اراعا ءبىر جىل سالىپ, ەلباسى مەملەكەتتىڭ اسكەري قاۋىپسىزدىگىن قامتاماسىز ەتەتىن «قازاقستان رەسپۋبليكاسىنىڭ قورعانىسى جانە قارۋلى كۇشتەرى تۋرالى» زاڭعا قول قويدى. ءسويتىپ قارۋلى كۇشتەردىڭ قۇرامى انىقتالدى. سول تۇستا وعان اسكەري باسقارۋ ورگاندارى, قۇرلىق اسكەرلەرى, اسكەري-اۋە كۇشتەرى, اۋە شابۋىلىنا قارسى قورعانىس اسكەرلەرى, اسكەري-تەڭىز كۇشتەرى, تىل, ازاماتتىق قورعانىس باسقارماسى مەن بولiمدەرi كىردى. سونداي-اق قارۋلى كۇشتەر ىقتيمال سوعىس جاعدايىندا ۇقك شەكارا اسكەرلەرىن, ءىىم ىشكى اسكەرلەرىن, رەسپۋبليكالىق ۇلاندى جانە ازاماتتىق قورعانىستىڭ باسقارۋ ورگاندارى مەن بولiمدەرiن قامتيدى. بۇعان قوسا, مەملەكەت باسشىسى جوعارعى كەڭەستىڭ قۇرىلىمىندا ۇلتتىق قاۋىپسىزدىك جانە قورعانىس كوميتەتىن قۇرۋ تۋرالى ۇسىنىستى ماقۇلدادى.
ەلباسىنىڭ ستراتەگيالىق شەشىمدەرى ەلىمىزدىڭ جاڭا قارۋلى كۇشتەرىنىڭ قۇرىلۋىنا نەگىز بولدى. ونىڭ قاتارىندا يادرولىق قارۋدان باس تارتۋ تۋرالى شەشىمىن بولەك اتاپ وتكەن ءجون. نۇرسۇلتان نازارباەۆتىڭ جارلىعىمەن سەمەي يادرولىق پوليگونى جابىلدى. قازاقستان الەمدەگى ءتورتىنشى يادرولىق الەۋەتكە جەتكىزەتىن كەڭەستىڭ اسكەري مۇراسىنان باس تارتتى. ول جەردىڭ كەز كەلگەن نۇكتەسىنە جەتۋگە قاۋقارلى 1200 يادرولىق وقتۇمسىعى بار 110-نان اسا بالليستيكالىق زىمىران ەدى. وسىلايشا تۇڭعىش پرەزيدەنت ەلىنىڭ تىنىشتىعى مەن گۇلدەنۋىن ساياسي امبيتسيالاردان جوعارى قويدى. بۇل قازاقستاندىق ارميا ءۇشىن دە تۋرا جول بولدى, ويتكەنى يادرولىق كۇشكە ارقا ءسۇيەمەي, جاڭادان اسكەري الەۋەتتى قالىپتاستىرۋعا كۇش سالدى.
وسىدان تۋرا 20 جىل بۇرىن, 1999 جىلى 7 مامىردا قورعانىس مينيسترلىگى مەن قازاقستان قارۋلى كۇشتەرى باس شتابى ەلورداعا قونىس اۋداردى. جاڭا عاسىردىڭ باسىندا 2000 جىلعى اقپاندا ەكىنشى اسكەري دوكترينا بەكىتىلىپ, قارۋلى كۇشتەردى قۇرۋ جانە رەفورمالاۋدىڭ باسىم باعىتتار ناقتىلاندى. سول جىلى تۇڭعىش پرەزيدەنت قازاقستان ارمياسىنىڭ اسكەري الەۋەتىن جاقسارتۋ ءۇشىن وزگەرىستەر ەنگىزىپ, قارۋلى كۇشتەر قايتادان جالپى ماقساتتاعى كۇشتەر جانە اۋە قورعانىسى كۇشتەرى بولىپ ەكى ءتۇرلى قۇرىلىمعا ءبولىندى. جالپى ماقساتتاعى كۇشتەرگە زىمىران اسكەرلەرى مەن ارتيللەريا جانە اۋە شابۋىلىنا قارسى قورعانىس اسكەرلەرى كىردى. ءبىر جىلدان سوڭ قورعانىس مينيسترلىگى مەن باس شتابتىڭ فۋنكتسيالارى ءبولىندى.
