قاراعاندى ۆوكزالىنداعى كەڭ اۋقىمداعى قايتا قۇرۋ جۇمىستارى اياقتالعان سوڭ ونىڭ جولاۋشىلاردى وتكىزۋ قابىلەتى ەكى جارىم ەسەگە ارتۋى ءتيىس دەگەن بولجام بار. ەڭ باستىسى, تەمىر جول قاقپاسى ءوزىنىڭ كوز ۇيرەنگەن قاسبەتىنىڭ تاريحي كەلبەتىن ساقتاپ قالادى. البەتتە, ءىشى كەڭەيىپ, جابىق پەررون, ەسكالاتورلار مەن جولاۋشىلارعا ارنالعان قوسىمشا تەرمينال پايدا بولادى.
جاڭا جوبانىڭ ۆوكزالدى ادام تانىماستاي وزگەرتەتىن ءتۇرى بار. مىسالى, ۆوكزال ءۇيىنىڭ وڭ قاپتالىنا جاپسارلاس ءۇش قاباتتى عيمارات سالىنادى. مۇندا بيلەت كاسسالارى, كۇتۋ زالى, مەدپۋنكت, دەمالىس بولمەسى, ساۋدا ءدۇڭگىرشەكتەرى, دارەتحانالار سياقتى جولاۋشىلارعا قاجەتتى يگىلىكتىڭ ءبارى قاراستىرىلادى. مۇمكىندىگى شەكتەۋلى جاندار دا بۇل جەردە وزدەرىن جايلى سەزىنەتىن بولادى.
قۇرىلىس تولىق اياقتالعاندا, جاڭارعان ۆوكزال ىشىنە 2300 ادام سىيادى دەگەن بولجام بار. جولاۋشىلاردى وتكىزۋ قابىلەتى 8 مىڭ ادامعا دەيىن جەتەدى دەپ جوسپارلانعان.
تاياۋدا وبلىس اكىمى تەمىر جول ۆوكزالىنا ارنايى بارىپ, ونداعى قۇرىلىستىڭ جاي-جاپسارىمەن تانىستى. بىردەن ايتۋ كەرەك, مۇنداعى شارۋانىڭ اياق الىسى ءوڭىر باسشىسىنىڭ كوڭىلىنەن شىقپادى. ەڭ ءبىرىنشى سەبەپ, قۇرىلىسشىلار كەستەدەگى بەلگىلەنگەن مەرزىمنەن ءبىر جارىم ايعا كەشەۋىلدەپ كەلەدى ەكەن.
قازىرگى ۋاقىتتا ۆوكزال باسىنداعى قۇرىلىسقا 110 ادام جۇمىلدىرىلعان. ال كەستەدەگى مەجەلى ۋاقىتتى قۋىپ جەتۋ ءۇشىن قوسىمشا جۇمىس كۇشى قاجەت. سوندىقتان مەردىگەرلەر تاعى 80 ادامدى جۇمىسقا تارتۋدى جوسپارلاپ وتىرعانىن ايتتى.
– بۇل – بىزدەگى باستى نىسان! جىلدامداتۋ كەرەك. بىراق بۇل ساپاعا اسەر ەتپەۋى ءتيىس, – دەدى وبلىس اكىمى. سونىمەن بىرگە قالا اكىمىنە, قۇرىلىس, جولاۋشىلار كولىگى جانە اۆتوموبيل جولدارى باسقارمالارىنىڭ باسشىلارىنا قۇرىلىستى كۇن سايىن باقىلاۋدى قاتاڭ تاپسىردى. ال ءوزى بولسا, تەمىر جول ۆوكزالىنا اپتاسىنا ءبىر رەت كەلىپ, جۇمىس بارىسىن تەكسەرىپ وتىراتىنىن ەسكەرتتى.
قاراعاندى ۆوكزالىن قايتا قۇرۋمەن نۇر-سۇلتان قالاسىندا تىركەلگەن «كامستروي» جشس اينالىسىپ جاتىر. مەردىگەر كومپانيانىڭ وكىلى ازامات قاجين مالىمدەگەندەي, قۇرىلىس جۇمىستارى جەلتوقسان ايىندا تولىقتاي اياقتالۋى ءتيىس. البەتتە, ءىرى, اۋقىمدى جۇمىستى قولعا العاندا, كەيبىر مايدا-شۇيدە شارۋالاردان بەرەكە قاشاتىنى بەلگىلى. ماسەلەن, قاراعاندى ۆوكزالىندا قايتا قۇرۋ جۇمىستارى باستالعاندا, ەڭ الدىمەن عيمارات ىشىندە جولاۋشىلارعا ءتۇرلى قىزمەت تۇرلەرىن كورسەتەتىن جەكە كاسىپكەرلەر زارداپ شەكتى. اتاپ ايتقاندا, ۆوكزال ىشىندە ەكى بىردەي تاماقتاندىرۋ نۇكتەسىن جالعا الىپ وتىرعان جەكە كاسىپكەر كۇلنار بەكجانوۆا امالدىڭ جوقتىعىنان كەلىسىمشارتتى ۇزۋگە ءماجبۇر بولىپتى. كاسىپكەردىڭ سوزىنە سەنسەك, ءۇش جىلعا جالعا الۋ اقىسىن تولەگەنى ءوز الدىنا, ۆوكزالداعى ءدامحانالاردىڭ ءجوندەۋىن ءوزى جۇرگىزىپ, اجەپتاۋىر سوماداعى قارجى جۇمساعان. «الداعى ۋاقىتتا جاعدايدىڭ قالاي بولاتىنى بەلگىسىز», دەيدى شاراسىز كاسىپكەر. مۇنداي كۇيگە دۋشار بولعان جالعىز كۇلنار عانا ەمەس. ۆوكزالدان نەسىبەسىن ايىرىپ جۇرگەن باسقا كاسىپكەرلەردىڭ دە جاعدايى مەن كوڭىل كۇيى ءماز ەمەس.
