سۋرەتشىنىڭ ايتۋىنا قاراعاندا, ناعاشى اتاسى – تولەباي قاريا كەزىندە تەمىردەن ءتۇيىن ءتۇيگەن شەبەر كىسى بولىپتى. ات ابزەلدەرىن جاساعان. گۇلدانا وسى ونەرىن اتاسىنان قونعان قاسيەت دەپ بىلەدى.
سۋرەتشى العاشقى كەزدە ۇيرەنشىكتى كەنەپتىڭ ورنىنا بىلعارى, ءتۇرلى اڭداردىڭ تەرىلەرىن جانە ت ۇلىپتى قولدانىپتى. كورگەن جاندى تاڭىرقاتپاي قويمايدى. ونىڭ جۇمىستارى – كوبىنە ساندىك بۇيىمدار. تەرىگە بەينەلەگەن سۋرەتتەرىنە اشىق اكريلدى, سىرلاردى پايدالاناتىندىقتان عانا ەمەس, قوسىمشا ماتەريالدار – تابيعي تاستار, مونشاقتار, ساندىك تۇيمەلەر, تيىندار جانە جان-جانۋارلاردىڭ سۇيەكتەرىن قولدانعانى, ءسوز جوق, ەرەكشە كوز تارتادى.
– ءبىر جۇمىسىڭىزعا قانشا ۋاقىت جۇمسايسىز؟ – دەپ سۇرادىق تۋلاقتى تۋىندىعا اينالدىراتىن سۋرەتشىدەن.
– ونەر ادامى بولعان سوڭ, مۇنى شابىتپەن بايلانىستىرامىن, – دەدى ول. – كەيدە ءبىر كۇندە ەكى-ءۇش تۋىندى جازۋىم مۇمكىن. ال كەي ساتتەردە ەشتەڭە دە سالا الماۋىم عاجاپ ەمەس.
– تۋىندىلارىڭىز كوبىنە قاي تاقىرىپتاردى قامتيدى؟
– العاشقى كورمەمدە نەگىزگى تاقىرىبىم ابستراكتسيا بولاتىن. ءوزىمنىڭ تابيعاتىما جاقىن. بىراق ەكىنشى كورمەمدە ۇزاق ويلانىپ, اۆتور رەتىندە ءوزىمنىڭ تۋىپ-وسكەن جەرىمدى بەينەلەۋدى ءجون سانادىم.
گۇلدانا جۇرقاباەۆا شىعارماشىل جاستاردىڭ حالىقارالىق «شابىت» فەستيۆالىنەن باستاپ, Kunshyag قايىرىمدىلىق بالى سىندى ءتۇرلى شارالارعا قاتىسقان. سونداي-اق ول 2016 جىلى International art Festival & Content – «تانىسۋ» فەستيۆالىندە لاۋرەات اتانىپ, 1-ورىندى جەڭىپ العان (يتاليا). ال 2017 جىلى قازاقستان رەسپۋبليكاسىنىڭ تۇڭعىش پرەزيدەنتىنىڭ كىتاپحانا-مۇراجايىندا «وزىڭە جول» جەكە كورمەسىن ۇيىمداستىرعان.
– ءبىر كەزدەرى مەن تەرىدەن قولدانبالى ونەر جاساۋدىڭ شەبەرى ەدىم. بۇگىندە تۋىندىلارىمدى مايمەن جازامىن. بارلىق شىعارماشىلىق ادامدارى سياقتى مەن دە ۇنەمى ىزدەنىستە جۇرەمىن. جاڭا نارسەنى ۇيرەنۋدەن جالىقپايمىن. ەرتەڭ نە قىزىقتىراتىنىن بىلمەيمىن. مەنى تەرەڭ ويلى ادامدار, الەمنىڭ كەڭدىگى, سانانىڭ قۇپيا كۇشتەرى, فيلوسوفيا بويىنشا قىزىقتى كىتاپتار, ۋاقىتتىڭ جىلدامدىعى, ءتىپتى وسى الەمنىڭ ابسۋردتىعى دا شابىتتاندىرادى, – دەيدى ونەر يەسى.
گۇلدانا جۇرقاباەۆا Aru-Art جەكە گالەرەياسى مەن Hazifa توقىما ۇيىندە ارت-مەنەدجەر بولىپ جۇمىس ىستەگەن, بۇگىندە «تۇران» كوللەدجىندە ديزاينەرلەرگە ءدارىس وقيدى. سونداي-اق سۋرەتشى Balapan ارناسىندا شەبەرلىك ساباقتارىن كورسەتەدى, لوگوتيپتەر ازىرلەيدى, ەتنوستيلدە اكسەسسۋارلار جاسايدى, كورمەلەردى ۇيىمداستىرۋعا كومەكتەسەدى.
گۇلدانا ويعا العان جوسپارلارىن دا ورتاعا سالدى.
– سىزدەرمەن العاش رەت ءبولىسىپ وتىرمىن: جاقىندا «حۋدوجنيك چتو پيشەت» اتتى كىتابىمدى جازا باستادىم. قىزىقتى بولاتىنىنا سەنىمدىمىن. وقىرماندارىم دا كوپ بولادى دەپ ويلايمىن, – دەدى سۋرەتشى.
