بۇگىندە ۆەنەسۋەلا حالقىنىڭ 80 پايىزى جارىقسىز وتىر. ەلدەگى ەڭ ءىرى گۋري ەلەكتر ستانساسىندا اقاۋلار شىققان. مودۋرو ماسەلەنى شەشۋدىڭ ورنىنا «اقش يمپەراليستەرى ءبىزدىڭ حالىققا جاريالاعان ەلەكتروندى سوعىسى توقتايدى. بوليۆار جانە چاۆەس حالقىن ەشكىم جەڭە المايدى. پاتريوتتار بارىنشا بىرىكسىن» دەپ تۋيتتەرىندە جازىپ قويدى. قۇددى ءبىر كەڭەس وداعىنىڭ يدەولوگيالىق ۇرانى دەرسىڭ. جاعدايدى گۋايدو دا پايدالانىپ كەتتى. ءسويتىپ ول دا تۋيتتەرىندە «2009 جىلى بيلىك ەلەكترو ەنەرگەتيكادا اپاتتى رەجىم ەنگىزدى. 2013 جىلى ونى ميليتاريزاتسيا جاسادى. ەنەرگوجۇيەسىنەن 100 ملرد دوللارداي ۇرلانعان» دەپ جاريالاپ قويدى. جالپى بۇگىندە ساياسي ءمالىمدەمەلەر وسىلايشا الەۋمەتتىك جەلى ارقىلى ءجيى جاسالادى. بۇل ادەتتى كەزىندە دونالد ترامپ اينالىمعا ەنگىزگەن ەدى. ەكى ساياساتكەر وسىلايشا تۋيت اتىسىپ ءجۇرگەندە سوڭعى 4 ايدا جارىقتىڭ جوعىنان اۋرۋحانالاردا 79 ناۋقاس كوز جۇمعان. ءدارى-ءدارمەك, ازىق-ت ۇلىك ساقتايتىن ورىن جوق. ترانسپورت ءجۇيەسى توقتاپ قالدى. تاماق جەتىسپەيدى. ەل ۆاليۋتاسى بوليۆار قۇنسىزدانىپ كەتكەن. گيپەرينفلياتسيا 1,6 ملن پايىزدى قۇرادى. ەندى كەشە عانا برازيليا ۆەنەسۋەلانىڭ ۆاليۋتاسى بوليۆاردى باسىپ شىعارمايتىنى ءمالىم بولدى. بۇل جاعداي سوڭعى 5-6 جىلدان بەرى جالعاسىپ كەلەدى. سونىڭ كەسىرىنەن 3 ملن-داي ازامات وزگە ەلدەرگە كوشىپ كەتكەن.
گۋايدو وسى جىلدىڭ قاڭتارىندا ءوزىن جاڭا پرەزيدەنت دەپ جاريالاعان سوڭ ونى الەمنىڭ 50 مەملەكەتى مويىندادى. مودۋرونى رەسەي, بەلارۋس, تۇركيا, قىتاي, كۋبا عانا جاقتاپ وتىر. تەك جاقتامايدى, ارا-اراسىندا كومەگىن دە بەرىپ تۇر. باتىس الەمى مودۋرونى مويىندامادى, سەبەبى بىلتىرعى پرەزيدەنت سايلاۋىندا ول ۇلكەن زاڭسىزدىقتارعا جول بەرگەن دەيدى. سونىمەن قاڭتاردان بەرى ەلدە ەكى بيلىك رەجىمى ورنادى. گۋايدو وسى پروتسەسكە نۇكتە قويۋ ءۇشىن جاقىندا ازاتتىق وپەراتسياسىن جاساۋعا تىرىستى.
وپەراتسيانىڭ ءمانى – حالىقتىڭ جانە گۋايدو تاراپىنا كوشكەن كەيبىر اسكەريلەردىڭ كومەگىمەن مەملەكەتتىك توڭكەرىس جاساۋ بولاتىن. سەبەبى كارلوتا اۋەبازاسىنداعى ءبىراز اسكەريلەر وپپوزيتسيا تاراپىنا كوشىپ كەتكەن ەدى. ەندى ۆەنەسۋەلادا اسكەريلەر مەن اسكەريلەر ءبىر-بىرىنە قارسى شىعا باستادى. بىراق ازاتتىق وپەراتسياسى ءالى ماقساتىنا جەتكەن جوق. گۋايدو ءوز سوزىندە ارميا ونىڭ تاراپىنا كوشكەنىن ايتىپ ءجۇر. ول اسكەريلەردى وپپوزيتسياعا كوشىرۋ ءۇشىن كەلىسسوزدەر جۇرگىزىپ تە كەلەدى. بىراق ءالى دە بولسا قورعانىس ءمينيسترى ۆلاديمير لوپەc باستاعان اسكەريلەر نيكولاس مودۋروعا ادال. وسى ادالدىعىن پاش ەتۋ ءۇشىن مودۋرو اسكەريلەردىڭ اينالاسىندا تۇرىپ, تەلەۆيدەنيەدەن بىرنەشە رەت سويلەدى دە.
