«قاراشىعاناق پەتروليۋم وپەرەيتينگ ب.ۆ.» كومپانياسىنىڭ ورال قالاسىنداعى وفيسىندە جەرگىلىكتى قامتۋدى دامىتۋ جونىندە كەڭەس ءوتتى. جيىندا سونداي-اق ماشينا جاساۋ جانە مۇناي-گاز سالاسىن دامىتۋ ماسەلەلەرى تالقىلاندى.
كەزدەسۋ كەزىندە باتىس قازاقستان وبلىسىنىڭ اكىمى التاي كولگىنوۆ ەلباسىنىڭ وڭىرلەردى يندۋستريالدىق-يننوۆاتسيالىق دامىتۋ باعدارلاماسىنىڭ ءى جانە ءىى بەسجىلدىقتارىن جۇزەگە اسىرۋ جولىندا اتقارىلعان جۇمىستار تۋرالى ايتىپ ءوتتى. ماسەلەن, وسى ۋاقىت ىشىندە ونەركاسىپ ونىمدەرىن ءوندىرۋ 990,1 ملرد تەڭگەدەن 2471,2 ملرد تەڭگەگە, ياعني 2,5 ەسەگە وسكەن. وسىنداي ورلەۋ وڭدەۋشى كاسىپورىندارعا دا ءتان. ءوڭىر باسشىسىنىڭ ايتۋىنشا, وبلىستاعى وڭدەۋشى كاسىپورىندار ءونىم ءوندىرۋدى 2,4 ەسەگە كوبەيتكەن.
التاي كولگىنوۆ «قپو ب.ۆ.» جەرگىلىكتى تاۋار وندىرۋشىلەرمەن جانە قىزمەت كورسەتۋشىلەرمەن تىعىز قارىم-قاتىناس جاساپ وتىرعانىن اتاپ ءوتتى.
- باتىس قازاقستان وبلىسى – ەلىمىزدىڭ ستراتەگيالىق ءوڭىرى. مۇنى تاياۋدا ءبىزدىڭ وبلىسقا جۇمىس ساپارىمەن كەلگەن پرەزيدەنت قاسىم-جومارت توقاەۆ تا ايتقان بولاتىن. سونىڭ ىشىندە ءوندىرىس سالاسىنا نازار اۋدارىپ, جەرگىلىكتى زاۋىتتارعا ينۆەستيتسيا تارتۋدى تاپسىردى. بۇل جۇمىستى سەرىكتەستەرىمىزبەن بىرگە اتقاراتىن بولامىز, - دەدى التاي كولگىنوۆ.
«قپو ب.ۆ.» كومپانياسىندا قازاقستاندىق ۇلەس سوڭعى ءۇش جىلدا 48%-دان 60%-عا وسكەن. سونىڭ ىشىندە جەرگىلىكتى تاۋارلاردى تۇتىنۋ 12%-عا جەتكەن. وسىنىڭ ناتيجەسىندە 2018 جىلى عانا 163 ملرد تەڭگە قارجى ەلىمىزدىڭ ەكونوميكاسىنا سالىنىپ, جاڭا جۇمىس ورىندارىنىڭ اشىلۋىنا, جوعارى ساپالى وتاندىق ءونىم شىعارۋعا, ەل قازىناسىنا سالىق رەتىندە قوسىمشا قارجى قۇيىلۋىنا قول جەتتى. «مۇنىڭ ءبارى سايىپ كەلگەندە ءوڭىر تۇرعىندارىنىڭ ءال-اۋقاتىن, تۇرمىس جاعدايىن جاقسارتقانى ءسوزسىز» دەيدى التاي كولگىنوۆ.
ىسكەرلىك كەزدەسۋدىڭ قورىتىندىسىندا جەرگىلىكتى كومپانيالار مەن «قپو ب.ۆ.» اراسىندا ۇزاقمەرزىمدى كەلىسىم-شارتتارعا قول قويىلدى. «قاراشىعاناق پەتروليۋم وپەرەيتينگ ب.ۆ.» كومپانياسىمەن ارىپتەس بولعان وتاندىق وندىرۋشىلەردىڭ قاتارىندا «ورال ترانسفورماتور زاۋىتى» جشس, «اقساي يندۋستريالدى پاركى» اق, «تەماتەك» جشس, «اقسايگازسسەرۆيس» اق جانە باسقالارى بار.
سۋرەتتى تۇسىرگەن الەكساندر كۋپريەنكو
باتىس قازاقستان
