ەڭ ۇزدىك داۋىس يەسى دەپ قاراساي اۋدانى جالپاقساي اۋىلىنىڭ ون ەكى جاسار تۇرعىنى ارۋجان ءراحمانالى تانىلدى. دارىندى قىز 8 جاستان باستاپ ۆوكال ۇيىرمەسىنە قاتىسادى. ول ءتۇرلى قالالىق, وبلىستىق جانە رەسپۋبليكالىق دەڭگەيدەگى ۆوكالدىق بايقاۋلاردىڭ جەڭىمپازى. «بالا داۋىسى» تۋرالى عالامتور جەلىسىنەن وقىپ, بايقاۋعا تەك 8 بەن 12 جاس ارالىعىنداعى بالالار قاتىسا الاتىنىن بىلگەن قىز ءوزىنىڭ سوڭعى مۇمكىندىگىن جىبەرگىسى كەلگەن جوق. اناسىنىڭ ايتۋى بويىنشا, قىزى الماتى وبلىسىنىڭ ۇزدىكتەر ۇشتىگىنە كىرەتىنىنە سەنىمدى بولعاندىعىنا وتباسى العاشىندا تاڭعالدى. بۇل سەنىمدىلىكتى جاقسىلىققا جورىپ, اكە-شەشەسى بايقاۋعا قاتىسۋعا رۇقساتتارىن بەردى. ارۋجان قازىلار القاسىن عانا ەمەس, سونىمەن قاتار كورەرمەندەردى ەرەكشە داۋىس ىرعاعى مەن تابيعي اسەرلىلىگىمەن باۋراپ الدى.
كۇزدە ارۋجان قازاقستاننىڭ باسقا ايماقتارىنىڭ 16 فيناليسىمەن «جۇلدىزدى ارمان ۇيىندە» كەزدەسەدى. بايقاۋدىڭ سۋپەرفينالىنا دايىندىق ساتىندە بالالار ۆوكال, حورەوگرافيا جانە ارتىستىك قابىلەتتەرىن ارتتىراتىن ساباقتارعا قاتىسادى.