ال 2003 جىلدان باستاپ قارۋلى كۇشتەر ءۇش ءتۇرلى قۇرىلىمنان – قۇرلىق اسكەرلەرى, اۋە قورعانىسى كۇشتەرى جانە اسكەري-تەڭىز كۇشتەرىنەن قۇرالدى. ءموبيلدى كۇشتەر نەگىزىندە اسكەردىڭ جاڭا ءتۇرى – اەروۇتقىر اسكەرلەرى جاساقتالدى. زىمىران اسكەرلەرى مەن ارتيللەريا جەكە اسكەر رەتىندە قۇرىلدى. سونداي-اق شتاب باستىقتارىنىڭ كوميتەتى قۇرىلىپ, اسكەري وكرۋگتەر «استانا», «شىعىس», «باتىس» جانە «ءوڭتۇستىك» وڭىرلىك قولباسشىلىقتارى بولىپ قايتا قۇرىلدى.
مەملەكەت باسشىسى ىقتيمال قاۋىپ-قاتەرلەرگە قارسى جەدەل ارەكەت ەتەتىن ءححى عاسىردىڭ ارمياسىن قۇرۋ تۋرالى تالاپ قويدى. سوندىقتان قارۋلى كۇشتەردى ودان ءارى جەتىلدىرۋدىڭ باسىم باعىتى – اسكەردى كاسىبيلەندىرۋ بولىپ بەلگىلەندى. وسى ماقساتتا 2007 جىلى جاڭا اسكەري دوكترينا بەكىتىلدى. وندا الدىڭعى اسكەري قۇجاتتىڭ نەگىزگى تەزيستەرى ساقتالىپ, سوڭعى جەتى جىلدا الەمدە بولعان وزگەرىستەر, مەملەكەتتەر باسشىلارىنىڭ اسكەري قاۋىپسىزدىكتى قامتاماسىز ەتۋ سالاسىنداعى باسىمدىقتارعا كوزقاراسىنىڭ وزگەرۋى ەسكەرىلدى.
2017 جىلى قىركۇيەكتە جاريالانعان بەسىنشى اسكەري دوكترينادا ىشكى ءتارتىپتى قامتاماسىز ەتۋگە باسا نازار اۋدارىلدى. سوڭعى قۇجاتتا قازىرگى زامانعى ساياسي جاعداي قاپەرگە الىنىپ, قازاقستان ءوزىنىڭ اۋماقتىق تۇتاستىعى مەن ەگەمەندىگىن ساقتاۋعا, تەرروريزمگە, زاڭسىز قارۋلى قۇرىلىمدارعا قارسى كۇرەس جۇرگىزۋگە دايىن ەكەندىگى ايتىلادى.
سونىمەن قاتار اسكەري سالاداعى ءوزگەرىستەر ءبىلىم بەرۋ بولىمدەرىنە وڭ ىقپالىن تيگىزدى. قازىر قازاقستاننىڭ اسكەري سالاسىندا حالىقارالىق ستاندارتتارعا سايكەس كەلەتىن اسكەري كادرلاردى دايارلاۋدىڭ ۇلتتىق جۇيەسى قالىپتاستى. اسكەري ءبىلىم بەرۋ ءۇش دەڭگەيلى بولون جۇيەسى: باكالاۆريات, ماگيستراتۋرا, دوكتورانتۋرا نەگىزىندە ىسكە اسادى. كادرلىق اسكەري قىزمەتكەرلەر ۇلتتىق قورعانىس ۋنيۆەرسيتەتىندە, قۇرلىق اسكەرلەرىنىڭ اسكەري ينستيتۋتىندا, راديوەلەكترونيكا جانە بايلانىس اسكەري-ينجەنەرلىك ينستيتۋتىندا, اۋە قورعانىسى كۇشتەرىنىڭ اسكەري ينستيتۋتىندا دايارلانادى. بۇعان قوسا كاسىبي سەرجانتتاردى شىڭدايتىن كادەت كورپۋسى جانە رەسپۋبليكالىق اسكەري مەكتەپتەر جەلىسى جۇمىس ىستەيدى.
