ەلباسىنىڭ باستاماسىنا ءۇن قوسقان قىزىلوردا وبلىسىنىڭ اكىمى قىرىمبەك كوشەرباەۆ ايماقتا جوق ماماندىقتارعا شەتەلدەردەن وقىتۋدى 2014 جىلدان باستاپ كەتكەن ەدى.
بيىل قىزىلوردادا نازارباەۆ زياتكەرلىك مەكتەبىنىڭ بازاسىندا الەمنىڭ ۇزدىك جوعارى وقۋ ورىندارىنا تۇسۋگە دايىندايتىن ورتالىق اشۋ جوسپارلانىپ وتىر. بۇل تۋرالى وبلىس اكىمى قىرىمبەك كوشەرباەۆ دارىندى تۇلەكتەرمەن كەزدەسۋ بارىسىندا ايتتى.
كەزدەسۋگە رەسپۋبليكالىق جانە حالىقارالىق بايقاۋلاردىڭ, وليمپيادالاردىڭ 55 قاتىسۋشىسى شاقىرىلعان ەدى. ولار بيىل 58 جۇلدە, اتاپ ايتقاندا, 15 التىن, 13 كۇمىس جانە 30 قولا مەدال العان بولاتىن.
كەزدەسۋدە وبلىس باسشىسى جاستارمەن ايماقتىڭ دامۋى تۋرالى سۇحباتتاسىپ, ولاردىڭ سۇراقتارىنا جاۋاپ بەردى.
- ەكىنشى جىل قاتارىنان ءبىزدىڭ مەكتەپ تۇلەكتەرىنىڭ 97% جوعارى وقۋ ورىندارى مەن كوللەدجدەرگە تۇسەدى. ەندى ءبىز كەم دەگەندە وبلىستىق مەكتەپ بىتىرۋشىلەرىنىڭ 50% جوعارى وقۋ ورىندارىنا, ونىڭ ىشىندە قازاقستانداعى وقۋ ورىندارى عانا ەمەس, شەتەلدىك ۋنيۆەرسيتەتتەرگە دە وقۋعا ءتۇسۋىن كوزدەپ وتىرمىز. ءبىزدىڭ ەندىگى ماقساتىمىز – ايماق جاستارىنىڭ گارۆارد, يەل جانە ماسساچۋسەتس ۋنيۆەرسيتەتتەرىندە ءبىلىم الۋىنا جاعداي جاساۋ. سونداي-اق, تالانتتى جاستارعا كاسىپكەرلىك, ديزاين, كوممۋنيكاتسيا سياقتى سالالاردا جاڭا تەحنولوگيالاردى ەنگىزەتىن جانە قولداناتىن رەسەيدىڭ «كۆانتوريۋم», «سيريۋس» سەكىلدى ءىرى ورتالىقتاردىڭ تاجىريبەسىن مەڭگەرتۋ,-دەدى ايماق باسشىسى.
وسى ماقساتتا قىزىلوردالىق وقۋشىلاردى «بولاشاق» باعدارلاماسىنىڭ تۇلەكتەرى قۇرعان ەلوردالىق «Astana Garden School» جەكە مەنشىك مەكتەبىندە وقىتۋدى ۇيىمداستىرۋ جانە نازارباەۆ زياتكەرلىك مەكتەبىنىڭ بازاسىندا وقۋشىلاردى شەت مەملەكەتتەگى ىرگەلى ۋنيۆەرسيتتەرگە تۇسۋگە دايىندايتىن ارنايى ورتالىق اشۋ جوسپارلانۋدا. بۇل تاجىريبە 2016 جىلدان باستاپ ەلوردادا جۇزەگە اسىرىلىپ جاتىر.
