مەملەكەت باسشىسى قاسىم-جومارت توقاەۆ اقتوبەگە ءىسساپارى كەزىندە مەديتسينا قاۋىمداستىعىمەن كەزدەستى. بۇگىن اقتوبەدەگى مەديتسينا ورتالىعىندا الماتى دەكلاراتسياسىنىڭ 40 جىلدىعى مەن اقتوبە قالاسىنىڭ 150 جىلدىعىنا وراي «حالىقتىڭ دەنساۋلىعىن ساقتاۋ: ساياسات, عىلىم, ءبىلىم, مساك جۇيەسىندەگى تاجىريبە» تاقىرىبىندا حالىقارالىق-پراكتيكالىق كونفەرەنتسيا ءوتتى. جيىندا دەنساۋلىق ساقتاۋ ءمينيسترى ەلجان ءبىرتانوۆ مەديتسينالىق كومەكتىڭ ساپاسىن ارتتىرۋ جولىندا اتقارىلعان نەگىزگى ءىس-شارالاردى تانىستىردى.
مينيستر دەنساۋلىق ساقتاۋ سالاسىنداعى وزەكتى ماسەلەلەردى شەشۋ ءۇشىن ەلباسىنىڭ تاپسىرماسىمەن 2016-2019 جىلدارعا ارنالعان مەملەكەتتىك «دەنساۋلىق» باعدارلاماسى ازىرلەنگەنىن ايتتى. قۇجاتتا ەمحانا, جەدەل جاردەم مەن قابىلداۋ بولىمىندەگى مەديتسينالىق قىزمەتتىڭ ساپاسىن جاقسارتۋ, مامان تاپشىلىعىن جويۋ, اۋرۋحانا, ەمحانانى جابدىقتاۋ سىندى باستى باعىتتار كورىنىس تاپقان.
ەلجان ءبىرتانوۆ كەيبىر ماسەلەگە كەڭىنەن توقتالدى. مساك (مەديتسينالىق-سانيتاريالىق العاشقى كومەك) كەلسەك, بۇگىندە سكرينينگتىك باعدارلاماعا قاتىسقاندار قاتارى ەسەلەپ كوبەيگەن. ينفەكتسيالىق ەمەس دەرتتەردى باسقارۋ باعدارلاماسى ءساتتى جۇزەگە اسۋدا, ول بويىنشا 220 مىڭ پاتسيەنت قامتىلدى. ناتيجەسىندە سىرقاتى اسقىنىپ, اۋرۋحاناعا تۇسكەندەر سانى 2,5 ەسەگە ازايدى.
مساك ارنالعان 165 جاڭا نىسان قۇرىلدى, 1 مىڭنان استام دارىگەرلىك ۋچاسكە اشىلىپ, مەديتسينالىق-سانيتارلىق العاشقى كومەك كورسەتەتىن دارىگەردىڭ جۇكتەمەسى جەڭىلدەدى. تمككك (تەگىن مەديتسينالىق كومەكتىڭ كەپىلدەندىرىلگەن كولەمى) اياسىندا جان باسىنا شاققانداعى ءتاريفتىڭ 20 پايىزعا كوتەرىلۋى ەسەبىنەن مساك بولىنگەن قارجى 40 پايىزعا ارتتى. مساك ساندىق جۇيەگە كوشكەن سوڭ ەمحانالارداعى كەزەك 2 ەسەگە ازايدى.
جەدەل مەديتسينالىق كومەكتىڭ ساپاسىن ارتتىرۋ ماقساتىندا جاڭا ستاندارتتار قابىلداندى, اۆتوكولىكتەردىڭ ديزاينى وزگەردى جانە ولار ناۆيگاتسيالىق جۇيەمەن جابدىقتالدى. ناتيجەسىندە جەدەل جاردەم كولىگى ناۋقاس شاقىرعان جەرگە 15 مينۋتتا جەتەدى. ال اۋرۋحانالارداعى قابىلداۋ بولىمدەرى ترياج جۇيەسىنە ءوتتى, «جەدەل جاردەم دارىگەرى» دەگەن ماماندىق ەنگىزىلدى. وسىنىڭ ارقاسىندا اۋرۋحاناعا جەتپەي كوز جۇمعاندار سانى 0,4 پايىزعا قىسقاردى.
