قوعامدىق پىكىر ءھام جالاڭ جارناما

قوعام • 14 مامىر، 2019

قوعامدىق پىكىر ءھام جالاڭ جارناما

دۋلات يسابەكوۆ ايتپاقشى، «قياردى دا پيارمەن جەيتىن» قازىرگى قوعامدا اركىم اتقارعان جۇمىسىن، اتتاپ باسقان قادامىن جارنامالاۋعا قۇمار. بۇل قالىپتى قۇبىلىس دەۋگە بولادى. دەگەنمەن، پيار دەگەن ءتۇسىنىكتىڭ ءوزى باسقا ەلدەرگە قاراعاندا كەشەۋىلدەپ كەلگەن ءبىزدىڭ قوعامدا وعان بەرتىنگە دەيىن قىرىن قاراپ، جاساعان جۇمىسى جوق، جارناماسى كوپ ادامدارعا تەلىپ كەلگەن-ءدى.

ارنۇر اسقار

«وي، ول اتاقتى پيارشى عوي...» دەگەندى قازىر دە ەستىپ قالامىز. شىندىعىندا، پابليك ريلەيشنز، ياعني PR تەحنولوگيالار تەرەڭ زەرتتەلىپ، ءتيىمدى قولدانىلعان جاعدايدا قانداي دا ءبىر ادامعا نەمەسە مەكەمەگە ابىروي اكەلىپ، تابىسىن تاسىتىپ، تاسىن ورگە دومالاتاتىنى تالاي دالەلدەنگەن. پياردى ونەر دەڭگەيىنە جەتكىزگەن ماماندار قازىر وتە باعالى، پيار تەحنولوگيالاردىڭ ۇزدىك ۇلگىلەرى تۋرالى كىتاپتار دا قولدان-قولعا تيمەيدى.

ءيا، قوعامدىق پىكىر باعالاناتىن، وعان قۇلاق اساتىن جەردە شەبەر جۇرگىزىلگەن پياردىڭ ءمانى زور. پيارسىز اتتاپ باسۋ مۇمكىن ەمەس. تاۋاردى قىمباتقا ساتۋ ءۇشىن دە پيار كەرەك، ءوز باعاڭدى ارتتىرۋ ءۇشىن دە پيار كەرەك.

ال ساياساتتا پيارسىز تابىستى بولۋ ءسىرا دا مۇمكىن ەمەس. قازاقستاندا پيار دەگەندە باسقا ەمەس، الدىمەن ساياساتكەرلەر، ساياسي ناۋقاندار ەسكە تۇسەدى عوي. وسى ورايدا، ساياساتكەردىڭ ءسوزى مەن ءىسى ۇيلەسپەيتىن، جارق-جۇرق ەتكەن جارناماسى ناقتى جۇمىسپەن نەگىزدەلمەيتىن شەنەۋنىكتەردىڭ كوپ ەكەنى بايقالادى. بەلگىلى مەكەمەنىڭ قۇلاعىن ۇستاپ تۇرعان ادامداردىڭ قۇرعاق پيارعا عانا يەك ارتاتىنى حالىقتىڭ تۇتاس مەملەكەتتىك قىزمەتكە دەگەن سەنىمىنە سەلكەۋ تۇسىرەتىنى تۇسىنىكتى.

ءيا، «تەلەديداردى اشىپ قالساڭ – عافەكەڭ، راديونى قوسىپ قالساڭ – عافەكەڭ...» دەگەندەي، الەۋمەتتىك جەلىگە كىرسەڭ دە، سايتتاردى شولساڭ دا، گازەتتى پاراقتاساڭ دا، تەلەديدارعا ۇڭىلسەڭ دە جايراڭداپ الدىڭنان شىعا كەلەتىن اكىمدەر بار. ولارعا حالىقتىڭ كوزى مەن قۇلاعى ۇيرەنىپ، كادىمگىدەي جاتتاندى بولىپ قالعان. الايدا، سول شەنەۋنىكتەر تىكەلەي جاۋاپتى سالاداعى بىلىقتار بىرىنەن كەيىن ءبىرى اشىلىپ جاتسا دا، الگى اكىمدەرگە شاڭ جۇقپايدى. الگى اكىمنەن كەيىن وبلىستا ويدىم-ويدىم اسفالتتار، تارتىلماعان سۋ قۇبىرلارى، سالىنباعان ۇيلەر قالادى. شەنەۋنىك بولسا باسقا جەردە جاڭا جوبالاردى تانىستىرىپ، تۇساۋىن كەسىپ جۇرگەنى.

