جيىندى اشقان سەنات توراعاسىنىڭ ورىنباسارى سەرگەي گروموۆ 13-ءشى وتىرىستىڭ قورىتىندىسى ءوزىنىڭ ناتيجەسىن كورسەتكەنىن ەسكە ءتۇسىرىپ ءوتتى. بىزدەردىڭ ەلدەرىمىز اراسىنداعى پارلامەنتارالىق ىنتىماقتاستىق جاڭا دەڭگەيگە كوتەرىلىپ, قولدانىستاعى كەيبىر زاڭداردى ۇيلەستىرۋ سالاسىندا ءبىراز ناتيجەگە قول جەتىپتى.
– قازاقستان ەكونوميكاسىنىڭ نەگىزگى سالالارىنىڭ ءبىرى – ۋران ءوندىرۋ سالاسىندا ەڭبەك ونىمدىلىگى 10 پايىزعا ءوستى. بۇل ناتيجەگە ءبىز ءبىر جىل ىشىندە قول جەتكىزدىك. تسيفرلى ەكونوميكا جوبالارى قازاقستان ەكونوميكاسىنىڭ بارلىق سالاسىندا تارالىپ جاتىر. «قازىرگى ۋاقىتتا كوپتەگەن ەلدە تسيفرلاندىرۋ دامۋدىڭ ستراتەگيالىق باسىمدىعى بولىپ تابىلادى. الەمدىك جەتەكشى ساراپشىلاردىڭ بولجامدارىنا سايكەس, 2020 جىلعا قاراي الەمدىك ەكونوميكانىڭ ءتورتتەن ءبىر بولىگى تسيفرلى بولماق جانە مەملەكەتكە, بيزنەس پەن قوعامعا ءتيىمدى ءوزارا ارەكەتتەسۋگە مۇمكىندىك بەرەتىن ەكونوميكانى تسيفرلاندىرۋ تەحنولوگيالارىن ەنگىزۋ اۋقىمدى جانە ديناميكالىق ۇدەرىسكە اينالىپ كەلەدى. ءبىزدىڭ ەلدەرىمىز تسيفرلى ەكونوميكادا سۇرانىستى قالىپتاستىرۋ ستراتەگياسىنان ۇسىنىستار قالىپتاستىرۋ ستراتەگياسىنا كوشۋى جانە مۇنى بىرلەسكەن كۇش-جىگەرمەن جاساۋى ءتيىس», دەپ اتاپ ءوتتى س.گروموۆ.
سونداي-اق ول بۇل جيىنعا سەنات پەن فەدەراتسيا كەڭەسىنىڭ ەكى بەيىندى كوميتەت مۇشەلەرى قاتىسىپ وتىرعانىن قاپەرگە سالدى.
فەدەراتسيا كەڭەسى توراعاسىنىڭ ورىنباسارى يلياس ۋماحانوۆ باسقوسۋدىڭ كۇن تارتىبىندەگى ماسەلە – تسيفرلى ەكونوميكاعا كوشۋدى ەشبىر ەل جەكە-دارا ءجۇرگىزە جانە ناتيجەگە جەتە المايتىنىنا توقتالدى. ساراپشىلاردىڭ پىكىرىنشە, بۇل جاڭا تەحنولوگيالىق سەرپىلىس ءبىزدىڭ مەملەكەتتەرىمىزگە ءححى عاسىرداعى جوعارى ءتيىمدى ەكونوميكانى قۇرۋعا جانە الەمدەگى ەڭ دامىعان ەلدىڭ بىرىنە اينالۋعا مۇمكىندىك بەرەدى. «تسيفرلى ەكونوميكا ەنگىزىلگەن سوڭ باسقارۋ مودەلى جاڭا ستاندارتىنىڭ تيىمدىلىگى ارتادى جانە شىعىنداردىڭ ازايۋىنان ەكونوميكاعا ۇلكەن پايدا تۇسەدى», دەپ اتاپ ءوتتى ي.ۋماحانوۆ.
جيىننىڭ ماقساتى حالىقارالىق تسيفرلى تەحنولوگيالاردى ومىرگە دەندەپ ەنگىزىپ, ونىڭ الەۋمەتتىك توپتار ساتىسىنداعى حالىقتىڭ ومىرىنە ەلەۋلى تۇردە تيگىزەتىن اسەرىن ايعاقتاۋ ەكەنى بيىك مىنبەرگە شىققان سويلەۋشىلەردىڭ العاشقى سوزدەرىنەن-اق انىق بايقالدى. ايتا كەتەيىك, بۇدان بۇرىن تانىمال ەكونوميست-ساراپشى سەرگەي پەراپەچكا ەلىمىزدىڭ ەكونوميكاسىن ودان ءارى تسيفرلاندىرۋ كوپتەگەن سالانىڭ دامۋىنا باستى فاكتور بولارىن ايتقان ەدى. ول كەلتىرگەن مالىمەتكە قاراعاندا, تسيفرلاندىرۋ سالاسى بويىنشا ەلىمىز جىل وتكەن سايىن العا جىلجىپ كەلەدى. ال تسيفرلى ەكونوميكاعا تارتىلۋ دەڭگەيى بويىنشا قازاقستان رەسەي, ءباا, ارگەنتينا مەن چيلي سياقتى ەلدەرمەن قاتار تۇر ەكەن ءارى تسيفرلاندىرۋ يندەكسى بويىنشا 0,72 (بۇۇ-نىڭ 2018 جىلعى مالىمەتى), جاھاندىق ورتا دەڭگەيلى كورسەتكىشتەن (0,49) جوعارى تۇر. ال ەلىمىزدەگى ەڭ ءىرى دەگەن كومپانيالار اراسىندا كەڭ جولاقتى ينتەرنەتكە كىرۋ كورسەتكىشى 45 پايىزدى قۇرايدى.
