيمىل, باسەكەگە قابىلەتتىلىك قارىمىن كۇتەمىز, دەدى ول.
اقمولا وبلىسىنان كەلگەن داۋلەت ەسقاقوۆ كادر تاپشىلىعىن تەرىسكەي ايماقتارداعى وزەكتى ماسەلەلەردىڭ قاتارىندا اتادى. ول جاس مامانداردىڭ تۇراقتاماۋىن الەۋمەتتىك جاعدايلاردىڭ تولىققاندى جاسالماۋىمەن بايلانىستىردى. اۋىل جاستارى جەكە كاسىپ قۇرۋعا, شاعىن بيزنەسپەن اينالىسۋعا نيەتتەنگەنىمەن شاراسىز. سەبەبى نەسيە الايىن دەسە, كەپىلگە قوياتىن ءدۇنيە-مۇلكى جوق. ەكىنشىدەن, «ديپلوممەن – اۋىلعا!» باعدارلاماسى ارقىلى ورنىققان جاستار ءۇشىن باسپانا ساتىپ الۋعا بەرىلەتىن قاراجاتتىڭ كولەمىن 2000 ايلىق ەسەپتىك كورسەتكىشكە دەيىن ۇلعايتقان دۇرىس. قازىر نارىقتاعى ۇيلەردىڭ باعاسى قىمبات. ۇشىنشىدەن, وندىرىستىك تاجىريبەگە كەلگەن ستۋدەنتتەر ىشكى جاڭالىقتاردان حابارسىز بولىپ جاتادى. سوندىقتان ۇيرەتۋشى تالىمگەرلەر, كۋراتورلار تاعايىنداۋ ءداستۇرىن قايتا جاڭعىرتقان ءجون.
پەتروپاۆلداعى ءى.ءداۋىتوۆ اتىنداعى قىزمەت كورسەتۋ سالاسى كوللەدجىنىڭ ستۋدەنتى سنەجانا بەلدىڭ ايتۋىنشا, تەحنيكالىق ءبىلىم بەرۋ ۇيىمدارىندا ماتەريالدىق-تەحنيكالىق بازا ەسكىرگەن, جاڭالاۋدى قاجەت ەتەدى. ءتىپتى قاراپايىم قۇرال-جابدىقتاردىڭ ءوزى قات. زاماناۋي قۇرىلعىلاردى قالاي پايدالانۋدى بىلمەگەندىكتەن كاسىبي ءبىلىم كەمشىن ءتۇسىپ جاتادى. وندىرىستىك ءتاجىريبەدەن وتكەندەرگە ەڭبەكاقى تولەۋ ۇسىنىسى دا اياقسىز قالىپ كەلەدى. وسى جاعىنان جۇمىس بەرۋشىلەردى ءمىندەتتەيتىن پارمەندى شارا كەرەك سەكىلدى. قوستاناي وبلىسى س.بايماعامبەتوۆ اتىنداعى اۋليەكول مەكتەپ-گيمنازياسىنىڭ مۇعالىمى اناستاسيا جۋكوۆا شەتەلدەردە تاجىريبە جيناقتاۋعا مۇمكىندىك بەرىلسە دەگەن ءوتىنىشىن ايتتى. مەن اعىلشىن ءتىلىن ۇيرەنۋ كۋرسىنان ءوتتىم. ءبىلىمىمدى ودان ءارى جەتىلدىرگىم, تولىقتىرعىم كەلەدى. سىرت جەرلەردە ءبىلىم بەرۋدىڭ, وقىتۋدىڭ تىڭ تاسىلدەرىمەن تانىسۋ ارتىقتىق ەتپەس ەدى, دەدى جاڭاشىل ۇستاز.
جينالعاندار اۋىل شارۋاشىلىعى سالاسىنىڭ ناعىز كاسىپ يەسى, ءۋاليحانوۆ اۋدانى «جولداسباي-اگرو» جشس-ءنىڭ باقتاشىسى راۋان ءبراليننىڭ ءسوزىن ۇيىپ تىڭدادى. توگىلگەن تەردىڭ وتەۋى رەتىندە كەۋدەسىندە ءىىى دارەجەلى «ەڭبەك داڭقى» وردەنى جارقىرايدى. ول بار باقىتىن اۋىلدان تاۋىپ, كاسىبي بىلىكتىلىكتىڭ وزىق ونەگەسىن كورسەتىپ كەلەدى. «ەڭبەك ەتسەڭ ەمەرسىڭنىڭ» ءبىر مىسالى! رەسپۋبليكالىق اۋىل شارۋاشىلىعى ارداگەرلەرى كەڭەسى باسقارماسىنىڭ توراعاسى ميحايل تروشيحين, «Akademy of labour relations» مەكەمەسىنىڭ باس ديرەكتورى بيبىگۇل نۇراشەۆا, سولتۇستىك قازاقستان وبلىستىق كاسىپوداقتار ءبىرلەستىگىنىڭ جەتەكشىسى ەرىك نۇراقاەۆ, جەرگىلىكتى كاسىپكەرلەر پالاتاسىنىڭ ديرەكتورى دارحان قاليەۆ, تاعى باسقالار جاساعان باياندامالارى مەن سويلەگەن سوزدەرىندە جاس مامانداردىڭ ەڭبەك جولىندا كەزدەسەتىن كەدەرگىلەردى ەڭسەرۋدىڭ جولدارىن ورتاعا سالدى.
ەسىل اۋدانى «ازيا-توراڭعۇل» جشس-ءنىڭ باسشىسى ا.گولتسەردىڭ جاستارعا دەگەن قامقورلىعى وزگەلەرگە ۇلگى ەتىلدى. مۇندا ونداعان باسپانا, فەلدشەرلىك-اكۋشەرلىك پۋنكت تۇرعىزىلىپ, مادەنيەت ءۇيى قالپىنا كەلتىرىلىپتى. مامانداردى قىسقا مەرزىمدى كۋرستاردا وقىتىپ, شەبەرلىگىن جەتىلدىرۋ ماقساتىمەن جىلىنا 1,5 ميلليون تەڭگە باعىتتالادى. «اقسەلەۋ», «نەجينكا-ەركە», «مامبەتوۆ جانە ك», «گۋساكوۆكا», «قوس اعاش» سەكىلدى شارۋاشىلىقتاردا دا جاس ماماندار ءۇشىن بىرقاتار الەۋمەتتىك جەڭىلدىكتەر قاراستىرىلعان.
ب.ءابدىرايىم كاسىپوداقتار قوزعالىسىنىڭ بەلسەندىلەرىنە 300 مىڭ تەڭگەنىڭ اقشالاي سەرتيفيكاتتارىن تابىس ەتتى.
