سوڭعى كۇنى اۆتوشاباندوزدار 290 شاقىرىم قاشىقتىقتى باعىندىردى. ارنايى ۋچاسكەنىڭ جارتىسىنان استامى «راللي قازاقستان» ءۇشىن جاڭا اۋماقتار بولدى. 65 كيلومەتردەن كەيىن دالا جولدارى رالليستەردى قىزىلقۇم ءشولىنىڭ قۇمدى القابىنا اكەلدى, ال بۇل جەردە قازاقستاندىق كەزەڭ بۇرىن ءوتىپ كورمەگەن. سودان كەيىن دالا جولدارى مەن سور جولدار باستالدى, ال 277 كيلومەتردە مارشرۋت تاس القابى ارقىلى ءوتتى, ول جەردە جىلقىلار مەن تۇيەلەر جايىلاتىن كوپتەگەن قۇدىقتار كەزدەستى.
بەسىنشى ارنايى ۋچاسكەنى ءبىرىنشى بولىپ يازيد ءال-رادجي مەن ديرك فون تسيتسەۆيتستىڭ ەكيپاجى 2 ساعات 58 مينۋت ناتيجەسىمەن باسىپ ءوتتى. بۇل - كوماندانىڭ بەس كەزەڭدەگى ەكىنشى جەڭىسى. ەگەر ءۇشىنشى كەزەڭنىڭ مارەسىندە سپورتتىق ەرەجەنى بۇزعانى ءۇشىن 4 ساعاتتىق پەناليزاتسيا بولماعاندا, ەكيپاج «راللي قازاقستان 2019» جارىسىندا ءبىرىنشى ورىنعا تالاسار ەدى. قازىر ەكيپاج جالپى ەسەپتە تەك 7-ءشى ورىندا.
فرانتسۋز اۆتوشاباندوزى ستەفان پەتەرانسەل جالپى ەسەپتە ءوز پوزيتسياسىن جاقسارتۋدى جالعاستىرۋدا. بۇگىن ەرلى-زايىپتى ستەفان مەن اندرەا پەتەرانسەلدىڭ ەكيپاجى كۇننىڭ ەكىنشى ناتيجەسىن كورسەتتى. وسى جەتىستىكتىڭ ارقاسىندا ولار ءتورتىنشى ورىننان ەكىنشى ورىنعا كوتەرىلىپ, جارىس كوشباسشىسى ناسسەر ء ال-اتتيادان جالپى ەسەپتە 5 مينۋت جانە 38 سەكۋندقا ارتتا كەلەدى.
- كەشە ءبىز ءتورتىنشى ورىندا بولدىق. بۇگىن, ارينە, وعاش جاعداي بولدى. ءبىزدىڭ الدىمىزدا بولعان ءۇش اۆتوجارىسشى تەحنيكالىق پروبلەمالارعا تاپ بولدى. ناسسەر 30 مينۋت جوعالتتى, مەنىڭ بىلۋىمشە, قالعاندارى ودان دا كوپ. بىراق قازىر ءبىز ەكىنشىمىز, بۇل ءبىز كۇتكەندەگىدەن جاقسى. ەرتەڭ ءبىز ناسسەرگە قىسىم كورسەتۋگە تىرىسامىز جانە ودان نە شىعاتىنىن كورەمىز. بۇل - تەحنيكالىق سپورت, سوندىقتان بىزدە مۇمكىندىك بار دەپ ايتۋعا بولادى, دەدى ستەفان پەتەرانسەل فينيشتەن كەيىن.
بۇگىن تەز تەگىس جولداردا پەترانسەل ەكيپاجى بارىنشا ەكپىندى, ال كۇردەلى تاستى جانە قۇمدى ايماقتاردا وڭتايلى مارشرۋتتى تاڭداپ, تەحنيكالىق سىنۋلار مەن دوڭگەلەكتەردى تەسىپ الۋدان اۋلاق بولۋعا ۇمتىلدى. وسىلايشا, كوپ جىلدىق تاجىريبە, ەسەپ جانە ساتتىلىك بۇگىن ەرلى-زايىپتىلار ەكيپاجىنا كۇندى ءساتتى اياقتاۋعا كومەكتەستى.
چەحيالىق اۆتوجارىسشى ميروسلاۆ زاپلەتال ءوزىنىڭ Hummer H3 Evo VII-گە مارە سىزىعىن ءۇشىنشى رەت كەسىپ ءوتىپ, تۋرنير كەستەسىندە ءوز ناتيجەسىن جاقسارتتى. قازىر ميروسلاۆ زاپلەتال مەن مارەك سيكورانىڭ ۇجىمى ءتورتىنشى ورىندا تۇر, الايدا ولار مەن ءۇشىنشى ورىن اراسىنداعى الشاقتىق 45 مينۋتتى قۇرايدى.
2017 جانە 2018 جىلدارداعى «راللي قازاقستان» كۇمىس جۇلدەگەرى ياكۋب پشيگونسكي ءۇشىن بەسىنشى ارنايى ۋچاسكەدە كۇن وتە ءساتسىز بولدى. ناسسەردىڭ كولىگى جول ورتاسىندا توقتاپ قالعان سوڭ, بۇگىن ول جەڭىسكە اناعۇرلىم جاقىن بولدى. الايدا, اۆتوشاباندوز شۇڭقىرعا ءتۇسىپ, ونىڭ ءاۆتوموبيلى اۋدارىلىپ قالدى.
