وسى ورايدا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ: «مەملەكەتتىك رامىزدەر – بۇل ءبىزدىڭ مەملەكەتىمىزدىڭ, ءبىزدىڭ ەگەمەندىگىمىزدىڭ بەرىك نەگىزىنىڭ ءبىرى. ولار تاۋەلسىزدىكتىڭ قاسيەتتى بىرىكتىرۋشى وبرازىن ءبىلدىرەدى», دەگەن سوزدەرى ويعا ورالادى. دەمەك, مەملەكەتتىك رامىزدەر مەن تاۋەلسىزدىك ۇعىمدارىن ءاستە ءبولىپ قاراۋعا بولمايدى. ال ءتاۋەلسىزدىك – اتا-بابالارىمىز اڭساعان ارمان, كوزىمىزدىڭ قاراشىعىنداي ساقتايتىن قازىنامىز.
ءسوزدىڭ ورايى كەلىپ تۇرعاندا ايتۋعا تۇراتىن ءبىر ماسەلە بار. جۋرناليست رەتىندە ەلباسىنىڭ شەتەلگە ساپارلارىن اقپاراتتىق سۇيەمەلدەۋ ماقساتىندا بىرنەشە ەلدىڭ تابالدىرىعىن اتتاپ, سونداي-اق ەلىمىزدە وتكىزىلەتىن اۋقىمدى ءىس-شارالارعا قاتىسۋعا تۋرا كەلەدى. سونداي ءۇلكەن جيىنداردا قاتىسۋشى مەملەكەتتەردىڭ تۋلارىن تورگە شىعارۋ – حالىقارالىق قاعيدا. سونداياق اسىرەسە شەت مەملەكەتتەرگە شىققاندا الدىمەن تۋىمىزدىڭ وزگە مەملەكەتتەردىڭ بايراقتارىمەن قاتار تۇرعانىنا, كوبىنە اسپان تۇستەس تۋىمىزدىڭ ورنالاسۋىنا دەيىن ءمان بەرەتىنىم راس. ال ەلباسىنىڭ مەملەكەتتىك ساپارلارى كەزىندە تۋىمىزدىڭ جول بويىنا قاتارلاستىرا, كوشە بويلاپ ىلىنگەنىن كورگەن ساتتە مەملەكەت پەن مەملەكەتتىك سيمۆول ۇعىمدارىنىڭ استاسىپ كەتكەندىگىن اڭعارۋعا بولادى. الەمدە قانشا ۇلت بولعانىمەن, تۋىن قادايتىن اتامەكەندەرى جوق, تاۋەلسىزدىكتەرىن اڭساعان ەلدەر ەلتاڭبالارىن ىلەتىن ماڭدايشا تاپپاي ءجۇر.
ال قازاقستان تاۋەلسىز مەملەكەت رەتىندە دەربەس مەملەكەتتىك ءراسىمدەرىن بەكىتىپ, ايگىلەگەنىنە دە بيىل, تاۋبە, 27 جىل تولىپ وتىر.
وتكەن جىلى مەملەكەتتىك رامىزدەرىمىزدىڭ ءبىرى – ەلتاڭبامىزعا قاتىستى ەلەۋلى وزگەرىس بولدى. اتاپ ايتقاندا, ەلباسىنىڭ «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» جارلىعىنا سايكەس ەلتاڭبامىزداعى «قازاقستان» ءسوزى «QAZAQSTAN» بولىپ جازىلا باستادى. بۇل دا بولسا, ەلىمىزدىڭ, ۇلتىمىزدىڭ بولاشاققا دەگەن ۇمتىلىسىنىڭ نىشانى. ورايى كەلگەندە ايتار بولساق, بۇرىنعى نۇسقادا جاسالعان ەلتاڭبالاردى پايدالانۋ مەرزىمى جەتكەنشە, ياعني 2022 جىلعا دەيىن قولدانا بەرۋگە بولادى.
مەملەكەتتىك ەلتاڭبانىڭ ورتالىق گەرالديكالىق ەلەمەنتى – كوگىلدىر ءتۇس اياسىنداعى شاڭىراق (كيىز ءۇيدىڭ جوعارعى كۇمبەز ءتارىزدى بولىگى) بەينەسى, شاڭىراقتى اينالا كۇن ساۋلەسى سەكىلدى تاراعان ۋىقتار, شاڭىراقتىڭ وڭ جاعى مەن سول جاعىنا اڭىزدارداعى قاناتتى پىراقتار, جوعارعى بولىگىندەگى كولەمدى بەس بۇرىشتى جۇلدىز بەينەسى سول كۇيىندە ساقتالىپ, «QAZAQSTAN» التىن ءتۇستەس جازۋى بار ەلتاڭبانىڭ العاشقىسى اقوردا رەزيدەنتسياسىنا ءىلىندى.
انەبىر جىلدارى كوكبايراعىمىزدى قورلاۋ دەرەكتەرى بويىنشا بىرقاتار وقيعا قىلاڭ بەردى. بۇگىندە الەۋمەتتىك جەلىنىڭ داۋرەنى ءجۇرىپ تۇرعان ۋاقىتتا كەز كەلگەن ەرسى كورىنىس قوعام نازارىنان تىس قالمايتىنى بەلگىلى. ارينە, ول وقيعالار بويىنشا كىنالىلەر قۇقىقتىق قۋدالاۋعا ۇشىراپ, ءتيىستى جازالارىن الدى.