بۇگىنگى تاڭدا قازاقستان ارمياسىندا بەلگىلەنگەن مىندەتتى ورىنداۋعا قاۋقارلى زاماناۋي تەحنيكا ۇلگىلەرى بار. سوڭعى جىلدارى قارۋ-جاراق قاتارىن شەتتەن الدىرعان بپم-97 جانە «كوبرا» سەكىلدى وق وتكىزبەيتىن ماشينالار مەن قازاقستاندىق وندىرىستەن شىققان وزدىگىنەن جۇرەتىن «سەمسەر» ارتيللەريالىق قوندىرعىسى, 120-مم «ايباگ» مينومەتتەرى سەكىلدى جاڭا تەحنيكالار تولىقتىردى. اۋە قورعانىسى كۇشتەرىنە ميگ-31, سۋ-27س كوپ نىساندى جويعىش, سۋ-24م, سۋ-25, سۋ-30سم بومبالاۋشىلار, Eurocopter EC145, مي-171ش, مي-24 تىكۇشاقتارى جانە تاعى باسقا تەحنيكالار قوسىلدى. ال اسكەري-تەڭىز كۇشتەرىندە «قازاقستان», «ورال», «سارىارقا», «ماڭعىستاۋ» زىمىراندىق-ارتيللەريالىق كەمەلەرى, «جايىق» گيدروگرافيكالىق كەمەسى بار.
قارۋلى كۇشتەردىڭ, اسكەر مەن اسكەري قۇرىلىمداردىڭ قاجەتتىلىكتەرىنە سايكەس وتاندىق كاسىپورىنداردىڭ مۇمكىندىكتەرى مەن دامۋ كوكجيەگىن كەڭەيتۋ, ولاردىڭ ونىمدەرىن نارىقتا العا جىلجىتۋ ماقساتىندا بىلتىر نۇر-سۇلتان قالاسىندا «Kadex» كورمەسى ءوتتى. بۇل حالىقارالىق قارۋ-جاراق جانە اسكەري-تەحنيكالىق م ۇلىكتەر كورمەسىندە الەمنىڭ 28 ەلىنەن كەلگەن 318 كاسىپورىن ءوز ونىمدەرىن ۇسىندى.
بيىل 15 ساۋىردەن باستاپ وسى كۇنگە دەيىن جالعاسقان «ايبالتا» ستراتەگيالىق كوماندالىق-شتابتىق وقۋ-جاتتىعۋىنا جالپى 8 مىڭعا جۋىق اسكەري قىزمەتشى مەن 2 مىڭنان اسا بىرلىك قارۋ-جاراق پەن اسكەري تەحنيكا تارتىلدى. بۇل وقۋ-جاتتىعۋ جيىنىنىڭ بارىسىمەن قازاقستان پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆتىڭ ءوزى بارىپ, تانىسىپ قايتتى. وندا شارتتى تۇردە ءتۇرلى قاقتىعىستار ورىن الىپ, سايدىڭ ساقپان تاسىنداي ساربازدار جاۋىنگەرلىك ءىس-قيمىلدارىن شەبەر كورسەتىپ, اسكەري دايىندىقتارىن پىسىقتادى. مەملەكەت باسشىسى بۇل ءىس-شارادا قازاقستاننىڭ قارۋلى كۇشتەرىنىڭ قۋاتى كورسەتىلگەنىن, كۇشتى ءارى موبيلدى ارميامىز ەلدىڭ سەنىمدى قالقانى ءارى تىرەگى ەكەنىن ايتىپ, قازاقستاندىقتاردى وتان قورعاۋشى كۇنى جانە جەڭىس كۇنى مەرەكەلەرىمەن قۇتتىقتادى.
