بۇل شارانىڭ نەگىزگى ماقساتى – جاستاردىڭ اسكەري قىزمەتكە دايار بولۋى ءۇشىن جان-جاقتى تاربيەلەپ, قازىردەن باستاپ اسكەري ومىرگە بارىنشا بەيىمدەۋ. ولاردىڭ فيزيكالىق دايارلىعىن جەتىلدىرىپ, ءمورالدى-پسيحولوگيالىق قاسيەتتەرىن ارتتىرۋ. جاس ورەندەردى پاتريوتتىق جانە وتانسۇيگىشتىك رۋحتا تاربيەلەۋ. سپورتقا كوپتەپ تارتىپ, سالاۋاتتى ءومىر سالتىنا ىنتالاندىرۋ. پرەزيدەنتتىك تەستتى تاپسىرۋعا دايىنداۋ جانە اسكەري قىزمەتتىڭ ءيميدجىن كوتەرۋ.
– قازاقستان رەسپۋبليكاسى قورعانىس مينيسترىلىگىنە قاراستى ارمياشىلاردىڭ ورتالىق سپورت كلۋبى جانە الماتى قالالىق قورعانىس ىستەرى دەپارتامەنتىنىڭ مۇرىندىق بولۋىمەن ۇيىمداستىرىلعان تارتىستى باسەكەلەر العاشىندا الاتاۋ بوكتەرىندە ورنالاسقان اسەم شاھاردىڭ 8 اۋدانىندا وتكەن ەدى. سول جارىستاردا وزىپ شىققان سپورتشىلار قالالىق دودادا باق سىناۋ قۇرمەتىنە يە بولدى. ال وسى جەردە جەڭىمپاز اتانعان جاس ورەندەر ۇستىمىزدەگى جىلدىڭ ماۋسىم ايىندا قاراعاندى وبلىسىنىڭ اۋماعىنداعى «سپاسسك» پوليگونىندا وتەتىن رەسپۋبليكالىق «ايبىن» جيىنىنا قاتىسادى, – دەيدى قورعانىس مينيسترىلىگىنىڭ سپورت كوميتەتى توراعاسىنىڭ ورىنباسارى, وقۋ-جاتتىعۋ ورتالىعىنىڭ باستىعى ەركەبۇلان ءتۇسىپحانوۆ.
الماتىداعى جيىن بارىسىندا جەتى اسكەري-قولدانبالى سپورتتىڭ جەتى تۇرىنەن سايىستار ءوتتى. جارىس جولىنا شىققاندار پنەۆماتيكالىق اتۋ, بىلتەمىرگە تارتىلۋ, جەردەن دەنەسىن كوتەرۋ, 1000 مەترگە جۇگىرۋ, ارقان تارتۋ, اۆتوماتتى شاشىپ-جيناۋ جانە جالپى اسكەري قورعانىس جيىنتىعىن كيۋ بويىنشا ءوز ونەرلەرىن ورتاعا سالدى.