ۆەنەسۋەلا حالقى مودۋروعا قانشا قارسى بولسا دا, الەمنىڭ باسىم بولىگى ونى سىناپ جاتسا دا, بيلىكتى ساقتاۋدا نەگىزگى ءرولدى قارۋ يەسى ارميا اتقارىپ تۇر. سەبەبى اسكەريلەر مودۋرو بيلىگىن قورعاشتاپ وتىر ءارى كوشەگە نارازىلىق كورسەتۋگە, ميتينگكە شىققان ازاماتتاردى جازالاپ كەلەدى. ماسەلەن, 2019 جىلى تەك سول ميتينگ, پيكەتتەردەن ۆەنەسۋەلادا 57 ادام كوز جۇمعان. دامۋشى ەلدەردە ساياسي داعدارىس ورناسا, ءىرى دەرجاۆالاردىڭ ارالاساتىن ادەتى بار. سيريا, ليۆيا, ۋكراينا, گرۋزيانى ەسكە الىڭىز. وسى جولى دا مودۋروعا وزگە ەلدەردەن ۇلكەن قىسىم جاسالىپ جاتىر. ماسەلەن, دونالد ترامپ ۆەنەسۋەلانىڭ جاڭا باسشىسى دەپ وپپوزيتسيا جەتەكشىسى حۋان گۋايدونى مويىندادى. كەيىن اقش ادەتىنە سالىپ, وسى ەلدىڭ ەڭ ءىرى مۇناي كومپانياسى PDVSA-دىڭ اكتيۆتەرىن بۇعاتتادى. الايدا ەلدە اشتىق باستالعانىن كورىپ, گۋمانيتارلىق كومەك جىبەرمەك بولعان. مودۋرو ونى قابىلداۋدان باس تارتتى.
ەندى ۆەنەسۋەلاعا شەتەلدەن اسكەر كىرگىزۋ ماسەلەسى تۇر. ۆاشينگتون بۇل جولدى دا قاراستىرىپ جاتقانىن بىرنەشە رەت اشىق ءمالىمدەدى. وپپوزيتسيونەر حۋان گۋايدو وعان قارسى ەمەس ەكەنىن ايتقان-دى. جاقىندا اقش-تىڭ مەملەكەتتىك حاتشىسى مايك پومپەو: «ەگەر قاجەتتىلىك تۋىنداسا, اسكەري ارەكەتكە بارۋىمىز مۇمكىن. بۇل – اقش-تىڭ قولىنان كەلەدى. ارينە, جاعدايدى زورلىق-زومبىلىققا جەتكىزبەۋ ءۇشىن قولدان كەلگەننىڭ ءبارىن جاسايمىز. سول ءۇشىن بارلىق تاراپتاردى وقىس ارەكەتتەردەن اۋلاق بولۋعا شاقىرامىز. ءبىز مادۋرو ورنىنان كەتىپ, جاڭا سايلاۋ ءوتىپ, ۆەنەسۋەلادا بيلىكتىڭ بەيبىت جولمەن اۋىسقانىن قالايمىز» دەدى.
الايدا رەسەي وعان جول بەرمەۋگە تىرىسىپ باعۋدا. بيىل جىل باسىندا ماسكەۋ كاراكاسقا مودۋرونى وپپوزيتسيادان قورعاۋ ءۇشىن «ۆاگنەر» اتتى جەكە اسكەري كومپانياسىنىڭ 400 جالدامالى جاۋىنگەرىن جىبەردى دەگەن مالىمەت تارادى. بۇل كومپانيا بۇعان دەيىن دە ساربازدارىن جىبەرگەن سەكىلدى. رەسەي مودۋرونى قورعاۋ ءۇشىن 400 اداممەن شەكتەلمەيدى. ماسەلەن, بيىل ۆەنەسۋەلادا كالاشنيكوۆ اۆتوماتىن شىعاراتىن زاۋىت اشىلادى. سونداي-اق رەسەي سۋ-30مك2 جويعىش ۇشاقتارىن, مي-35م تىكۇشاقتارىن, ت-72 تانكتەرىن, بمپ-3 ي بتر-8 بروندالعان ماشينالارىن جىبەرىپتى. ەندى بۇل كومەككە, اسكەر سانى ودان ءارى ارتقانىنا قارسى ەمەسپسىز دەپ ۆەنەسۋەلانىڭ اسكەري باسشىلارى جاقىندا مالىمدەمە جاسادى.
سونىمەن, ۆەنەسۋەلا بۇگىن اشتىقتان دا, ساياسي داعدارىستان دا تيتىعىپ, شارشاعان ەل. جوعارىدا ايتقانداي, نيكولاس مودۋرو بار كۇشىمەن بيلىكتە قالۋعا تىرىسىپ باعۋدا. 35 جاسار وپپوزيتسيونەر گۋايدو ونىڭ ورنىنا كەلۋدىڭ امالىن جاساپ جاتىر. اقش پەن رەسەيدىڭ كۇرەسى دە وسى ەلدە قاتار جۇرۋدە. بۇرىنعى قىرعي-قاباق سوعىستىڭ XXI عاسىرداعى جالعاسى. بىراق قوس تاراپ تا وسى داعدارىسقا نۇكتە قويۋ ءۇشىن اسكەري شابۋىلعا جول بەرىلسە, تالاي جان بەكەر كوز جۇماتىنىن تۇسىنەدى. سەبەبى ۆەنەسۋەلانىڭ ءوز ارمياسى دا ءالسىز ەمەس. جالپى وسى جاعداي بۇرىننان كەلە جاتقان ساياسي تەزيستى قايتا ەسكە ءتۇسىرەدى. شەتەلدىكتەردىڭ ىشكى ىسىڭە ارالاسقانى – مەملەكەتتىڭ بەرەكەسى قاشقانى.
