بۇگىن ايەلدەرگە جارقىن اسكەري مانساپ قۇرۋعا جانە وتانىمىزدىڭ تولىق قۇقىلى قورعاۋشىلارى بولۋعا مۇمكىندىك بەرىلگەن. مىسالى, يزرايلداعىداي اسكەرگە شاقىرىلۋ مىندەتتى بولماسا دا, قازاقستاندىق قىزدار قارۋلى كۇشتەر قاتارىندا قىزمەت ەتەدى. بۇگىنگى كۇنى ستاتيستيكالىق دەرەكتەر بويىنشا, ارمياداعى ايەلدەردىڭ ۇلەسى بارلىق ءاسكەري قىزمەتشىلەردىڭ سانىنىڭ 11 پايىزىن قۇرايدى.
اسكەري قىزمەتتىڭ كۇردەلى جاعدايلارىنا جانە جوعارى جاۋاپكەرشىلىككە قاراماستان, ايەلدەر ەلىمىزدىڭ قارۋلى كۇشتەرىندە ەرلەرمەن بىرگە مانساپتىق ساتىمەن ىلگەرىلەيدى جانە قورعانىس مينيسترىنىڭ كەڭەسشىسى, وڭىرلىك قولباسشىلىق اسكەرلەرى قولباسشىسىنىڭ ورىنباسارى, دەپارتامەنت باستىعى جانە باسقا دا جوعارى باسشىلىق لاۋازىمداردى اتقارادى.
ايەلدەر قاۋىمى وكىلدەرىن قازاقستان رەسپۋبليكاسى قارۋلى كۇشتەرىنىڭ بارلىق تۇرلەرى مەن تەكتەرىندە كەزدەستىرۋگە بولادى. قازاقستاننىڭ ارمياسىندا قىزدار تەك مەدبيكەلەرمەن, بايلانىسشىلارمەن جانە ءىس جۇرگىزۋشىلەرمەن كاۋىمداسۋدان الدەقاشان قالعان. بۇگىن وتانىمىزدى قورعاۋ ىسىندە ۇشقىش, مەرگەن, بارلاۋشى جانە باسقا دا قىزدار ءجۇر.
قارۋلى كۇشتەردە العاشقى رەت اعا ۇشقىش – اۆياتسيالىق ەسكادريليا اۆياتسيالىق بۋىنىنىڭ نۇسقاۋشىسى لاۋازىمىنا ايەل لەيتەنانت اردانا امىرجانقىزى بوتاي تاعايىندالدى, ول جاۋىنگەرلىك ۇشاقتى كاسىبي تۇردە باسقارادى.
اسكەري-تەڭىز كۇشتەرىندە ەرلەرمەن قاتار اسكەري كورابل ەكيپاجىنىڭ قۇرامىندا مىندەتتەردى ورىندايتىن قىزدار قىزمەت ەتەدى.
اسكەري قىزمەتشى ايەلدەردىڭ الەمدىك دەڭگەيدە قازاقستاننىڭ ءيميدجى مەن بەدەلىن نىعايتۋعا قوسقان ۇلەستەرىن اتاپ وتكەن ءجون. جىل سايىن ءبىزدىڭ ارميامىزدىڭ نازىك وكىلدەرى ەرلەرمەن قاتار ءارتۇرلى حالىقارالىق جارىستار مەن وقۋ-جاتتىعۋلارعا بەلسەندى تۇردە قاتىسادى. لەيتەنانت زامزاگۇل فايزوللاقىزى فايزوللانوۆا دزيۋدو جانە قازاقشا كۇرەستەن قازاقستان رەسپۋبليكاسى چەمپيوناتىنىڭ جەڭىمپازى. مايور ولگا رىپاكوۆا – ەلىمىزدىڭ جانە قارۋلى كۇشتەردىڭ ماقتانىشى. جەڭىل اتلەتيكادان وليمپيادا چەمپيونى, ءۇش وردەننىڭ يەگەرى.
ودان باسقا, قارۋلى كۇشتەردە اسكەري ءبىلىم جانە عىلىم سالاسىندا وزدەرىنىڭ مانساپتارىن جالعاستىرعان ايەلدەر اسكەري قىزمەت وتەيدى, ولار اسكەري عىلىمدى دامىتۋ ماسەلەلەرىمەن تىكەلەي اينالىسادى جانە ولاردىڭ عىلىمي دارەجەلەرى بار. ولار – ەكونوميكا عىلىمدارىنىڭ دوكتورى ا.ن.تولەمباەۆا, تاريح عىلىمدارىنىڭ كانديداتتارى, مايور ن.س.ىسقاقوۆا جانە ا.ق.توگىسوۆا.
