“بارىس” باسەكەدەن شىعىپ قالدى

وتكەن جەكسەنبىدە استاناداعى “قازاقستان” سپورت كەشەنى مۇز ايدى­نىن­دا ەلوردالىق “بارىس” حوككەي كلۋبى قازاننىڭ “اق بارىس” كومان­دا­سىمەن كەزدەسكەن بولاتىن. اس­تانا­لىقتار 3:1 ەسەبىمەن جەڭىلىپ, گاگارين كۋبوگى جولىنداعى باسەكەلەرىن توق­تاتۋعا ءماجبۇر بولدى. ءسويتىپ, بىل­تىرعى جاعداي بيىل دا قايتالانىپ, جەرلەستەرىمىز قازاندىق حوككەيشىلەر الدىندا تاعى دا تىزە بۇكتى. ياعني, “بارىس” وتكەن اپتادا سىرت الاڭدا “اق بارىستان” 4:3 جانە 4:2 ەسەبىمەن ەكى مارتە ۇتىلعان بولاتىن. پلەي-وفف باسەكەلەرىندە ءۇش مارتە جەڭىسكە جەت­كەن كوماندا جارىستى جالعاس­تى­رادى. ءسوز رەتى كەلگەندە ايتا كەتسەك, “اق بارىس” گاگارين كۋبوگىنىڭ بىل­تىرعى جەڭىمپازى. ويىننىڭ العاشقى كەزەڭىنىڭ 12 مينوتىندە الما-كەزەك شابۋىلداردان كەيىن قوناقتار ەسەپ اشتى. ەكىنشى كە­زەڭدە “بارىس” شابۋىلشىسى روما­نوۆ تارازى باسىن تەڭەستىرىپ, ءۇمىت وتىن ءۇر­لە­گەندەي بولىپ ەدى... الايدا “اق با­رىس” شەشۋشى كەزەڭدە قاتارىنان قوس شاي­با سوعىپ, جەڭىسكە جەتتى. وسىلايشا, پلەي-وفف باسەكەسىنىڭ ءۇشىنشى ويىنى دا قازان­دىق­تاردىڭ جەڭىسىمەن اياق­تال­دى. جالپى, “بارىس” كومانداسى “اق با­رىسپەن” كۇنى بۇگىنگە دەيىن 12 كەز­دە­سۋ وتكىزىپ, بىردە-ءبىر مارتە جەڭىسكە جەتە العان جوق. تاتار توسقاۋىلى ءازىر­شە بىزگە قيىندىق كەلتىرىپ تۇر.