الايدا, تاپ قازىر بالىقتىڭ ۋىلدىرىق شاشاتىن كەزەڭى بولعاندىقتان, بۇل ماسەلەدە قىراعىلىق قاجەت بولىپ تۇر. جامبىل وبلىسىندا دا بۇل ماسەلە قولعا الىنىپ, بالىق اۋلاۋشىلاردى باقىلاۋ جولعا قويىلعانىمەن, ءبارىبىر زاڭبۇزۋشىلىقتار ورىن الۋدا. وڭىردە جايىق, ەرتىس, سىرداريا سياقتى الىپ وزەندەر بولماعانىمەن, سۋ توعاندارىنىڭ وزىندە ميلليونداعان بالىق تىرشىلىك ەتۋدە. بۇگىندە جامبىل وبلىسىندا 133 سۋ ايدىنى بار. ونىڭ ىشىندە 18 سۋ ايدىنى رەسپۋبليكالىق, ال 115 ايدىن جەرگىلىكتى ماڭىزى بار سۋ قويمالارىنا جاتادى. قازىرگى كەزدە اعىمداعى جىلدىڭ 15 ءساۋىرى مەن 31 مامىرى ارالىعىندا بالىقتىڭ ۋىلدىرىق شاشۋ كەزەڭى بولعاندىقتان, ونى اۋلاۋعا ءتيىستى مەكەمەلەر تاراپىنان وبلىس بويىنشا تىيىم سالىنىپ وتىر. ناقتى ايتساق, جامبىل وبلىسىندا بالىق رەسۋرستارى مەن باسقا دا سۋ جانۋارلارىنىڭ ۋىلدىرىق شاشۋ جانە كوبەيۋى كەزەڭىنە بايلانىستى بيلىكول, بوگەتكول جانە اقكول كولدەرىن ءوزارا بايلانىستىراتىن اسا وزەنىندە جانە ونىڭ ساعالارىندا بالىق اۋلاۋعا تىيىم سالىنعان. جامبىل وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى باسشىسىنىڭ ورىنباسارى بولات اسامبەكوۆتىڭ ايتۋىنشا, جەرگىلىكتى وزەندەردە تىنىشتىق ايماعىن قۇرۋ ماقساتىندا تاسوتكەل سۋ قويماسىنان جوعارى ورنالاسقان شۋ وزەنىندە, ونىڭ قۇيمالارىندا جانە تالاس وزەنىندە جىل بويى بالىق اۋلاۋعا بولمايدى. سونىمەن قاتار وڭىردە بۇگىندە بالىقتاردى قورعاۋ ماقساتىندا «ۋىلدىرىق-2019» ناۋقانى ۇيىمداستىرىلۋدا.
دەگەنمەن دە بۇگىندە تابيعات بايلىعىنا قيانات جاساۋشى قاسكويلەر ازايماي وتىر. ءتىپتى زاڭسىز بالىق اۋلاۋ دەرەكتەرى جىل وتكەن سايىن ارتا تۇسۋدە. ماسەلەن, بالىقتى قورعاۋ زاڭدىلىقتارىن بۇزعانى ءۇشىن اعىمداعى جىلى 15 ساۋىردەن بەرى ءوڭىر بويىنشا 41 حاتتاما تولتىرىلىپ, زاڭدى بەلدەن باسقاندارعا بارلىعى 494 مىڭ 900 تەڭگە ايىپپۇل سالىنعان. سونىمەن قاتار جامبىل اۋدانىنىڭ اۋماعىنداعى اسا وزەنىندە ەلەكتر قارماقپەن زاڭسىز بالىق اۋلاعان ەكى ازامات ۇستالىپ, ولاردىڭ ءۇستىنەن قىلمىستىق كودەكستىڭ 335-بابى, 3-بولىگى 2,4-تارماقتارىمەن قىلمىستىق ءىس قوزعالعان. زاڭسىز بالىق اۋلاۋشىلىقتىڭ سالدارىنان ولار مەملەكەتكە 575 مىڭ 272 تەڭگە زالال كەلتىرگەن. اتقارىلىپ جاتقان جۇمىس ناتيجەسىندە 15 ساۋىردەن باستاپ «ۋىلدىرىق» شاراسى بويىنشا ينسپەكتسيا قىزمەتكەرلەرى تىيىم سالىنعان اۋلاۋ قۇرالدارىمەن شىققان 6 بالىقشىنى ۇستاپ, حاتتاما تولتىردى. ناتيجەسىندە كەلتىرىلگەن 72 000 تەڭگە زالال مولشەرى ەسەپتەلە وتىرىپ, ىستەرى سوتقا جولدانعان جانە 1 قارماقپەن بالىق اۋلاۋ فاكتىسى تىركەلگەن.
نەگىزى زاڭسىز بالىق اۋلاۋشىلاردىڭ 40 پايىزى بالقاش كولىنەن ۇستالادى ەكەن. بالقاش كولى ەلىمىزدىڭ بىرنەشە وبلىستارىمەن شەكتەسىپ جاتقاندىقتان, مۇندا وزگە وڭىرلەردەن دە بالىق اۋلاۋشىلار كەلەدى. وكىنىشكە قاراي تابيعاتتىڭ بايلىعىن ەمەس, جەكە باسىنىڭ پايداسىن ويلاعاندار بۇگىندە دە ازايماي وتىر. الايدا, جامبىل وبلىسىندا بالىقتىڭ ۋىلدىرىق شاشاتىن مەزگىلىنە وراي اۋلاۋعا تىيىم سالىنۋىنا بايلانىستى بەلسەندى جۇمىس جۇرگىزىلۋدە. سالا ماماندارى زاڭسىزدىققا جول بەرمەۋ ماقساتىندا بارلىق ارەكەتتى جاساپ باعۋدا. ماسەلەن, بالىقتى تيىسىنشە قورعاۋدى ۇيىمداستىرۋ ماقساتىندا اتالعان ينسپەكتسيا ماماندارى, وبلىستىق پوليتسيا دەپارتامەنتى, وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى مەن №2035 شەكارا قىزمەتى بىرلەسىپ جۇمىس اتقارۋدا. الايدا, ءار ازامات تابيعات بايلىعىنا جاۋاپكەرشىلىكپەن قاراسا, جۇگەنسىزدىكتىڭ دە جولى كەسىلەر ەدى. ءاربىر ادام زاڭسىزدىقتىڭ زاردابى كوپ ەكەنىن ەسكەرە جۇرسە, بايلىقتىڭ كوزى بالىق تا ساقتالىپ قالماق.
جامبىل وبلىسى
