الدىن الا ەسەپتەۋ بويىنشا پەنجىمدەگى 270 ءۇيدىڭ اۋلاسىن سۋ باسىپ, اۋىل كوشەلەرىندەگى قوزعالىس قيىنداعان. قازىر وقيعا ورنىندا ارنايى كوميسسيا جۇمىس ىستەۋدە. ال توتەنشە جاعداي تۋرالى حابار جاريا بولىسىمەن, اۋىلعا ارنايى توپ جىبەرىلگەن. توتەنشە جاعدايلار باسقارماسى مەن «قازسەلدەنقورعاۋ» مەكەمەسىنىڭ ارنايى جاساعى جانە اسكەري قىزمەتكەرلەردەن قۇرالعان 200 ادام قىرىق شاقتى تەحنيكامەن جايىلعان سۋدى سورىپ, كوشەدەگى قاتىناستى قالپىنا كەلتىرگەن. اۋىلدىڭ سۋ شايعان كوشەلەرىنە قۇم توسەلىپ, كولىكتەر ءجۇرەتىن جولدار جاسالدى. سەل تاسقىنىنان تۇرعىن ۇيلەر مەن ادامدار زارداپ شەككەن جوق.
– 3 ماۋسىم كۇنى پەنجىم اۋىلدىق وكرۋگىندە توقتاۋسىز جاۋعان جاڭبىردان كەيىن سەل ءجۇرىپ, 270 ءۇيدىڭ اۋلاسىنا سۋ جايىلدى. تۇرعىن ۇيلەرگە قاۋىپ تونگەن جوق, ادامدار ءدىن امان, مال باسى تۇگەل. قازىر ارنايى كوميسسيا ءار ءۇيدى تەكسەرىپ, ماتەريالدىق شىعىنداردى انىقتاۋعا كىرىستى. اۋىل تۇرعىندارىنا قاجەتتى كومەك كورسەتىلۋدە. جەرگىلىكتى كاسىپكەرلەر وتباسىلارعا ازىق-ت ۇلىك تاراتىپ, ىستىق تاماقپەن قامتاماسىز ەتۋدى قولعا الدى. اۋىلدا جارىق, سۋ تاراتۋ جۇيەسى قالىپتى جۇمىس ىستەپ تۇر, – دەدى بىزگە پانفيلوۆ اۋدانىنىڭ اكىمى تەمىرلان بەكتاسوۆ.
جالپى, پانفيلوۆ اۋدانىندا سەل ءجۇرۋ قاۋپى سوڭعى ون جىلدان بەرى تىركەلمەگەن ەكەن. ال پەنجىم اۋىلىنىڭ تۇرعىندارى ءدال مۇنداي سەل تاسقىنى 1990 جىلى بولعانىن ايتادى.