ەلباسىنىڭ 2019 جىلى 1 ماۋسىمنان باستاپ تابىسى تومەن جۇمىسشىلاردىڭ جالاقىسىن 30 پايىزعا كوتەرۋ تۋرالى تاپسىرماسىنا ساي بيىل قوسىمشا 43 ملرد تەڭگە, 2020-2021 جىلدارعا – 87 ملرد تەڭگە بولىنگەن.
دارىگەر تاپشىلىعىن جويۋ جولىندا دا كوپتەگەن جۇمىس اتقارىلۋدا. مينيسترلىك مەديتسينالىق جوعارى وقۋ ورنىندارىن مەملەكەتتىك گرانتپەن تامامداعان جاس مامانداردى ايماق, اۋىلعا بارىپ ءۇش جىل جۇمىس ىستەۋدى مىندەتتەپ وتىر. ەلجان ءبىرتانوۆ وسى ورايدا ءوڭىر اكىمدەرىنىڭ اۋىلعا كەلگەن جاس دارىگەرلەرگە دۇرىس كوڭىل ءبولۋىن ەسكەردى.
دەنساۋلىق ساقتاۋ سالاسىنداعى ينفراقۇرىلىمدى جەتىلدىرۋ ءۇشىن ءۇش جىلدا 600 نىسان اشىلادى دەپ جوسپارلانۋدا. استانادا زاماناۋي ونكولوگيا ورتالىعى اشىلماق. بالالارعا ساپالى مەديتسينالىق كومەك كورسەتۋ ءىسى ۇزدىكسىز جەتىلدىرىلىپ كەلەدى. بۇعان قوسا, مىندەتتى الەۋمەتتىك مەديتسينالىق ساقتاندىرۋ جۇيەسىنە دايىندىق جالعاسۋدا. تمككك جاڭا مودەلى جاسالدى. ءمامس مەن تمككك بويىنشا مەديتسينالىق قىزمەتتىڭ پاكەتى دايىندالدى.
ەلباسىنىڭ تاپسىرماسىمەن 5 جىلدا ءبىلىم, عىلىم مەن دەنساۋلىق ساقتاۋ سالاسىنا بولىنەتىن قارجىنىڭ كولەمى جىلپى ىشكى ءونىمنىڭ 10 پايىزىنا جەتۋى ءتيىس. وسى ورايدا 2020-2025 جىلدارعا ارنالعان مەملەكەتتىك جاڭا دەنساۋلىق ساقتاۋ باعدارلاماسىندا دەنساۋلىق ساقتاۋ سالاسىنىڭ شىعىنىن جالپى ىشكى ءونىمنىڭ 5 پايىزىنا جەتكىزۋ تۋرالى جازىلعان. بۇل قارجى پروفيلاكتيكاعا جانە حالىق اراسىندا سالاماتتى ءومىر سالتىن ناسيحاتتاۋعا, قوعامدىق دەنساۋلىق ساقتاۋ قىزمەتىن جەتىلدىرۋ مەن مەديتسينالىق-سانيتارلىق العاشقى كومەككە بولىنگەن قارجى كولەمىن 60 پايىزعا جەتكىزۋگە جۇمسالادى. سونىمەن قاتار, دەنساۋلىق ساقتاۋ سالاسىنداعى ادام كاپيتالىن دامىتۋعا جانە دارىگەرلەردىڭ ەڭبەكاقىسىن 2,5 ەسەگە ارتتىرۋ ءۇشىن دە قارجى قارالعان, - دەدى مينيستر.
مەملەكەتتىك جاڭا باعدارلاما اياسىندا مەديتسينالىق مەكەمەلەر مودەرنيزاتسيادان وتەدى, دەنساۋلىق ساقتاۋ سالاسىنداعى بىرىڭعاي ساندىق كەڭىستىكتى دامىتۋ ءىسى جالعاسادى. جالپى, مەديتسينالىق كومەكتىڭ ساپاسىن جاقسارتۋعا باعىتتالعان جۇمىستاردىڭ ناتيجەسىندە ەل ازاماتتارىنىڭ ءومىر ءسۇرۋ ۇزاقتىعىن 2025 جىلعا دەيىن 75 جاسقا جەتكىزۋ جوسپارلانعان.
