كەڭەستە شارۋالاردى ساپالى تۇقىمدارمەن, ججم-مەن, اۋىل شارۋاشىلىعى تەحنيكاسىمەن قامتاماسىز ەتۋ, سۇرانىسقا يە اۋىل شارۋاشىلىعى داقىلدارىنىڭ اۋداندارىن ءارتاراپتاندىرۋ, سۋبسيديالاۋ ماسەلەلەرى قارالدى.
اۋىل شارۋاشىلىعى ءمينيسترى س. وماروۆ قازىرگى تاڭدا بارلىق وڭىرلەر كوكتەمگى-ەگىس جۇمىستارىن جۇرگىزۋگە كىرىسكەنىن, ال وڭتۇستىك وڭىرلەردە ەگىس جۇمىستارى اياقتالۋعا تاقاپ قالعانىن ايتتى. ەگىستىڭ جالپى اۋدانى 22,3 ملن گەكتاردى قۇرايدى, ونىڭ ىشىندە كوكتەمگى ەگىس اۋماعى — 19 ملن گا. ءداندى داقىلدار 14,5 ملن گا القاپقا ەگىلەدى شارۋالاردىڭ تۇقىمعا دەگەن قاجەتتىلىكتەرى 100% قامتاماسىز ەتىلدى: بيىلعى ەگىنگە شامامەن 2,5 ملن توننا تۇقىم سەبىلدى, بۇل وتكەن جىلعىدان 100 مىڭ تونناعا ارتىق.
زيانكەستەر مەن ارامشوپتەردەن قورعاۋ ماقساتىندا قاجەتتى قورەكتىك زاتتار مەن وڭدەۋگە ارنالعان پرەپاراتتار ساتىپ الىنعانى اتالىپ ءوتتى. بۇگىندە 267,1 مىڭ توننا تىڭايتقىش تيەلدى, ونىڭ 60% — وتاندىق وندىرۋشىلەردەن الىنعان.
2018 جىلى اۋىل شارۋاشىلىعى تەحنيكالارى 3,5%-عا جاڭارتىلدى. جالپى العاندا, جۇمىسقا 147 مىڭ تراكتور, 4 مىڭ بىرلىك ونىمدىلىگى جوعارى ەگىس جيىنتىقتارى تارتىلعان.
مەملەكەتتىك قولداۋ شارالارىنىڭ اياسىندا 50,6 ملرد تەڭگە سوماسىنا 1770 اۋىل شارۋاشىلىعى تاۋار ءوندىرۋشىسى قارجىلاندىرىلدى.
ءوز كەزەگىندە ەنەرگەتيكا ءمينيسترى ق. بوزىمباەۆ شارۋالاردى جانار-جاعارماي ماتەريالدارىمەن قامتاماسىز ەتۋ بارىسى تۋرالى باياندادى. ناۋرىز–ماۋسىم كەزەڭىندە كوكتەمگى دالا جۇمىستارىن جۇرگىزۋگە 380 مىڭ توننا ديزەل وتىنى ءبولىندى. بۇگىنگى تاڭدا قاجەتتىلىك كولەمىنىڭ 81% تيەلدى. ەنەرگەتيكا مينيسترلىگى بەلگىلەگەن ديزەل وتىنىنىڭ باعاسى ليترىنە 160 تەڭگەنى قۇرايدى (193 مىڭ تەڭگە/توننا), وپەراتورلاردىڭ جەتكىزۋ باعالارىن ەسكەرگەندە وڭىرلەردەگى ورتاشا باعاسى — 174 تەڭگە/ليتر, بۇل نارىقتىق باعادان 18 تەڭگەگە ارزان.
تۇركىستان, الماتى, جامبىل وبلىستارىنىڭ باسشىلارىنىڭ جانە سولتۇستىك وڭىرلەر — اقمولا, قوستاناي, سولتۇستىك قازاقستان وبلىستارىنىڭ اكىمدەرىنىڭ وڭىرلەردە ەگىس ناۋقاندارىن جۇرگىزۋ تۋرالى باياندامالارى تىڭدالدى. بارلىق وڭىرلەر تۇقىمداردىڭ قاجەتتى كولەمىمەن قامتاماسىز ەتىلگەن, ججم جەتكىزۋدە ماسەلە جوق.
كەڭەس قورىتىندىسىن شىعارا وتىرىپ, پرەمەر-مينيستر اسقار مامين ەگىس ناۋقانىنىڭ قاناعاتتانارلىق قارقىنىن اتاپ ءوتتى.
«ەگىس جۇمىستارىن وڭتايلى اگروتەحنيكالىق مەرزىمدە ۇيىمداستىرىپ, اياقتاۋ – باستى ماسەلە», — دەپ ناقتىلادى ا. مامين.
