الاتاۋ اۋدانىنداعى كولىك جانە ينجەنەرلىك ينفراقۇرىلىمنىڭ, سونىمەن قاتار الەۋمەتتىك جانە تۇرعىن ءۇي وبەكتىلەرىنىڭ قۇرىلىس قارقىنىن تەكسەرگەن الماتى اكىمى باۋىرجان بايبەك اۋدانىنداعى 440-تان استام كوشەگە جاڭا جولدار سالۋ ءۇشىن جەرگىلىكتى بيۋدجەتتەن قوسىمشا 4 ملرد تەڭگە ءبولۋدى تاپسىردى.
ەگەر 3 جىل ىشىندە مۇندا 15 كم جول توسەلسە, ەندى جوندەۋ جۇمىستارى اياقتالعان سوڭ 13 ىقشام اۋدان تۇرعىندارى 118 كم جاڭا جولعا يە بولادى. اۋداندا ورتاشا جانە اعىمداعى جوندەۋ جۇمىستارى قاتار جۇرۋدە. ۇزىندىعى 3,2 كم بولاتىن سايىن كوشەسىن رىسقۇلوۆتان اقىن ساراعا دەيىن ۇڭگىلەۋگە قارجى ءبولىندى.
الەۋمەتتىك جەلىلەردەگى وتىنىشتەردى قاراپ شىققان الماتى اكىمى سايالى-2 ىقشام اۋدانىنداعى «نۇرلى جەر» باعدارلاماسى بويىنشا سالىنعان ۇيلەردى بارىپ كوردى. باۋىرجان بايبەك قۇرىلىسشىلاردىڭ نازارىن اۋلا اۋماعىن اباتتاندىرۋداعى ولقىلىقتارعا اۋدارىپ, ءۇيدى پايدالانۋعا بەرۋدى جەدەلدەتۋدى تاپسىردى.
قالانىڭ ءباسپسوز قىزمەتىنىڭ مالىمەتتەرى بويىنشا, «ەلباسى باستاماسىنىڭ ارقاسىندا الاتاۋ اۋدانىندا «نۇرلى جەر» باعدارلاماسى بويىنشا قۇرىلىس كەڭ قانات جايۋدا. وتكەن جىلى ەكى مىڭ وتباسى جەكە پاتەرلەرىنە يە بولدى. بيىلعى جىلى دا بىرنەشە تۇرعىن ءۇيدى ىسكە قوسۋ جوسپارلانعان. تۇرعىندار سانىنىڭ ارتۋىنا وراي كولىككە قاتىستى ماسەلە تۋىنداۋى مۇمكىن, ونى الدىن-الا شەشۋ قاجەت. سوندىقتان قالالىق موبيلدىلىك باسقارماسى اكىممەن بىرگە الاتاۋ اۋدانىن قوعامدىق كولىكتىڭ جاڭا باعىتتارىمەن قامتاماسىز ەتۋى ءتيىس», - دەپ اتاپ ءوتتى باۋىرجان بايبەك.
ايتا كەتەرلىگى, الاتاۋ اۋدانىندا يندۋستريالدى ايماققا جاقىن جەردە گازبەن جۇرەتىن 200 اۆتوبۋسقا ارنالعان جاڭا اۆتوبۋس پاركىنىڭ قۇرىلىسى اياقتالىپ قالدى. «باتۋ travel» كومپانياسى 130 اۆتوبۋستىق جەكە اۆتوپارك سالۋدا. وسىلايشا, قالانىڭ قوعامدىق كولىگىنە قىزمەت كورسەتەتىن جانە ۇستاپ تۇراتىن كاسىپورىندار كلاستەرى قالىپتاسۋدا.
الاتاۋ اۋدانىنا جاساعان جۇمىس ساپارى بارىسىندا باۋىرجان بايبەك جەتى مىڭ ورىندى جاڭا مەشىت قۇرىلىسىنىڭ قارقىنىن تەكسەردى. جەكە ينۆەستيتسيا ەسەبىنەن سالىناتىن نىسان جوباسىندا مەشىتتە بيىكتىگى 49 مەترگە دەيىن جەتەتىن بىرنەشە مۇنارالار بولادى. كەشەننىڭ ورتا تۇسىنا بەس كۇمبەزدى نەگىزگى عيمارات ورنالاسادى.
بۇرىندارى قۇرىلىس مەرزىمى ۋچاسكەنى سۋ باسىپ قالۋ قاۋپىنەن ساقتاۋ ءۇشىن جۇرگىزىلگەن ينجەنەرلىك قورعاۋ جۇمىستارىنا بايلانىستى ۇزارعان ەدى. قازىرگى كەزدە 3 مىڭ سۆاي بەكىتىلدى جانە ىرگەتاسى بەتوندالدى. نەگىزگى بلوكتىڭ ارماتۋرالى قابىرعالارىن ورناتۋ باستالدى.
جالپى 10 جىل ىشىندە قالاعا قوسىلعان اۋدانعا 430 ملرد. استام تەڭگە جۇمسالدى. 12 مەكتەپ, 5 ەمحانا, 98 مەملەكەتتىك جانە جەكە بالا باقشالار, بىرقاتار سپورت جانە مادەنيەت وبەكتىلەرى ىسكە قوسىلدى. «ۋنيۆەرسيادا مۇراسى» جوباسى بويىنشا كەزەكتە تۇرعانداردىڭ 1,7 مىڭى اتلەتتەر اۋىلىنان جايلى پاتەرلەر الدى.
اۋداننىڭ يندۋستريالدى ايماعىندا جاپوندىق, كورەيلىك, رەسەيلىك, قىتايلىق, يتالياندىق جانە وزگە دە شەتەلدىك ينۆەستيتسيالار ەسەبىنەن 39 جوبا جۇزەگە اسۋدا. بيىلعى جىلى قۇنى 37,6 ملرد. تەڭگە بولاتىن ءتورت جوبانى ىسكە قوسۋ جوسپارلانعان.
الماتى