- كۇن قالىپتى ءوتتى. كۋبا جاقسى ايدادى. 160 شاقىرىمدا مەن ونى ەسكەرتىپ ۇلگەرمەدىم, الدىمىزدا جول كىتابى بويىنشا «ەكى ەسە قاۋىپتى» شۇڭقىر بولدى جانە ءبىز اۋدارىلىپ قالدىق. كۋبادا تەجەپ ۇلگەرۋگە مۇمكىندىك بولمادى. كوپ ۋاقىت ءوتتى, ءبىز ودان ءارى جۇرە الدىق. سودان كەيىن بىزدە ەلەكترونيكامەن پروبلەما تۋىندادى, مۇمكىن, ول اپات سالدارىنان. سىنعان بولشەكتى تابۋ ءۇشىن كوپ ۋاقىت جۇمسادىق. جارىستا مۇنداي نارسەلەر ورىن الادى. ءبىز مارەگە جەتكەنىمىزگە قۋانىشتىمىز, دەدى ياكۋب پشيگونسكيدىڭ شتۋرمانى تيمو گوتتشالك.
جارىستىڭ تاعى ءبىر ءفاۆوريتى - نيدەرلاندتىق بەرنحارد تەن برينكە مەن توم كونسۋل كومانداسى ءۇشىن دە كۇن ءساتسىز اياقتالدى. جولدا ەكيپاج Toyota Hilux كولىگىنىڭ ءجۇرىس بولشەگىن ىستەن شىعىپ, قۇمدى تۇرىپ قالدى. ودان ولار جاعدايدى تۇزەپ, العا جىلجىدى, الايدا اۆتوكولىكتە جىلدامدىق اۋىستىرۋ قورابى جۇمىس ىستەمەي قالدى. جارىسۋشىلار مەحانيزمدى جوندەگەننەن كەيىن, بەنزين مەن مايدىڭ ءيىسىن سەزىنگەنى ايتادى. جالپى العاندا 1 ساعات 50 مينۋتتى جوعالتىپ, ەكيپاج ودان ءارى كولىكپەن تاۋەكەلگە بارمادى جانە جارىستى ودان جالعاستىرماۋدى شەشتى.
«Toyota Hilux» اۆتوكولىگىندە ونەر كورسەتەتىن "داكار 2019" راللي-مارافونىنىڭ جەڭىمپازى ناسسەر ءال-اتتيا «راللي قازاقستان 2019» كەزەڭىنىڭ ءفاۆوريتى مارتەبەسىن ساقتاپ قالدى, جانە بۇگىن ءتورتىنشى بولىپ مارە سىزىعىن كەستى.
- قيىن كۇن. 50 كيلومەتردەن كەيىن ءبىزدىڭ اۆتوكولىك ءارى جۇرمەي توقتاپ قالدى. ءبىز سەبەبىن بىلمەدىك. 45 مينۋت تۇردىق, سودان كەيىن ماشينا وتالدى. ءبىز ودان ءارى كۇرەسە بىلدىك, ارنايى ۋچاسكەنىڭ قالعان بولىگىن جاقسى وتتىك. كوپ ۋاقىت جوعالتقانىمىز راس, بىراق ءبىز كەستەنىڭ باسىندا تۇرمىز, ەرتەڭ ءبىز بارىمىزدى سالامىز, دەدى مارەگە جەتكەندە ناسسەر ءال-اتتيا.
T2 جول تالعامايتىن كولىكتەر ساناتىندا قازاقستاندىق ەكيپاج كيريلل چەرنەنكوۆ مەن الەكسەي مۋننىڭ ەكيپاجى جارىستىڭ بەسىنشى كۇنىن 4 ساعات 57 مينۋت جانە 49 سەكۋند ناتيجەسىمەن جەڭىپ الدى. وسىعان قاراماستان, اتالمىش كاتەگورياداعى تۋرنير كەستەسىن كاتار شاباندوزى موحامەد ەل-مەەر كومانداسى باستاپ تۇر.
ت3 ساناتىندى بۇگىن ەڭ جىلدام ۋاقىتتى برازيليادان كەلگەن اۆتوجارىسشى رەينالدو ۆارەلا كورسەتتى, ول 4 ساعات 19 مينۋت جانە 22 سەكۋند ناتيجەسىمەن مارەگە جەتتى.
جۇك سەرياسىندا رەسەيلىك "كاماز-ماستەر" كومانداسىنان دميتري سوتنيكوۆقا باسەكەلەس بولمادى, ونىڭ ەكيپاجى بەسىنشى كۇننىڭ قاشىقتىعىن 3 ساعات 32 مينۋت جانە 9 سەكۋندتا ءجۇرىپ ءوتتى.
1 ماۋسىم, قورىتىندى كۇنى اۆتوشاباندوزدار اقتاۋ قالاسىنان سولتۇستىككە قاراي وتەتىن ەڭ قىسقا 149 شاقىرىمدىق ارنايى ۋچاسكەلەردى ءجۇرىپ وتەدى جانە كاسپي تەڭىزىنىڭ جاعاسى بويىمەن قازاقستاندىق كەزەڭدى اياقتايدى.