دەگەنمەن, قيىندىققا تاپ بولعان بيزنەس وكىلدەرىنە جەرگىلىكتى كاسىپكەرلەر پالاتاسى كومەككە كەلدى. ولار جاعدايدى جان-جاقتى زەرتتەپ بولعاننان كەيىن, «قازاقستان تەمىر جولى» ۇك» اق ماگيسترالدىق جەلى ديرەكتسياسىنا بىرنەشە ۇسىنىسى بار حات جونەلتتى. سونىڭ ناتيجەسىندە كەنشىلەر استاناسىنا «قتج» ۇك» اق فيليالىنىڭ ۆوكزال شارۋاشىلىعى ءجونىندەگى ديرەكتورىنىڭ ورىنباسارى اباي دوسانوۆ ارنايى كەلىپ, قالىپتاسقان جاعدايدان شىعۋدىڭ ناقتى جولدارىن ايتتى.
«ءبىز ۇزاقمەرزىمدى, ياعني ءۇش جىلعا ارنالعان كەلىسىمشارتى بار كاسىپكەرلەرگە باسىمدىق بەرەمىز. قالعاندارىنىڭ كەلىسىمشارت مەرزىمى ءساۋىر ايىندا اياقتالعان سوڭ, كونكۋرس جاريالايمىز. ءجوندەۋ جۇمىستارى كەزىندە كاسىپكەرلەرمەن قىسقا مەرزىمدىك كەلىسىمشارت جاساسۋ جونىندەگى حات باسشىلىققا جىبەرىلدى», دەدى ول. ال كاسىپكەرلەر پالاتاسىنىڭ جەرگىلىكتى فيليالى جاعدايدى ءجىتى قاداعالاپ وتىراتىنىن ءمالىمدەدى.
قازىرگى تاڭدا ۆوكزالداعى بيلەت كاسسالارى كورشى تۇرعان اۆتوۆوكزال عيماراتىنىڭ ءبىر بۇرىشىنا ۋاقىتشا كوشىرىلگەن. پويىز توسقان جولاۋشىلار بولسا, اياداي عانا جەرگە سىيماعاندىقتان, اۆتوۆوكزالدىڭ كۇتۋ زالىن پانالاۋعا ءماجبۇر. ال اۆتو-ۆوكزال اۋماعى جەكەمەنشىك تەلىم بولعاندىقتان, ونىڭ ءوز ءتارتىبى بار. ماسەلەن, اتالعان نىسان جاز ايلارىندا تاڭعى 7.00-دەن تۇنگى 23.00-گە دەيىن عانا جۇمىس ىستەيدى. ءتىپتى سوڭعى اۆتوبۋستار 21.00-دە ساپارعا اتتاناتىندىقتان, اۆتوۆوكزال ەسىگى بۇدان ەرتەرەك تە جابىلىپ قالاتىن كۇندەر بولادى. ياعني, مۇنداي جاعدايدا پويىز توسقان اعايىننىڭ تارتىپكە باعىنىپ, اۆتوۆوكزال ءىشىن امالدىڭ جوقتىعىنان بوساتاتىنى بەلگىلى. ءمىنە, ۆوكزال باسىندا قۇرىلىس جۇمىستارى قىز-قىز قايناپ جاتقان كەزدە, جولاۋشىلار وسىنداي قيىنشىلىقتارعا تاپ بولىپ جاتىر. ارينە, مۇنىڭ ءبارى ۋاقىتشا ەكەنى بەلگىلى. ال ازىرگە ونداعان جىلدار بويى كۇردەلى جوندەۋ كورمەگەن قاراعاندى ۆوكزالى قايتا تۇلەگەندە, مۇنىڭ ءبارى دە ءبىر كورگەن تۇستەي وتە شىعار دەپ كوڭىلدى جۇباتقاننان باسقا امال جوق.
قاراعاندى