الەمدەگى بەيبىتشىلىك پەن قاۋىپسىزدىكتى قولداۋ ءۇشىن بۇۇ ايقىنداعان تالاپتارعا سايكەس قازاقستان رەسپۋبليكاسىنىڭ قورعانىس مينيسترلىگى قازاقستان رەسپۋبليكاسىنىڭ پارلامەنتى بەكىتكەن بۇۇ-نىڭ ميسسيالارىنا اسكەري بايقاۋشىلار جانە شتابتىق وفيتسەرلەر رەتىندە قاتىسۋى ءۇشىن اسكەري قىزمەتشىلەردى جىبەرۋ جونىندە جۇمىس جۇرگىزەدى.
قارۋلى قاقتىعىستاردا ايەلدەر مەن بالالار كوپتەگەن قىلمىستىڭ وبەكتىسى, سونىڭ سالدارىنان ولار دەنە جاراقاتىن عانا ەمەس, پسيحولوگيالىق «جاراقاتتار» دا الادى.
ايەلدەر مەن بالالاردىڭ قىلمىستىق بۇزۋشىلىق زارداپتارىن جەڭۋدە ولارعا پسيحولوگيالىق جاردەمدى ءبىرىنشى بولىپ بىتىمگەرشى ايەلدەر كورسەتەدى. وسىلايشا اسكەري قىزمەتشى ايەلدەردىڭ اسكەري كومپونەنت قۇرامىندا بولۋى بەيبىتشىلىك پەن قاۋىپسىزدىكتى نىعايتۋدا ماڭىزدى ءرول اتقارادى.
2018 جىلى ءتورت اسكەري قىزمەتشى ايەل ىرىكتەلدى جانە ءتيىستى ءبىتىمگەرشىلىك دايارلىقتان ءوتتى.
قازاقستان رەسپۋبليكاسىنىڭ بىتىمگەرشىلىك قىزمەتى سالاسىنداعى ايەلدەر ءرولىن دامىتۋدىڭ جاڭا پاراعىن ءبىرىنشى وفيتسەر ايەل بولىپ قازاقستان رەسپۋبليكاسى قورعانىس مينيسترلىگى كادرلار جانە اسكەري ءبىلىم دەپارتامەنتى ءبولىمىنىڭ وفيتسەرى, مايور شولپان تاۋىشوۆا اشتى, ول 2018 جىلى جەلتوقساندا اسكەري بايقاۋشى رەتىندە باتىس ساحاراعا رەفەرەندۋم وتكىزۋ جونىندەگى بۇۇ-نىڭ ميسسياسىنا جىبەرىلدى. بيىلعى اقپاندا باتىس ساحاراعا ەكىنشى اسكەري قىزمەتشى ايەل بولىپ كاپيتان ايجان جاسۇزاقوۆا اتتاندى.
اسكەري اتاق بەرۋ اسكەري قىزمەتشىلەردىڭ مانساپتىق ءوسۋىنىڭ باستى اسپەكتىسى جانە جەكە باسىنىڭ ىنتاسى بولىپ تابىلادى. كەزەكتى اسكەري اتاقتاردى مەرزىمىنەن بۇرىن بەرۋ ەرەكشە ءرول اتقارادى. اسكەري بورىشىن ۇلگىلى ورىنداعانى ءۇشىن بارلىعى 33 اسكەري قىزمەتشى ايەلگە اسكەري اتاقتار مەرزىمىنەن بۇرىن بەرىلدى.
قورىتىندىلاي كەلە, بۇگىندە قازىرگى زامانعى ارميانى ايەلدەرسىز ەلەستەتۋ قيىن ەكەنىن اتاپ وتكىم كەلەدى. كەيبىر مىندەتتەردى وزدەرىنىڭ ەرەكشەلىكتەرىنە قاراي ولار ەرلەرگە قاراعاندا اناعۇرلىم جاۋاپتى جانە ءتيىمدى ورىندايدى. ايەلدەر قاۋىمى وكىلدەرىنە ارميادا ورىن بار ما دەگەن سۇراق وزەكتى ەمەس دەپ ساناۋعا بولادى. ارمياداعى ايەل – انالىق قامقورلىق پەن جوعارى جاۋاپكەرشىلىكتىڭ بەينەسى سيمۆولى.
ءمۇسىلىم التىنباەۆ,
قازاقستان رەسپۋبليكاسى قورعانىس ءمينيسترىنىڭ ورىنباسارى, گەنەرال-لەيتەنانت