الايدا زاڭعا سۇيەنگەن پوليتسەيلەر مەن جەرگىلىكتى ىشكى ساياسات ورگاندارىنىڭ تۋىمىزدى ەلدىك ماقتانىش, ىشكى سەزىمى بويىنشا تورىنە ءىلىپ, توبەسىنە شىعارۋعا بايلانىستى ءالى دە ءبىر ورتاق ۇستانىمى جوق سياقتى. قۇقىقتىق نەگىزدەر بولعانىمەن, ونى ۇلتتىق پاتريوتيزم سەزىمدەرىمەن تۇيىستىرەر نۇكتەسى تابىلماي جۇرگەنى وكىنىشتى. دەمەك, ەلىمىزدە تۋدى ۇيىنە ىلگەن ادامنىڭ جازالانۋى دا بەك مۇمكىن. قيسىنسىزدىق, قيعاشتىق دەگەن وسى.
ايتالىق, قازىر كاسىبي بوكسشىلاردان باستاپ باسقا دا سپورتشىلار شەتەلدەردەگى جارىسىنا مەملەكەتتىك تۋدى مىندەتتى تۇردە ارقالاي بارادى. رينگتە جەڭىسكە جەتكەن بويدا باپكەرلەرى ونىڭ يىعىنا سول ساتتە مەملەكەتتىك تۋدى ءىلىپ, جەڭىمپازىمىز شارشى الاڭدى اينالا جۇگىرەدى. بۇل ءوزى الەمدىك قالىپتاسقان قاعيدا. الايدا ءدال وسىنداي جاعداي ءتيىستى زاڭداردا كورسەتىلمەگەن. سوندا ەلىمىزدىڭ اتىن الەمگە شىعارعان سپورتشى جازالانۋى كەرەك پە؟ بۇل ساۋالدىڭ ىشكى استارىنا بۇرىن وليمپيا ويىندارىنىڭ جەڭىمپازى ولگا رىپاكوۆا بىلاي جاۋاپ قاتقان ەدى.
«كەز كەلگەن سپورتشى ءۇشىن مەملەكەتتىك تۋ مەن ءانۇراننىڭ ورنى بولەك ەكەنى داۋسىز. تۋ مەن ءانۇران عانا ەمەس, جالپى مەملەكەتتىك رامىزدەردىڭ قادىرىن وزگەلەردەن گورى سپورتشىلار قاۋىمى جاقسى بىلەدى دەپ ويلايمىن. ال ەندى مەملەكەتتىك تۋدىڭ كوتەرىلگەن ءساتىن, اسىرەسە اسپان تۇستەس بايراقتى ءوزىڭ كوتەرىپ, يىعىڭا جامىلعان كەزدەرىڭدى سوزبەن جەتكىزۋ قيىن. مۇنداي كەزدە قارا باسىڭ ءۇشىن عانا شاتتانبايسىڭ, ساعان ءۇمىت ارتقان ارتىڭداعى قارا ورمانداي ەلىڭ ءۇشىن, بايتاق جەرىڭ ءۇشىن ماقتانىپ, ماساتتاناسىڭ», دەگەن ەدى داڭقتى سپورتشى قىز.
ال قازاقستاننىڭ مەملەكەتتىك گيمنى تۋرالى ايتار بولساق – ونىڭ باستى ارتىقشىلىعى دا, ۇتىمدىلىعى دا – كەڭ تانىمالدىلىعىمەن دە استاسىپ جاتىر.
قازىر گيمن وينالعان كەز كەلگەن ساتتە ءاربىر وتانداسىمىز قوسىلا شىرقاپ, اينالانى رۋحتاندىرا, جىگەرلەندىرە تۇسەدى.
نەگىزى ەل گيمنىنە ارقاۋ بولعان «مەنىڭ قازاقستانىم» ءانىن ءشامشى قالداياقوۆ 1956 جىلى جۇمەكەن ناجىمەدەنوۆتىڭ سوزىنە جازعاندىعى بارشاعا بەلگىلى. قازاقستان پرەزيدەنتى نۇرسۇلتان نازارباەۆ انگە مەملەكەتتىك گيمن جوعارى مارتەبەسىن بەرۋ جانە اناعۇرلىم سالتاناتتى شىرقالۋى ءۇشىن مۋزىكالىق تۋىندىنىڭ باستاپقى ءماتىنىن ءوڭدەدى. ال پارلامەنت 2006 جىلى 6 قاڭتاردا پالاتالاردىڭ بىرلەسكەن وتىرىسىندا «مەملەكەتتىك رامىزدەر تۋرالى» جارلىققا ءتيىستى تۇزەتۋ ەنگىزىپ, ەلىمىزدىڭ جاڭا مەملەكەتتىك گيمنىن بەكىتتى.
ال ناعىز شىنايىلىقتىڭ, ۇلتجاندىلىقتىڭ ۇلگىسىن بالاباقشالارداعى كىشكەنتاي ءتاربيەلەنۋشىلەر كورسەتىپ ءجۇر. الەۋمەتتىك جەلىلەردە كەڭ تارالعان جازبالاردا وزدەرىن ناعىز ەلدىڭ يەسى, جەردىڭ يەسى رەتىندە سەزىنىپ, ءانۇران شىرقالعان بويدا قولدارىن ءجۇرەكتەرىنىڭ تۇسىنا قويىپ, ساپ تۇزەۋگە اسىعا جۇگىرىپ, گيمندى قوسىلا شىرقاعان بالدىرعاندار كوپ ەرەسەكتەرگە ۇلگى بولىپ كەلەدى.
مەملەكەتتىك گيمنمەن استاسىپ جاتقان تاۋەلسىزدىكتىڭ تىرەگى دە, يەسى دە ەكەنىن سول بالدىرعاندارىمىز لۇپىلدەگەن جۇرەكتەرىمەن سەزىنىپ ءجۇر.
رامىزدەر كۇنى قۇتتى بولسىن!