كۇنى كەشە وتكەن 9 مامىر مەرەكەسىنە قاتىستى بۇرىندارى ءتۇرلى كۇلكىلى كەيستەر تىركەلگەن-ءدى. رەسپۋبليكالىق ارنالاردىڭ بىرىنە «ءبىز ارداگەرلەردى پاراشيۋتتەن جەڭىلدىكپەن سەكىرتەمىز» دەپ سۇحبات بەرگەن شولاق بەلسەندىلەردى ايتىپ وتىرمىز. سول سياقتى، تورىنەن كورى جۋىق قاريالاردى مۇزايدىنعا شاقىرىپ، تەگىن كونكي تەبۋدى ۇسىنعان شەنەۋنىكتەر دە بار. زەينەتكەرلەر قوعامدىق كولىكتەردە تەگىن جۇرەتىن قالادا «ارداگەرلەردى تەگىن تاسىپ جاتىرمىز» دەپ ايدى اسپانعا شىعارعان اكىمدىك قىزمەتكەرلەرىن كوردىك. ايتا بەرسە، مۇنداي مىسالدار تولىپ جاتىر.

ۋكرايناداعى پرەزيدەنت سايلاۋىنىڭ ءدۇبىرى جاقىندا عانا باسىلىپ، جاڭعىرىعى ەندى-ەندى سايابىرلاپ كەلەدى. سول ساياسي ناۋقاننان ءسات سايىن حابار تاراتقان باق-تارعا الىس-جاقىن ەلدەرمەن بىرگە ءبىز دە قۇلاق ءتۇرىپ وتىردىق. سونداي ساتتەردىڭ بىرىندە باق-تار كيەۆ مەرى ۆيتالي كليچكونىڭ داۋىس بەرۋ ۋچاسكەسىنە سپورت كيىممەن، ۆەلوسيپەدپەن كەلگەنى تۋرالى حابارلادى. بۇرىنعى اتاقتى بوكسشىنىڭ دەمالىس كۇنى سپورت كيىممەن جۇرگەنى، ۆەلوسيپەد تەپكەنى سونشالىقتى سەنساتسيا ەمەس، ارينە. دەگەنمەن، 3 ميلليونداي حالقى بار تاريحي قالانىڭ، ەل استاناسىنىڭ مەرى كوستيۋم كيىپ قاقيماي، شايتاناربامەن زىرعىپ كەلە قالعانى مەدياعا اجەپتاۋىر ازىق بولدى.

شارشى الاڭدا تالايلاردىڭ شاڭىن قاققان ايگىلى بوكسشىنىڭ بۇل ءىسى ءبىر جاعىنان سالاماتتى ءومىر سالتىن ناسيحاتتاۋ، جاستارعا ۇلگى رەتىندە ۇسىنۋعا تاتيتىن قادام بولدى.

قازاقستانداعى كەيبىر وبلىس، قالا اكىمدەرى بىرەر جىل بۇرىن قىزمەتتىك كولىكتەن باس تارتاتىندارىن، جۇمىسقا ۆەلوسيپەدپەن بارىپ قايتاتىندارىن ايتىپ، وتاندىق باق-تاردى شۋلاتقانى ەسىمىزدە. جۇمىسقا قىمبات شەتەلدىك ماشينامەن ەمەس، قوعامدىق كولىكپەن بارماقشى بولعان شەنەۋنىكتەر دە بار. الايدا، ءبىزدىڭ شەنەۋنىكتەردىڭ اياعى تالىپ قالدى ما، ايتەۋىر بۇگىنگە دەيىن بارلىعى جۇمىسقا جايلى كولىكپەن بارىپ-كەلىپ ءجۇر ەكەن.

قاراپ وتىرساق، دامىعان ەلدەردە ساياساتكەردىڭ ءسوزى مەن ءىسى ۇيلەسپەسە، ونىڭ ساياساتتاعى عۇمىرى دا ونشا ۇزاققا سوزىلماۋى ابدەن مۇمكىن. ال قازاقستاندا كەرىسىنشە پيارى كەلىسكەندەردىڭ قىزمەتى دە ورلەپ كەتۋى قالىپتى قۇبىلىس. حالىق اڭعال ما، الدە باسقا سەبەبى بار ما، ايتەۋىر ءبىزدىڭ قوعامدا ناقتى ىستەن گورى جالاڭ جارناما كوبىرەك باعالاناتىن سياقتى.