كەزدەسۋ بارىسىندا قوس تاراپ اعىمداعى جىلدىڭ 14-22 قىركۇيەگى ارالىعىندا نۇر-سۇلتاندا وتەتىن كۇرەس تۇرلەرىنەن الەم چەمپيوناتىنا دايىندىق كەزەڭىن تالقىلادى. اتالعان سىن توكيو وليمپياداسىنا ليتسەنزيا تاراتادى. جارىس قورىتىندىسى بويىنشا 1-دەن 6-شى ورىن ارالىعىندا ورنالاسقان بالۋاندار تورتجىلدىق دوداسىنا تىكەلەي جولداما الماق. وليمپيادا قارساڭىنداعى ماڭىزدى دوداعا الەمنىڭ مىڭعا جۋىق بالۋانى قاتىسادى دەپ كۇتىلۋدە. وتكەن جىلعى الەم چەمپيوناتىنا 850 سپورتشى قاتىسقانىن ايتا كەتۋ كەرەك. UWW پرەزيدەنتى قازاقستان استاناسىنداعى الەم چەمپيوناتى جوعارى دەڭگەيدە وتەتىنىنە سەنىم ءبىلدىردى.
«قازاقستاندا ءداستۇرلى كۇرەس مەكتەبى بار. بۇل بالالار مەن جاستار اراسىندا كەڭ تارالعان بۇقارالىق سپورت تۇرلەرىنىڭ ءبىرى. ءبىزدىڭ ەلىمىزدە كۇرەس تۇرلەرىنەن اكادەميا جۇمىس ىستەۋدە. مۇنداعى تاربيەلەنۋشىلەر قازاقستان نامىسىن حالىقارالىق ارەنادا قورعاپ ءجۇر. ءىرى سپورتتىق جارىستاردى وتكىزۋ تاجىريبەمىز مول, سوندىقتان, ەلوردادا الەم چەمپيوناتىن جوعارى دەڭگەيدە ۇيىمداستىرۋعا بار كۇشىمىزدى سالامىز. وسى ورايدا, وليمپيادا ويىندارىنىڭ قارساڭىندا مۇنداي ءىرى سپورتتىق وقيعانى وتكىزۋدى بىزگە سەنىپ تاپسىرعانى ءۇشىن بىرىككەن كۇرەس الەمىنە العىسىمدى بىلدىرەمىن», - دەدى تيمۋر ق ۇلىباەۆ.
كەزدەسۋ بارىسىندا تاراپتار قازاقستان ۇوك پەن UWW اراسىنداعى ارىپتەستىك ماسەلەسىن, سونداي-اق, ەلىمىزدەگى ەركىن, ايەلدەر جانە گرەك-ريم كۇرەسىنىڭ دامۋ قارقىنىن تالقىلادى. بيىلعى جىلدىڭ 4-8 شىلدەسى ارالىعىندا نۇر-سۇلتاندا كادەتتەر اراسىنداعى ازيا چەمپيوناتى وتەدى. سونداي-اق, قازاقستان ازيا ايماقتىق ىرىكتەۋ ءتۋرنيرىن وتكىزۋدەن دە ءۇمىتتى. نۇر-سۇلتانداعى الەم چەمپيوناتىندا جولدامادان الا الماعان بالۋانداردىڭ اتالعان سىندا ليتسەنزيانى يەلەنۋىنە مۇمكىندىك بەرىلەدى. تۋرنيردە ءبىرىنشى جانە ەكىنشى ورىن يەمدەنگەن سپورتشىلار ءۇشىن وليمپياداعا جول اشىلماق.
بۇدان بولەك, كەزدەسۋدە Qazaq Kuresi حالىقارالىق فەدەراتسياسىن UWW قاتارىنا قوسۋ ماسەلەسى وڭ شەشىمىن تاپتى. ايتا كەتەلىك, 2017 جىلى قۇرىلعان Qazaq Kuresi حالىقارالىق فەدەراتسياسىن قانات بوزىمباەۆ باسقارادى. بۇگىندە فەدەراتسيا قۇرامىنا 29 مەملەكەت ەنگەن. سونداي-اق, Qazaq Kuresi فەدەراتسياسى ەلىمىزدەگى وليمپيادالىق سپورت تۇرلەرى مەن اتالعان ۇلتتىق سپورت ءتۇرىن دامىتۋدى قولعا العان سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ مۇشەسى سانالادى.
