قىتايلىق ينۆەستور ارىپتەس جىلىنا 70 مىڭ تراكتور, 50 مىڭ كومباين, جول جاساۋ جانە باسقا دا اۋىل شارۋاشىلىعى تەحنيكالارىن شىعارۋدا الەمدىك دەڭگەيدەگى كوشباسباسشى كومپانيانىڭ ءبىرى. تسەح وتكەن جىلدىڭ ەكىنشى جارتىسىنان باستاپ جۇمىس ىستەي باستاعان بولاتىن. ءوزىنىڭ اشىلۋ سالتاناتىنا دەيىن 100 تراكتوردى قۇراستىرىپ, ساتىپ تا ۇلگەردى. وبلىس اكىمى ارحيمەد مۇحامبەتوۆ تسەحتىڭ اشىلۋىن ءوڭىر ەكونوميكاسىن, ماشينا جاساۋ سالاسىن دامىتۋداعى ماڭىزدى وقيعانىڭ ءبىرى دەپ باعالادى.
«قازاقستاندا ماشينا جاساۋ, اسىرەسە اۋىل شارۋاشىلىعى تەحنيكالارىن شىعارۋعا مەملەكەت تاراپىنان قولداۋ كورسەتىلىپ وتىر. مىسالى, قۇراستىراتىن تەحنيكالاردىڭ قۇرامداس بولشەكتەرىن اكەلۋ باج سالىعىنان, قوسىمشا قۇن سالىعىنان بوساتىلدى. سونداي-اق شارۋا تەحنيكا ساتىپ السا, وعان رەسپۋبليكالىق بيۋدجەت ەسەبىنەن 25 پروتسەنت كولەمىندە سۋبسيديا تولەنەدى. ءبىزدىڭ وبلىسقا بيىل تەك سۋبسيديا ءۇشىن 12,5 ميلليارد تەڭگە بەرىلدى. بۇل ۇلكەن كومەك. تسەح جىلىنا 3 مىڭ تراكتور شىعاراتىن قۋاتپەن جۇمىس ىستەيتىن بولادى. دەمەك, ءبىز تەك ءوزىمىزدىڭ وبلىستى عانا ەمەس, ەلىمىزدى تراكتورمەن قامتاماسىز ەتەمىز, ونى ەكسپورتقا شىعارۋ ءۇشىن وندىرەتىن بولامىز», دەدى ارحيمەد بەگەجان ۇلى.
تسەحتىڭ اشىلۋ سالتاناتىنا قاتىسقان Shandong Lovol Heavy Industry International Trading CO., LTD كومناپياسىنىڭ باسقارما توراعاسى گوسپودينۋ ۆان گۋيمين جۇزەگە اسقان وسى جوبا ءۇشىن ارىپتەستەرگە, ونىڭ ىشىندە «قازاگروفينانس», «برك-ليزينگ» اكتسيونەرلىك قوعامدارىنا, مەملەكەت ۇكىمەتىنە, قوستاناي وبلىسىنىڭ باسشىلىعىنا راحمەت ايتتى.
«ءبىز تراكتور قۇراستىرۋ تسەحىنىڭ اشىلۋى ءۇشىن «اگروماشحولدينگKZ» كومپانياسىمەن ۇلكەن جۇمىستار اتقاردىق. «اگروماشحولدينگKZ» قازاقستانداعى اۋىلشارۋاشىلىعى تەحنيكالارىن شىعاراتىن ءىرى ءوندىرىس, ءبىزدىڭ كومپانيا دا وسى سالادا تەك قىتايداعى عانا ەمەس, الەمدىك دەڭگەيدەگى كوشباسشى. ءبىزدىڭ يتاليادا سىناق-زەرتتەۋ ورتالىعىمىز بار, كومپانيادا 15 مىڭ جۇمىسشى جۇمىس ىستەيدى, سونىمەن قاتار كوپتەگەن ەلدەردە وكىلدىكتەر بار. قازاقستان قىتاي ءۇشىن ستراتەگيالىق ارىپتەس بولىپ سانالادى» دەدى ۆان گۋيمين مىرزا.
