كەزدەسۋ بارىسىندا ەكىجاقتى ىنتىماقتاستىقتى, ونىڭ ىشىندە پارلامەنتارالىق ۇنقاتىسۋدى تەرەڭدەتۋ ماسەلەلەرى تالقىلاندى. تاراپتار قازاقستان سەناتى مەن اقش كونگرەسىنىڭ اپپارات قىزمەتكەرلەرى اراسىنداعى بايلانىستاردى ودان ءارى دامىتۋ جايىندا ايتتى.
ساۋدا-ەكونوميكالىق, اتاپ ايتقاندا, شيكىزاتتىق ەمەس سەكتورداعى ىنتىماقتاستىقتىڭ كەلەشەگى تالقىلاندى. وتكەن جىلى ءبىزدىڭ ەلدەرىمىز اراسىنداعى تاۋار اينالىمى 37 پايىزعا ءوسىپ, 2,24 ملرد دوللاردى قۇرادى. بۇل رەتتە قازاقستاننىڭ اقش-قا ەكسپورتى 2,5 ەسەگە ءوستى. «ءبىز وسى جەتىستىكتەردى ماقتان تۇتامىز», دەدى ۋيليام موزەر.
اقش ەلشىسى امەريكالىق كومپانيالار ەت ونىمدەرىن ەاەو جانە قىتاي نارىعىنا ەكسپورتتاۋ جونىندەگى بىرلەسكەن جوبالارعا مۇددەلى ەكەنىن اتاپ ءوتتى. سەنات باسشىسى اگروونەركاسىپ سەكتورىندا جۇرگىزىلگەن رەفورمالار, باسقا دا وزەكتى ماسەلەلەر تۋرالى ايتىپ, امەريكالىق ارىپتەستەرىن وزدەرىنىڭ وزىق تاجىريبەلەرىمەن الماسۋعا شاقىردى.
قازاقستان مەن اقش-تىڭ ايماقتىق قاۋىپسىزدىكتى قامتاماسىز ەتۋ سالاسىنداعى ىنتىماقتاستىعى تۋرالى ايتا كەلىپ, تاراپتار اۋعانستانداعى قاقتىعىستى رەتتەۋدەگى ءوزارا ءىس-قيمىلدىڭ ماڭىزدى ماسەلەلەرىن اتاپ ءوتتى. د.نازارباەۆا قازاقستاندا وتكەن «اۋعانستانداعى ايەلدەردىڭ قۇقىقتارى مەن مۇمكىندىكتەرىن كەڭەيتۋ» كونفەرەنتسياسى تۋرالى, اۋعان قىزدارىن ءدارىگەرلىك ماماندىقتارعا وقىتۋ ءجونىندەگى قازاقستان, وزبەكستان جانە ەو-مەن ۇشجاقتى باعدارلامانىڭ ىسكە قوسىلعانى تۋرالى حاباردار ەتتى.
وسىعان بايلانىستى ايەلدەردىڭ جاھاندىق دامۋى مەن وركەندەۋى ءجونىندەگى يۆانكا ترامپ باستاماسىنىڭ ماڭىزى اتاپ ءوتىلدى. جوبا دامۋشى ەلدەردەگى 50 ملن ايەلگە ءوزىنىڭ ەكونوميكالىق الەۋەتىن جۇزەگە اسىرۋعا كومەكتەسۋگە ارنالعان. «ءبىز ءوڭىر ايەلدەرىنە وزدەرىنىڭ ەكونوميكالىق الەۋەتىن جۇزەگە اسىرۋعا مۇمكىندىك بەرۋ ءۇشىن وسى باستامانى ورتالىق ازيا مەن اۋعانستاندا جۇزەگە اسىرۋ ماقساتىندا ىنتىماقتاسۋعا دايىنبىز», دەپ اتاپ ءوتتى د.نازارباەۆا.
