بۇل مەموراندۋم نەگىزىندە اتقارۋشى تاراپتىڭ ءبىرى «وتانداستار قورىنىڭ» باسشىسى نۇرتاي ابىقاەۆ ەلباسى نۇرسۇلتان نازارباەۆتىڭ باستاماسىمەن دۇنيەگە كەلگەن اتالعان قۇرىلىم قازىرگى تاڭدا جۇمىسىن جۇيەلەپ, ءىستى باستاپ كەتكەنىن, سونىمەن قاتار الداعى ۋاقىتتا مينيسترلىكتەر جانە وبلىس اكىمدىكتەرى قاتارلى اتقارۋشى ورگاندارمەن بىرلەسىپ مەموراندۋم ارقىلى جۇمىس جاساۋ قاجەتتىلىك ەكەنىن, ال بۇگىنگى شارا سونىڭ ءبىر ايقىن كورىنىسى دەگەندى جەتكىزدى.
مۇنداعى ماقسات ەتنوستىق قازاقتار جانە شەتەلدە تۇراتىن وتانداستاردى قولداۋعا باعىتتالىپ وتىر. اتاپ ايتقاندا الداعى كۇندەرى قوس تاراپ بىرلەسىپ, ەڭ اۋەلى حالىقارالىق, رەسپۋبليكالىق, وڭىرلىك دەڭگەيدە قۇرىلتاي, كونفەرەنتسيا, سەمينار, سيمپوزيۋم, بريفينگتەر ۇيىمداستىرۋ ىسىنە ءوزارا ءجاردەمدەسپەك. اسىرەسە بيىلعى جاستار جىلى قارساڭىندا شەتەلدەگى ەتنوستىق قازاق جاستارى ءۇشىن وقۋ-ادىستەمەلىك قۇرالدار ازىرلەۋ, ولاردى ينتەرنەت رەسۋرستاردا ورنالاستىرۋدى قامتاماسىز ەتۋ, ەكىنشىدەن, ەل كولەمىندەگى ۇلتتىق دەڭگەيدەگى كىتاپحانالار بازاسى نەگىزىندە شەتەلدە تۇراتىن قازاقتار تۋرالى تۋىندىلار قورىن قۇرۋ جانە ەلىمىزدەگى وليمپيادالىق دايارلاۋ مەكتەپ-ينتەرناتتارىندا قازاقتىڭ دارىندى سپورتشى جاستارىن گرانت نەگىزىندە وقىتۋ, ت.ب جۇمىستار اتقارىلماق.
وسى ورايدا قوس تاراپ مەملەكەتتىك تاپسىرما اياسىندا اعىمداعى جىلى «قاسيەتتى قازاق ەلى» حالىقارالىق ءداستۇرلى ونەر فەستيۆالى, رەسەي فەدەراتسياسىندا قازاق مۋزىكاسىنىڭ كونتسەرتتەرى, قازاقستاننىڭ كيەلى جەرلەرىنە ەكسپەديتسيا سياقتى ت.ب. مادەني شارالار ۇيىمداستىرماق.
جوعارىداعى ءىس-شارالارمەن قاتار, وتانداستار اراسىندا سپورتتىق ويىنداردى دامىتۋ جايى دا قولعا الىنباقشى. اتاپ ايتقاندا, الداعى ايلاردا ميۋنحەن قالاسىندا وتەتىن كىشى قۇرىلتاي باعدارلاماسىندا شەتەلدەگى قازاق جاستارى اراسىندا شاعىن فۋتبولدان تۋرنير وتكىزۋ جوسپارلانسا, ىشكى ەتنوتۋريزمدى دامىتۋ ءۇشىن شەتەلدە تۇراتىن نەمەسە اتاجۇرتىنا ورالعان قازاقتاردىڭ ەجەلگى كيىز بەن تەرى وڭدەۋ, اعاش, مەتالل بۇيىمداردان جاسالاتىن دۇنيەلەردى دايىنداۋ تەحنولوگياسىن زامانعا ساي جاڭعىرتۋ شاراسى قاراستىرىلماق.
جيىندى قورىتىندىلاعان مينيستر ارىستانبەك مۇحامەدي ۇلى, جوعارىداعى اتقارىلۋى ءتيىس شارالاردىڭ ەلىمىز ءۇشىن ماڭىزى زور دەگەنگە توقتالىپ, اسىرەسە شەتتەگى قانداستارىمىزعا كورسەتىلەر قامقورلىق قورىنىڭ بۇيداسى تاجىريبەلى ادامنىڭ قولىندا بولعانى قۇپتارلىق ءىس ەكەنىن ايتتى.
